LTT TC Beaten: मुंबईत सॉफ्टवेअर इंजिनिअर तरुणाचा संताप; दंड भरायला सांगितल्याने टीसीला मारहाण, पोलिसांकडून गुन्हा दाखल

मुंबईतील लोकमान्य टिळक टर्मिनस (Lokmanya Tilak Terminus, LTT) येथे एका 25 वर्षीय सॉफ्टवेअर इंजिनिअरने कर्तव्यावर असलेल्या तिकीट तपासनीसाला (TC) मारहाण केल्याची धक्कादायक घटना समोर आली आहे. तिकीट नसल्याचे विचारल्याचा राग मनात धरून या तरुणाने तिकीट तपासनीसाच्या डोक्यात जोरदार बुक्के मारले. याप्रकरणी लोहमार्ग पोलिसांनी (GRP) गुन्हा दाखल करून आरोपी इंजिनिअरला बेड्या ठोकल्या आहेत. या घटनेमुळे रेल्वे स्थानकावर काही काळ तणावाचे वातावरण निर्माण झाले होते.

नेमका प्रकार काय घडला?

ही घटना शुक्रवारी (8 मे 2026) रोजी दुपारी 1 वाजून 45 मिनिटांच्या सुमारास कामायनी एक्सप्रेसमध्ये घडली. अमित गणेश कोळी (वय 42) हे तिकीट तपासनीस ट्रेनमध्ये तिकीट तपासणीचे काम करत होते. यावेळी त्यांना दरवाजाजवळ एक तरुण उभा असलेला दिसला. कोळी यांनी त्याच्याकडे तिकिटाची विचारणा केली असता, त्याने त्याच्याकडे तिकीट नसल्याचे सांगितले. आपण केवळ आईला सोडण्यासाठी स्थानकावर आलो होतो, असे त्याने स्पष्ट केले. मात्र, त्याच्याकडे प्लॅटफॉर्म तिकीटही उपलब्ध नव्हते.

“10 मिनिटांच्या प्रवासाला कसलं तिकीट?”

राज कमलेंद्र चंद्रशेखर तिवारी असे या आरोपी तरुणाचे नाव आहे. जेव्हा कोळी यांनी त्याला प्लॅटफॉर्म तिकीट नसल्याबद्दल दंड भरण्यास सांगितले, तेव्हा त्याने मुजोरी करण्यास सुरुवात केली. त्याने सांगितले की, त्याला आपल्या आईसोबत ठाण्यापर्यंत प्रवास करायचा आहे, पण इतक्या कमी अंतरासाठी तिकीट काढण्याची त्याला गरज वाटत नाही. “केवळ 10 मिनिटांच्या प्रवासासाठी कसलं तिकीट लागते?” असा उद्धट प्रश्न त्याने कोळी यांना विचारला आणि दंड भरण्यास स्पष्ट नकार दिला.

हेही वाचा: Vaibhav Suryavanshi: विराट विक्रम! वैभव सूर्यवंशीचा क्रिकेट विश्वात धमाका; पोलार्ड-करणबीरला मागे टाकत रचला ‘हा’ मोठा जागतिक इतिहास

टीसीवर धावून गेला आरोपी

काही वेळातच आरोपीची आई तिथे पोहोचली. अमित कोळी यांनी जेव्हा त्याच्या आईला नियमांची माहिती दिली आणि 300 रुपये दंड भरावा लागेल असे सांगितले, तेव्हा राज तिवारीचा संयम सुटला. त्याने संतापाच्या भरात कोळी यांच्या डोक्यात सलग तीन वेळा जोरात बुक्के मारले. या अचानक झालेल्या हल्ल्यामुळे कोळी यांना चक्कर आली आणि ते खाली कोसळले. यानंतर त्यांनी तातडीने रेल्वेच्या हेल्पलाईन क्रमांकावर संपर्क साधून मदतीची मागणी केली.

आरोपीला ठाणे स्थानकात पकडले

मारहाण केल्यानंतरही आरोपी शांत बसला नाही. ट्रेन ठाणे स्थानकावर पोहोचेपर्यंत त्याने डब्यात गोंधळ घालणे सुरूच ठेवले. दरम्यान, माहिती मिळताच रेल्वे सुरक्षा दलाचे (RPF) कॉन्स्टेबल रामजतन यादव यांनी ठाणे स्थानकावर ट्रेनमध्ये प्रवेश केला आणि आरोपीला ताब्यात घेतले. सुरुवातीला ठाणे लोहमार्ग पोलिसांनी या प्रकरणाची नोंद केली आणि नंतर पुढील तपासासाठी आरोपीला एलटीटी (LTT) पोलिसांच्या स्वाधीन केले.

इंजिनिअरला झाली अटक

सरकारी कामात अडथळा आणणे आणि सरकारी कर्मचाऱ्याला मारहाण करणे या कलमान्वये राज तिवारी याच्यावर गुन्हा दाखल करण्यात आला आहे. “आम्ही आरोपीला अटक केली असून या प्रकरणाचा सविस्तर तपास करत आहोत,” अशी माहिती जीआरपीच्या वरिष्ठ अधिकाऱ्यांनी दिली. एक सुशिक्षित तरुण अशा प्रकारे कायद्याचे उल्लंघन करून हिंसक कृत्य करतो, याबद्दल रेल्वे प्रशासनाने तीव्र चिंता व्यक्त केली आहे. 

हेही वाचा: Delhi Terrorist Attack Alert: राजधानी दिल्लीत दहशतीचे सावट! आत्मघाती हल्ल्याच्या धोक्यानंतर हाय अलर्ट जारी; भाजप मुख्यालयासह ‘या’ ठिकाणांची सुरक्षा वाढवली