Nashik News: व्हॉट्सॲपवर ‘भावपूर्ण श्रद्धांजली’ स्टेटस; दीड वर्षांच्या चिमुकल्यासह कुटुंबातील चार जणांनी संपवलं आयुष्य
Nashik News: देवळा तालुक्यातील फुलेमाळवाडी या शांत गावात शनिवारी सकाळी भीषण घटना उघडकीस आल्यानंतर परिसरात स्तब्धता पसरली आहे. एका कुटुंबातील चार सदस्य मृत अवस्थेत आढळल्याची माहिती समोर आली असून, प्राथमिक तपासात ही घटना कौटुंबिक तणावाच्या पार्श्वभूमीवर घडली असावी, असा पोलिसांचा अंदाज आहे. या घटनेमुळे नाशिक जिल्हा हादरून गेला आहे.
मिळालेल्या माहितीनुसार, गोविंदा बाळकृष्ण शेवाळे (वय 40) स्वतःसोबत पत्नी आणि दोन लहान मुलांचे आयुष्य संपवले असल्याची शक्यता व्यक्त केली जात आहे. विशेष म्हणजे, ही घटना घडण्यापूर्वी गोविंदाने आपल्या व्हॉट्सअॅप स्टेटसवर ‘भावपूर्ण श्रद्धांजली’ असा संदेश टाकला होता. हा संदेश पाहताच त्याच्या भावाला काहीतरी गंभीर घडल्याची जाणीव झाली. त्याने तातडीने नातेवाईकांशी संपर्क साधला. सर्वजण शेवाळे यांच्या घराकडे धावले आणि तिथे त्यांना धक्कादायक दृश्य पाहायला मिळाले.
घरात प्रवेश करताच पत्नी कोमल (वय 35), मुलगी खुशी (वय 8) आणि दीड वर्षांचा मुलगा श्याम हे खोलीत मृतावस्थेत आढळले. तर गोविंदा शेवाळे याने घराच्या ओट्यावर दोरीच्या साहाय्याने आत्महत्या केल्याचे दिसून आले. घटना पाहून उपस्थित नागरिक आणि नातेवाईकांना धक्का बसला असून, घराबाहेर काही वेळातच मोठी गर्दी जमली. पोलिसांनी तत्काळ परिसर सील करून नागरिकांना सुरक्षित अंतरावर ठेवले.
देवळा पोलीस ठाण्याचे पोलीस निरीक्षक सार्थक नेहते यांनी तात्काळ पथकासह घटनास्थळी धाव घेतली. फॉरेन्सिक विभागाची टीमही तपासासाठी पोहोचली असून मृत्यूची अचूक कारणमीमांसा करण्यासाठी विविध नमुने जप्त करण्यात आले आहेत. घटनास्थळी कोणतीही जबरीची चिन्हे किंवा बाहेरील व्यक्तींचा हस्तक्षेप स्पष्ट दिसत नसल्याने ही घटना कौटुंबिक पातळीवरच घडली असल्याचा पोलिसांचा प्राथमिक निष्कर्ष आहे.
शेजाऱ्यांनी दिलेल्या माहितीनुसार, शेवाळे कुटुंब साधे, शांतपणे जगणारे म्हणून ओळखले जात होते. मात्र गेल्या काही महिन्यांत घरातील आर्थिक आणि वैयक्तिक स्वरूपाचे ताण वाढले असल्याची चर्चा स्थानिकांमध्ये होते. पोलिसांनी मात्र कोणत्याही निष्कर्षापर्यंत पोहोचण्यास नकार देत सर्व घटकांवर तपास सुरू ठेवला आहे. कुटुंबातील सदस्यांचे मोबाईल फोन, गोविंदाने केलेले स्टेटस, तसेच मृतदेहांच्या स्थितीचा अभ्यास करूनच पुढील दिशा स्पष्ट होईल.
या घटनेमुळे संपूर्ण गावात शोककळा पसरली आहे. विशेषतः दोन निष्पाप मुलांचा मृत्यू जनमानसाला प्रचंड चटका लावणारा ठरला आहे. समाजात ताणतणाव, नैराश्य आणि कौटुंबिक वाद वाढत चालल्याच्या पार्श्वभूमीवर अशा घटना पुन्हा समोर येत आहेत, याबाबत नागरिकांमध्ये चिंता व्यक्त होत आहे.
पोलिसांनी सध्या अपघात मृत्यूचा गुन्हा नोंदवून तपास सुरू ठेवला असून, शवविच्छेदन अहवालानंतर घटनेचे नेमके स्वरूप स्पष्ट होणार आहे. दरम्यान, या कुटुंबाच्या दुःखद अंतामुळे परिसरात हळहळ व्यक्त केली जात आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.