Crime News: वडील आणि पत्नीचे अनैतिक संबंध असल्याचा संशय; संतापलेल्या तरुणाने दोघांवर झाडल्या गोळ्या
उत्तर प्रदेशातील बुलंदशहर जिल्ह्यातील खुर्जा जंक्शन परिसरात घडलेल्या धक्कादायक दुहेरी हत्याकांडाने संपूर्ण परिसरात खळबळ उडाली आहे. पत्नी आणि स्वतःच्या वडिलांमध्ये अनैतिक संबंध असल्याचा संशय घेत एका तरुणाने संतापाच्या भरात दोघांवर गोळीबार केला. या घटनेत वडिलांचा जागीच मृत्यू झाला, तर गंभीर जखमी झालेल्या पत्नीचा उपचारादरम्यान मृत्यू झाला. पोलिसांनी आरोपीला अटक करून न्यायालयात हजर केले असून त्याला कारागृहात पाठवण्यात आले आहे.
ही घटना खुर्जा जंक्शन हद्दीतील कलंदरगढी गावात घडली. आरोपी मुबीन याच्या मनात पत्नी सना आणि वडील रियाजुद्दीन यांच्याबाबत संशय निर्माण झाला होता. या संशयामुळे घरात सातत्याने वाद होत असल्याची माहिती पोलिस तपासात समोर आली आहे. कुटुंबातील सदस्य आणि नातेवाईकांनी अनेकदा दोघांमध्ये समेट घडवून आणण्याचा प्रयत्न केला होता.
हेही वाचा: Beed: लग्न ठरलं…मांडव सजला…अन् नवरदेवाने अचानक दिला नकार; पीएसआयचं संतापजनक कृत्य
मिळालेल्या माहितीनुसार, काही दिवसांपूर्वी सनाने एका मुलाला जन्म दिला होता. मात्र, त्या बाळाला स्वतःचे मूल मानण्यास मुबीनने नकार दिला. त्यानंतर त्याने पत्नीच्या चारित्र्यावर प्रश्न उपस्थित करत घरात तणाव निर्माण केला. परिस्थिती हाताबाहेर जाऊ लागल्यानंतर रविवारी दोन्ही कुटुंबीयांनी पंचायत बोलावली होती. या बैठकीत नातेवाईकांनी समजूत काढण्याचा प्रयत्न केला, मात्र त्याचा काहीच परिणाम झाला नाही.
पंचायत संपल्यानंतर पुन्हा घरात वाद सुरू झाला. संतापलेल्या मुबीनने वडिलांच्या परवानाधारक पिस्तुलाचा वापर करत आधी वडिलांवर गोळी झाडली. त्यानंतर पत्नीवरही गोळीबार केला. अचानक झालेल्या या प्रकारामुळे घरात एकच गोंधळ उडाला. गोळीबारानंतर दोघेही गंभीर जखमी अवस्थेत रक्ताच्या थारोळ्यात पडले होते.
घटनेनंतर आरोपीने स्वतःच पोलिसांना फोन करून माहिती दिली. पोलिसांनी तातडीने घटनास्थळी धाव घेत जखमी महिलेला रुग्णालयात दाखल केले. मात्र उपचारादरम्यान तिचा मृत्यू झाला. रियाजुद्दीन यांचा घटनास्थळीच मृत्यू झाल्याचे डॉक्टरांनी घोषित केले.
दरम्यान, मृत महिलेचे वडील खलील अहमद यांनी पोलिसांत तक्रार दाखल केली आहे. त्यांनी दिलेल्या माहितीनुसार, लग्नावेळी मुबीन नोकरी करत असल्याचे सांगण्यात आले होते, मात्र प्रत्यक्षात तो बेरोजगार होता. घरातील परिस्थिती पाहता सासरे रियाजुद्दीन हेच सुनेची काळजी घेत असत. याच गोष्टीचा चुकीचा अर्थ घेत मुबीनच्या मनात संशय वाढत गेला असल्याचा आरोप त्यांनी केला आहे.
पोलिसांनी घटनास्थळावरून पिस्तूल जप्त केले असून फॉरेन्सिक तपास सुरू करण्यात आला आहे. परिसरातील सीसीटीव्ही फुटेज आणि अन्य पुराव्यांच्या आधारे पोलिस या प्रकरणाचा अधिक तपास करत आहेत.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.