Nepal Flood: महापुराच्या भीषण संकटात ‘ती’ साडी ठरली जीवनदायिनी; 21 भाविकांच्या सुटकेचा थरार.. मात्र अद्याप..

Nepal Flood Tamil Nadu Pilgrims Saree Rescue: नेपाळ-तिबेट सीमेवर निसर्गाने माजवलेल्या धुमाकुळात तामिळनाडूतील 21 भाविकांनी अक्षरशः मृत्यूच्या दाढेतून सुटका करून घेतली आहे. डोंगराळ भागात ढगफुटीसदृश पाऊस आणि भीषण दरड कोसळल्यानंतर चिखलाने माखलेल्या एका उंच कड्यावर जीव वाचवण्यासाठी हे सर्व ज्येष्ठ नागरिक धडपडत होते. अशा वेळी पूंगोडी नावाच्या एका महिलेने दाखवलेले प्रसंगावधान अन् खाली सोडलेली साडी या भाविकांसाठी साक्षात जीवनदायिनी ठरली. सुखरूप सुटका झालेले हे सर्व 21 भाविक शुक्रवारी रात्री विमानाने चेन्नईत दाखल झाले असून त्यांनी आपली अंगावर काटा आणणारी कहाणी सांगितली.

बस चिखलात अडकली अन् काही मिनिटांतच आला विनाशकारी लोंढा
कुंभकोणम येथील ट्रॅव्हल एजन्सीमार्फत 57 भाविक तीन बसमधून रसुवा मार्गाने प्रवास करत होते. वेलाचेरीचे रहिवासी नावू कबीरदास आणि विजया भुवनेश्वरी यांनी दिलेल्या माहितीनुसार, त्यांची बस दुरुस्तीसाठी काही मिनिटे चिखलात अडकल्यामुळेच मोठा अनर्थ टळला. अचानक बॉम्बस्फोटासारखा मोठा आवाज झाला अन् 70 ते 80 फूट उंचीच्या लाटांसारखा चिखल, खडक आणि पाण्याचा प्रचंड लोंढा वाहून आला. नेपाळी चालकाने तातडीने धोक्याचा इशारा देत सर्वांना वाहनातून उतरवून टेकडीच्या दिशेने धावण्यास सांगितले.

साडी आणि केबल वायरच्या साहाय्याने चढली चढण
निसरड्या चिखलाच्या कड्यावर चढणे या ज्येष्ठ नागरिकांसाठी अत्यंत कठीण होते; 4 फूट वर चढल्यावर 5 फूट खाली घसरण्याची वेळ येत होती. अशा वेळी सर्वात आधी वर पोहोचलेल्या पूंगोडी यांनी स्वतःची साडी खाली सोडली. भाविकांनी एका हातात केबल वायर अन् दुसऱ्या हातात साडीचा पदर घट्ट पकडून एकेकाला वर खेचले. एका वृद्ध महिलेच्या कमरेभोवती साडी बांधून संपूर्ण गटाने त्यांना थेट वर ओढून घेतले. वाटेत चिखलात अडकलेल्या आणखी एका व्यक्तीलाही या गटाने सुखरूप बाहेर काढले.

लष्कराच्या हेलिकॉप्टरने रेस्क्यू; दिल्लीमार्गे भाविक चेन्नईत दाखल
डोंगरावरील सशस्त्र पोलीस तळावर पोहोचल्यानंतर या भाविकांना अन्न-पाणी मिळाले. दुसऱ्या दिवशी काटेरी झुडपे आणि दरीच्या अरुंद काठावरून सुमारे 3 तास पायी चालत हे सर्वजण हेलिकॉप्टर रेस्क्यू पॉइंटपर्यंत पोहोचले. लष्कराच्या हेलिकॉप्टरने त्यांना सुरक्षित स्थळी हलवले अन् नंतर दिल्लीमार्गे चेन्नईला आणण्यात आले. या धावपळीत भाविकांचे पासपोर्ट आणि मौल्यवान कागदपत्रे महापुरात वाहून गेली आहेत.

हेही वाचा – Kailash Mansarovar Pilgrims: 10 मिनिटांचा 'टी ब्रेक' अन् व्हिसाचा उशीर; नेपाळच्या महापुरातून 28 भारतीय मानसरोवर यात्रेकरू कसे वाचले?

अद्याप 90 भाविक बेपत्ता; बचावकार्यासाठी नवी दिल्लीत तळ
तामिळनाडूचे मंत्री ए. राजमोहन यांनी दिलेल्या माहितीनुसार, राज्यातील 400 हून अधिक नागरिकांपैकी 90 भाविकांशी अद्याप संपर्क झालेला नाही. यात ग्यिरॉंग पोर्ट इमिग्रेशन कार्यालयाजवळ अडकलेल्या 49 जणांच्या गटाचाही समावेश आहे. तामिळनाडूचे मुख्यमंत्री जोसेफ विजय यांच्या सूचनेनुसार मंत्री आधव अर्जुन, राजमोहन, के. थेन्नारसू आणि आर. विनोद यांनी बचावकार्याच्या समन्वयासाठी नवी दिल्लीत तळ ठोकला आहे. बेपत्ता भाविकांचा शोध घेण्यासाठी नेपाळ सरकार आणि भारतीय दूतावासाच्या मदतीने प्रयत्न सुरू आहेत.

महापुरात दैवी चमत्कार: 3 दिवस ढिगाऱ्याखाली अडकलेली 6 वर्षांची चिमुरडी जिवंत
नेपाळ-तिबेट सीमाभागातील भयावह आपत्तीत आणखी एका ठिकाणी रसुवा जिल्ह्यातील तिमुरे गावात एक अंगावर काटा आणणारा दैवी चमत्कार समोर आला आहे. बुधवारपासून मातीच्या ढिगाऱ्याखाली गाडली गेलेली एक 6 वर्षीय चिमुरडी सलग 3 दिवस मृत्यूशी झुंज देत होती. शोधमोहीम राबवताना सशस्त्र पोलीस दलाच्या अधिकाऱ्यांना मातीच्या ढिगाऱ्याखालून एका लहान मुलीचा रडण्याचा क्षीण आवाज ऐकू आला. अधिकाऱ्यांनी क्षणाचाही विलंब न लावता तातडीने खोदकाम करून शुक्रवारी तिला जिवंत आणि सुखरूप बाहेर काढले. सुरुवातीला तिच्यावर स्थानिक बॉर्डर आउटपोस्टवर प्राथमिक उपचार करण्यात आले, परंतु खराब हवामानाचा अडथळा पार केल्यानंतर शनिवारी दुपारच्या सुमारास हेलिकॉप्टरने तिला काठमांडूतील रुग्णालयात हलवण्यात आले असून सध्या तज्ज्ञ डॉक्टरांच्या देखरेखीखाली तिच्यावर उपचार सुरू आहेत.

हेही वाचा – Nepal Flood: आईला वाटलं मुलगा महापुरात वाहून गेला… पण 8 वर्षांच्या चिमुकल्याने झाडावर चढून वाचवला जीव