Bank Of Maharashtra: बँक ऑफ महाराष्ट्रवर सिनेस्टाईल दरोडा; अवघ्या काही मिनिटांत कोट्यवधींचा ऐवज लंपास; 5 जण फरार
झारखंड: झारखंडमधील बरही येथे बँक ऑफ महाराष्ट्राच्या शाखेत दिवसाढवळ्या सशस्त्र दरोडा टाकल्याची धक्कादायक घटना समोर आली आहे. अवघ्या 15 मिनिटांत पाच जणांच्या टोळीने कोट्यवधींचं सोने आणि रोकड लंपास करत पोलिसांना चकवा दिला. या घटनेनंतर परिसरात भीतीचं वातावरण निर्माण झालं असून पोलिसांनी तपासाला वेग दिला आहे.
शुक्रवारी सायंकाळच्या सुमारास ही घटना घडली. दुपारी सुमारे 4 वाजण्याच्या सुमारास दोन तरुण ग्राहक असल्याचं भासवत बँकेत शिरले. चालू खाते उघडण्याच्या बहाण्याने त्यांनी कर्मचाऱ्यांशी संवाद साधला. काही वेळातच त्यांच्या इतर तीन साथीदारांनीही बँकेत प्रवेश केला आणि अचानक परिस्थिती बदलली. या पाचही जणांनी हातात शस्त्रे घेऊन कर्मचारी आणि ग्राहकांना धमकावले.
दरोडेखोरांनी बँकेतील सर्वांना ओलीस ठेवत कोणताही विरोध होऊ नये याची काळजी घेतली. काही कर्मचाऱ्यांनी प्रतिकार करण्याचा प्रयत्न केला असता त्यांना मारहाण करण्यात आली. अचानक घडलेल्या या प्रकारामुळे बँकेत उपस्थित सर्वजण घाबरून गेले. त्यानंतर आरोपींनी कर्मचाऱ्यांना एका खोलीत कोंडून तिजोरीच्या चाव्या ताब्यात घेतल्या.
तिजोरी उघडल्यानंतर दरोडेखोरांनी सुमारे 4 किलो सोने आणि सुमारे 5 लाख रुपयांची रोकड लुटली. प्राथमिक माहितीनुसार, या सोन्याची किंमत 6 ते 7 कोटी रुपयांच्या घरात असल्याचा अंदाज आहे. हा सर्व प्रकार अत्यंत वेगाने पार पडला आणि अवघ्या 15 मिनिटांत आरोपींनी आपलं काम पूर्ण केलं.
दरोडा टाकल्यानंतर आरोपींनी पळ काढताना बँकेला बाहेरून कुलूप लावले, त्यामुळे काही काळ कर्मचारी आणि ग्राहक आतच अडकून पडले. नंतर स्थानिकांच्या मदतीने दरवाजा उघडण्यात आला. या घटनेची माहिती मिळताच पोलिसांनी घटनास्थळी धाव घेतली आणि परिसरात नाकाबंदी केली.
सीसीटीव्ही फुटेजच्या आधारे आरोपींचा शोध घेण्याचे काम सुरू आहे. पोलिसांनी गुन्हा दाखल केला असून तपास वेगाने सुरू आहे. मात्र, अद्यापही आरोपी फरार असून त्यांचा शोध सुरू आहे. या घटनेमुळे बँकांच्या सुरक्षा व्यवस्थेवर प्रश्नचिन्ह उपस्थित झाले आहे.
दिवसाढवळ्या एवढ्या मोठ्या प्रमाणात दरोडा टाकला जाणं ही गंभीर बाब मानली जात आहे. स्थानिक नागरिकांमध्येही भीतीचं वातावरण निर्माण झालं आहे. पोलिसांकडून आरोपींना लवकरात लवकर अटक करण्याचे प्रयत्न सुरू असून या प्रकरणाचा उलगडा करण्यासाठी सर्व यंत्रणा कामाला लागल्या आहेत.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.