Chhatrapati Sambhajinagar: कोर्टाचा आदेश, मुलाचा संताप आणि वृद्ध वडिलांचा दुर्दैवी अंत; छत्रपती संभाजीनगरात नेमकं काय घडलं?
छत्रपती संभाजीनगर: छत्रपती संभाजीनगर शहरातून नातेसंबंधांना काळिमा फासणारी एक धक्कादायक घटना समोर आली आहे. मालमत्तेच्या वादातून निर्माण झालेल्या कौटुंबिक संघर्षाने अखेर अत्यंत गंभीर वळण घेतल्याने संपूर्ण परिसरात खळबळ उडाली आहे. न्यायालयाने वृद्ध दाम्पत्याच्या बाजूने निर्णय दिल्यानंतर अवघ्या काही वेळातच एका 84 वर्षीय ज्येष्ठ नागरिकाचा संशयास्पद परिस्थितीत मृत्यू झाल्याची घटना घडली.
रेल्वे स्टेशन परिसरातील अबरार कॉलनी येथे ही घटना घडली. जाफर कमरुद्दीन पटेल सय्यद (वय 84) असे मृत ज्येष्ठ नागरिकाचे नाव असून ते जलसंपदा विभागातून सेवानिवृत्त झाले होते. त्यांच्या कुटुंबात पत्नी, चार मुली आणि तीन मुलगे आहेत. मात्र, गेल्या काही वर्षांपासून कुटुंबात मालमत्तेवरून वाद सुरू असल्याची माहिती समोर आली आहे.
मिळालेल्या माहितीनुसार, जाफर सय्यद आणि त्यांच्या पत्नीला स्वतःच्या घराच्या ताब्यासाठी न्यायालयीन लढा द्यावा लागला होता. घराच्या मालकी आणि ताब्याच्या प्रश्नावरून कुटुंबात दीर्घकाळ मतभेद सुरू होते. अखेर न्यायालयाने वृद्ध दाम्पत्याच्या बाजूने निर्णय देत त्यांना घराचा ताबा देण्याचे आदेश दिले.
मात्र, या निर्णयानंतर काही वेळातच धक्कादायक घटना घडली. न्यायालयाच्या आदेशामुळे नाराज झालेल्या एका मुलाने वडिलांशी वाद घातल्याचा प्राथमिक संशय व्यक्त केला जात आहे. त्यानंतर ज्येष्ठ नागरिकांवर धारदार हत्याराने हल्ला करण्यात आल्याची माहिती समोर आली. या घटनेत जाफर सय्यद गंभीर जखमी झाले आणि त्यांचा मृत्यू झाला.
घटनेची माहिती मिळताच पोलिसांनी तातडीने घटनास्थळी धाव घेतली. वरिष्ठ पोलीस अधिकारी, गुन्हे शाखेचे पथक आणि स्थानिक पोलिसांनी परिसराची पाहणी करून तपास सुरू केला. शहरात तात्काळ नाकाबंदी करण्यात आली आणि संशयिताचा शोध घेण्यासाठी विशेष मोहीम राबविण्यात आली.
पोलिसांनी अवघ्या काही तासांत मुख्य संशयिताला ताब्यात घेतल्याची माहिती समोर आली आहे. प्राथमिक चौकशीत मालमत्तेचा वाद हा या घटनेमागील प्रमुख कारण असल्याचा अंदाज व्यक्त केला जात आहे. याप्रकरणी गुन्हा दाखल करण्यात आला असून पोलीस विविध अंगांनी तपास करत आहेत.
या घटनेमुळे परिसरात हळहळ व्यक्त केली जात आहे. वृद्ध आई-वडिलांना स्वतःच्या घरासाठी न्यायालयाचा आधार घ्यावा लागणे आणि त्यानंतर अशी घटना घडणे, यामुळे अनेक प्रश्न उपस्थित झाले आहेत. मालमत्तेच्या वादातून कौटुंबिक नात्यांमध्ये वाढणारा तणाव किती गंभीर परिणाम घडवू शकतो, याची पुन्हा एकदा प्रचिती या घटनेतून आली आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.