Crime News: सरकारी नोकरी सोडली, पोटच्या मुलासाठी घरी राहिली; अन् काही दिवसांतच महिला डॉक्टरचा करुण शेवट
गुजरातमधील अलंग परिसरातील एका गावात 32 वर्षीय महिला डॉक्टरच्या मृत्यूने खळबळ उडाली आहे. बुधवारी 1 मार्च 2026 रोजी दुपारी त्या त्यांच्या पतीच्या घरी मृतावस्थेत आढळल्या. सुरुवातीला हा प्रकार आत्महत्येचा असल्याचे सांगितले जात होते, मात्र मृत महिलेच्या वडिलांनी हा दावा फेटाळून लावत गंभीर संशय व्यक्त केल्याने प्रकरणाला वेगळे वळण मिळाले आहे.
मृत डॉक्टरची ओळख डॉ. मिनाबेन विजयभाई मारू अशी झाली आहे. त्या पात्र वैद्यकीय अधिकारी असून कोरोना काळात नारायण सरोवर येथील शासकीय रुग्णालयात त्यांनी सेवा दिली होती. त्यानंतर त्यांची बदली टिंबी येथे झाली होती. काही दिवसांपूर्वीच त्यांनी आपल्या चार वर्षांच्या मुलाच्या संगोपनासाठी सरकारी नोकरीचा राजीनामा दिला होता.
पोलिसांच्या माहितीनुसार, डॉ. मिनाबेन गेल्या सात वर्षांपासून पती विजयभाई यांच्यासोबत राहत होत्या. बुधवारी त्या घरात गळफास घेतलेल्या अवस्थेत आढळल्या. मात्र, शवविच्छेदनासाठी तलाजा रेफरल हॉस्पिटल येथे नेण्यात आल्यानंतर त्यांच्या वडिलांनी आत्महत्येच्या दाव्यावर प्रश्नचिन्ह उपस्थित केले.
मृतकांच्या वडिलांनी माध्यमांशी बोलताना सांगितले की, “माझी मुलगी डॉक्टर होती, सुशिक्षित आणि अनुभवी होती. ती इतकी कमकुवत नव्हती की आत्महत्येसारखे टोकाचे पाऊल उचलेल.” त्यांनी घराजवळ राहणाऱ्या काही नातेवाईकांमुळे कौटुंबिक तणाव असल्याचाही आरोप केला.
त्यांनी पुढे असा आरोप केला की, सकाळी त्यांना मुलीच्या घरी बोलावण्यात आले आणि काही तासांतच रुग्णालयात बोलावून मृतदेह दाखवण्यात आला. “आम्हाला संशय आहे की या प्रकरणामागे काहीतरी वेगळे आहे. आम्हाला न्याय हवा आहे,” अशी मागणी त्यांनी केली.
परिवाराच्या आक्षेपानंतर पोलिसांनी नायब मामलतदारांच्या उपस्थितीत पंचनामा केला. मृतदेहाची बारकाईने तपासणी करण्यात आली असून गळफासाशिवाय इतर कोणत्याही जखमा आहेत का, याची खात्री केली जात आहे. प्रकरणाची पारदर्शक चौकशी व्हावी यासाठी मृतदेह पुढील तपासासाठी भावनगर येथे पाठवण्यात आला आहे, जिथे डॉक्टरांच्या पॅनलकडून शवविच्छेदन केले जात आहे. सध्या पोलिसांनी आकस्मिक मृत्यूची नोंद केली असून पुढील तपास सुरू आहे. अंतिम निष्कर्ष हा पॅनल पोस्टमार्टम अहवालावर अवलंबून असेल. अहवाल आल्यानंतरच हा प्रकार आत्महत्या आहे की यामागे काही कटकारस्थान आहे, हे स्पष्ट होणार आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.