Mumbai SRPF Jawan : धक्कादायक! कर्तव्यावर असताना लोकभवन परिसरातील SRPF जवानाने उचललं टोकाचं पाऊल
मुंबई : महाराष्ट्राच्या राज्यपालांचे शासकीय निवासस्थान असलेल्या महाराष्ट्र लोकभवनच्या आवारात राज्य राखीव पोलीस दलाच्या (एसआरपीएफ) एका जवानाने कथितरित्या आत्महत्या केल्याची माहिती पोलिसांनी मंगळवार, 7 जुलै रोजी दिली. मलबार हिल पोलीस ठाण्याच्या अधिकाऱ्यांनी दिलेल्या माहितीनुसार, ही घटना सोमवारी रात्री 8.30 च्या सुमारास घडली. कोल्हापूर येथील एसआरपीएफ गट-16 मध्ये कार्यरत असलेले मृत जवान कौस्तुभ सांगळे हे मलबार हिलमधील उच्च सुरक्षा असलेल्या राजभवन परिसरातील लोक भवनात पहारा देत होते.
प्राथमिक माहितीनुसार, कौस्तुभ सांगळे यांनी कर्तव्यावर असताना आपल्या सर्व्हिस रायफलचा वापर केला. गोळीबाराचा आवाज ऐकून सुरक्षा कर्मचारी घटनास्थळी धावून गेले, पण त्यांना सांगळे रक्ताच्या थारोळ्यात पडलेले आढळले. त्यांना घटनास्थळीच मृत घोषित करण्यात आले. वरिष्ठ पोलीस अधिकाऱ्यांनी तात्काळ घटनास्थळी भेट दिली आणि तपासाचा भाग म्हणून फॉरेन्सिक पथकाने घटनास्थळाची तपासणी करून पुरावे गोळा केले. पोलिसांनी सांगितले की, कोणतीही चिठ्ठी येथे सापडली नसून या कथित आत्महत्येमागील नेमके कारण अद्याप अज्ञात आहे. या घटनेमागील परिस्थिती निश्चित करण्यासाठी तपास सुरू असून अधिकारी सर्व संभाव्य बाजूंनी तपास करत आहेत.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.