Delhi Blast Update: अल-फलाह युनिव्हर्सिटीतील डॉक्टरचे दहशतवादी कनेक्शन उघड; भाड्याने राहायचा तीन बेडरूच्या प्रशस्त फ्लॅटमध्ये
दिल्ली ब्लास्ट प्रकरणाची चौकशी करताना नॅशनल इन्व्हेस्टिगेशन एजन्सीने (National Investigation Agency, NIA) अटक केलेल्या अल-फलाह युनिव्हर्सिटीचा सर्जन डॉ. मुजम्मिल शकील याच्याबाबत दोन महत्त्वाचे खुलासे केले आहेत. चौकशीत समोर आले की फतेहपूर तगा आणि धौज या ठिकाणांशिवाय त्याने खोरी जमालपूर गावातही एक थ्री-बीएचके घर भाड्याने घेतले होते. हे घर त्याने कश्मीरी फळांचा व्यापार करणार असल्याचे सांगून घेतले होते.
या घराचे मालक आणि गावाचे माजी सरपंच जुम्मा यांनी NIA पथकासमोर मुजम्मिलची ओळख सांगितली. जुम्माने हे तीन बेडरूम, किचन आणि हॉल असलेले घर सुमारे आठ हजार रुपयांत भाड्याने दिले होते. मुजम्मिल येथे अनेक वेळा डॉ. शाहीन सईदसोबत येत असल्याचेही तपासात स्पष्ट झाले आहे. हे घर अल-फलाह युनिव्हर्सिटीपासून अंदाजे चार किलोमीटर अंतरावर आहे.
तपासादरम्यान दुसरा धक्कादायक मुद्दा उघडकीस आला आहे. दिल्ली ब्लास्टमध्ये वापरण्यात आलेला सुमारे 2540 किलो विस्फोटक पदार्थ काही काळ युनिव्हर्सिटीच्या जवळील शेतात असलेल्या एका खोलीत ठेवण्यात आला होता. ही सामग्री सुमारे 12 दिवस तिथेच छुप्या पद्धतीने साठवून ठेवली गेली होती. चोरी होण्याचा किंवा माहिती बाहेर जाण्याचा धोका जाणवताच, हा साठा फतेहपूर तगा येथील इमाम इश्तियाक याच्या जुन्या घरात हलविण्यात आला.
NIA च्या माहितीनुसार, फतेहपूर तगा आणि धौज येथे स्फोटक तयार करण्यासाठी लागणाऱ्या अमोनियम नायट्रेटसह इतर साहित्याचे लपवून ठेवलेले ठिकाणही मिळाले आहे. या कारवाईदरम्यान मुजम्मिलला सोमवारी रात्री घटनास्थळी नेण्यात आले, जिथे स्थानिकांनी त्याच्या ओळखीची खात्री दिली आहे.
खोरी जमालपूरमधील हे घर जुम्माच्या प्लास्टिक रॉ मटेरियलच्या कारखान्याच्या वरच्या मजल्यावर आहे. NIA ला मिळालेल्या माहितीप्रमाणे, एप्रिल ते जुलै 2025 या कालावधीत मुजम्मिलने हे घर भाड्याने घेतले होते आणि त्याच काळात विस्फोटक साठवण्याची हालचाल झाली. या सर्व घडामोडींमुळे दिल्ली ब्लास्टसाठी तयार केलेल्या दहशतवादी मॉड्यूलचा विस्तार स्पष्ट होऊ लागला असून NIA आणखी काही ठिकाणांची चौकशी करत आहे.
हेही वाचा: Beed Crime: धक्कादायक! बीडमध्ये राष्ट्रवादी नेत्यावर 15 जणांनी केला प्राणघातक हल्ला
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.