Rohit Shetty: रोहित शेट्टी यांच्या घराबाहेर मध्यरात्री गोळीबार; फक्त गोळीबारच नाही तर…; जुहू परिसरात कडक पोलीस बंदोबस्त

मुंबईच्या जुहू परिसरात मंगळवारी रात्री उशिरा बॉलिवूडचे प्रसिद्ध दिग्दर्शक रोहित शेट्टी यांच्या निवासस्थानाबाहेर गोळीबार झाल्याची धक्कादायक घटना घडली. या घटनेमुळे संपूर्ण परिसरात एकच खळबळ उडाली असून नागरिकांमध्ये भीतीचे वातावरण पसरले आहे. प्रत्यक्षदर्शींनी दिलेल्या माहितीनुसार, मध्यरात्रीच्या सुमारास सलग काही गोळ्यांच्या आवाजामुळे लोक घराबाहेर आले आणि पोलिसांना तत्काळ माहिती देण्यात आली.

माहिती मिळताच जुहू पोलीस ठाण्याचे अधिकारी, वरिष्ठ पोलीस अधिकारी आणि विशेष पथके घटनास्थळी दाखल झाली. सुरक्षेच्या दृष्टीने रोहित शेट्टी यांच्या घराबाहेर मोठ्या प्रमाणात पोलीस बंदोबस्त तैनात करण्यात आला आहे. परिसराची नाकाबंदी करण्यात आली असून ये-जा करणाऱ्या प्रत्येक व्यक्तीवर बारकाईने नजर ठेवली जात आहे. स्थानिक पोलिसांसह गुन्हे शाखा आणि झोनल पोलिसांची पथके तपासात सहभागी झाली आहेत.

गोळीबाराच्या घटनेनंतर फॉरेन्सिक पथकाला तातडीने पाचारण करण्यात आले. घटनास्थळावरून रिकाम्या काडतुसांसह इतर भौतिक पुरावे गोळा करण्याचे काम सुरू आहे. यासोबतच परिसरातील सीसीटीव्ही कॅमेऱ्यांचे फुटेज तपासले जात असून संशयितांची हालचाल कॅमेऱ्यात कैद झाली आहे का, याचा शोध घेतला जात आहे. काही सीसीटीव्ही फुटेज पोलिसांच्या ताब्यात आले असून त्याचे तांत्रिक विश्लेषण सुरू असल्याची माहिती सूत्रांकडून मिळत आहे.

या घटनेची माहिती देताना मुंबई पोलीस आयुक्तांनी गोळीबार झाल्याची अधिकृत पुष्टी केली आहे. “निवासस्थानाबाहेर गोळीबार झाल्याची घटना घडली आहे. आम्ही सर्व शक्यता लक्षात घेऊन तपास करत आहोत. गुन्हेगारांची ओळख पटवण्यासाठी आणि घटनेमागील कारण शोधण्यासाठी तपास यंत्रणा काम करत आहे,” असे त्यांनी सांगितले.

सुदैवाने या घटनेत कोणालाही दुखापत झाल्याची माहिती नाही. रोहित शेट्टी तसेच त्यांच्या कुटुंबीयांना कोणतीही इजा झालेली नसून सर्वजण सुरक्षित असल्याचे पोलिसांनी स्पष्ट केले आहे. मात्र, घटनेचे गांभीर्य लक्षात घेता त्यांच्या सुरक्षेत वाढ करण्यात आली आहे.

दरम्यान, घटनेनंतरचा एक व्हिडीओ सोशल मीडियावर मोठ्या प्रमाणात व्हायरल होत आहे. या व्हिडीओमध्ये पोलीस संपूर्ण परिसर सील करताना आणि चौकशी करताना दिसत आहेत. व्हिडीओ व्हायरल झाल्यानंतर बॉलिवूडमधील सेलिब्रिटींच्या सुरक्षेचा मुद्दा पुन्हा एकदा चर्चेत आला आहे.

हा गोळीबार कोणाच्या धमकीचा भाग आहे का, एखाद्या टोळीचा इशारा आहे का, की केवळ भीती निर्माण करण्याचा प्रयत्न या सर्व शक्यतांचा पोलीस तपास करत आहेत. अद्याप या प्रकरणी कोणालाही ताब्यात घेण्यात आलेले नसून तपास सुरू आहे. तपास पूर्ण झाल्यानंतरच या घटनेमागील नेमकं सत्य समोर येईल, असे पोलिसांनी स्पष्ट केले आहे.