Shivam Dube: तोंडाला मास्क अन् डोक्यावर कॅप…, दुबेजींना करावा लागला लपूनछपून प्रवास; आश्चर्यचकित कारण समोर
मुंबई: टी20 विश्वचषक 2026 मध्ये भारताच्या ऐतिहासिक विजयात महत्त्वाची भूमिका बजावणारा अष्टपैलू खेळाडू शिवम दुबे सध्या एका वेगळ्याच कारणामुळे चर्चेत आला आहे. मैदानावर दमदार खेळी करणाऱ्या दुबेचा सामना संपल्यानंतरचा प्रवास मात्र अत्यंत साधा आणि रोचक ठरला. अंतिम सामना जिंकल्यानंतर अहमदाबादहून मुंबईला परतताना त्याला विमानाचे तिकीट न मिळाल्याने रेल्वेने प्रवास करावा लागला.
8 मार्च रोजी अहमदाबादमधील नरेंद्र मोदी स्टेडियम येथे झालेल्या अंतिम सामन्यात भारताने न्यूझीलंडचा मोठ्या फरकाने पराभव करत तिसऱ्यांदा टी20 विश्वचषक जिंकला. या संपूर्ण स्पर्धेत शिवम दुबेने उत्कृष्ट कामगिरी करत संघाच्या विजयात मोठे योगदान दिले. त्याने स्पर्धेत एकूण नऊ सामने खेळत 235 धावा केल्या आणि गोलंदाजी करताना पाच बळीही घेतले.
अंतिम सामन्यातही दुबेने आपल्या आक्रमक फलंदाजीची झलक दाखवली. त्याने अवघ्या 8 चेंडूंमध्ये 26 धावा करत सामन्याचा वेग भारताच्या बाजूने वळवला. विशेष म्हणजे शेवटच्या षटकातच त्याने तीन चौकार आणि दोन षटकारांसह 24 धावा काढल्या. या झंझावाती खेळीमुळे भारताला मोठा विजय मिळवण्यात मदत झाली.
मात्र विजयाच्या उत्सवानंतर दुबेच्या मुंबईकडे परतीच्या प्रवासाची कथा वेगळीच ठरली. त्याला शक्य तितक्या लवकर मुंबईला पोहोचायचे होते, कारण त्याचा चार वर्षांचा मुलगा अयान आणि दोन वर्षांची मुलगी मेहविश घरी त्याची वाट पाहत होते. परंतु अहमदाबाद ते मुंबई या मार्गावरील सर्व विमानांची तिकिटे भरलेली असल्याने त्याने रेल्वेने जाण्याचा निर्णय घेतला.
दुबे त्याची पत्नी अंजुम खान आणि एका मित्रासह सकाळी पाच वाजताच्या ट्रेनमध्ये बसला. त्याला थर्ड एसी मध्ये जागा मिळाली आणि त्याने तातडीने तिकीट बुक केले. मात्र प्रवासादरम्यान लोकांनी ओळखू नये म्हणून त्याने एक वेगळीच युक्ती अवलंबली.
ओळख लपवण्यासाठी दुबेने कॅप, मास्क आणि फुल स्लीव्ह टी-शर्ट परिधान केला. स्टेशनवर गर्दी टाळण्यासाठी तो ट्रेन सुटण्याच्या अवघ्या पाच मिनिटे आधी प्लॅटफॉर्मवर पोहोचला आणि थेट डब्यात चढला. ट्रेनमध्ये बसताच तो लगेच वरच्या बर्थवर जाऊन शांतपणे झोपून राहिला, त्यामुळे अनेक प्रवाशांना त्याची ओळख पटलीच नाही.
दुबेने सांगितले की संपूर्ण प्रवास सुरळीत पार पडला आणि कुणालाही त्याची ओळख पटली नाही. मात्र मुंबईत पोहोचल्यावर चाहत्यांची गर्दी होऊ शकते, याची त्याला कल्पना होती. त्यामुळे बोरीवली स्टेशन येण्यापूर्वीच त्याने पोलिसांशी संपर्क साधला आणि त्यांच्या मदतीने सुरक्षितपणे घरी पोहोचला.
भारताच्या ऐतिहासिक विजयासोबतच शिवम दुबेचा हा साधा आणि रोचक रेल्वे प्रवास सध्या सोशल मीडियावर मोठ्या प्रमाणात चर्चेत आहे. मैदानावर स्टार असलेला खेळाडू साध्या पद्धतीने ट्रेनने प्रवास करत घरी पोहोचल्याची ही कहाणी चाहत्यांना विशेष भावली आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.