Saina Nehwal Retirement: ‘मी ताण सहन…’ सातत्याने झालेल्या दुखापतीनंतर सायना नेहवालने घेतला मोठा निर्णय; गौरवशाली कारकिर्दीला पूर्णविराम

Saina Nehwal Retirement: भारतीय बॅडमिंटनच्या इतिहासात सुवर्णाक्षरांनी नाव कोरलेल्या ऑलिम्पिक पदकविजेती सायना नेहवालने अखेर स्पर्धात्मक खेळातून निवृत्ती जाहीर केली आहे. गेल्या काही काळापासून ती आंतरराष्ट्रीय स्पर्धांपासून दूर होती, मात्र सोमवारी एका पॉडकास्टमध्ये बोलताना तिने आपल्या निर्णयावर अधिकृत शिक्कामोर्तब केलं. या घोषणेमुळे क्रीडाविश्वात भावना आणि आठवणींचा पूर आला आहे.

सायना नेहवाल ही केवळ एक खेळाडू नव्हे, तर भारतीय महिलांसाठी प्रेरणादायी चेहरा ठरली आहे. हैदराबादच्या छोट्या कोर्टांपासून ते ऑलिम्पिक व्यासपीठापर्यंतचा तिचा प्रवास अनेक चढ-उतारांनी भरलेला होता. मात्र जिद्द, मेहनत आणि आत्मविश्वासाच्या जोरावर तिने जागतिक बॅडमिंटनमध्ये भारताचा झेंडा उंचावला.

निवृत्तीबाबत बोलताना सायनाने सांगितले की, तिला कधीही मोठ्या आवाजात निवृत्ती जाहीर करण्याची गरज वाटली नाही. “मी बराच काळ कोर्टावर नव्हते, त्यामुळे लोकांना आपोआप समजेल असं मला वाटलं. शरीर आता उच्च स्तरावरील खेळाचा ताण सहन करू शकत नाही,” असं तिनं स्पष्टपणे सांगितलं. सततच्या दुखापतींमुळे मानसिक आणि शारीरिक थकवा जाणवत होता, असंही तिनं मान्य केलं.

सायनाच्या कारकिर्दीतील मोठा टर्निंग पॉईंट ठरला तो 2016 चा रिओ ऑलिम्पिक. त्या काळात तिला गुडघ्याची गंभीर दुखापत झाली आणि तिच्या खेळावर त्याचा मोठा परिणाम झाला. तरीही हार न मानता तिने जोरदार पुनरागमन केलं. 2017 च्या जागतिक अजिंक्यपद स्पर्धेत कांस्य पदक आणि 2018 च्या कॉमनवेल्थ गेम्समध्ये सुवर्ण पदक पटकावत तिनं आपली लढाऊ वृत्ती पुन्हा सिद्ध केली.

मात्र, वारंवार होणाऱ्या दुखापती आणि दीर्घकाळ चालणारा रिहॅब यामुळे सराव करणेही आव्हानात्मक होत गेलं. गुडघ्याची समस्या पूर्णपणे बरी न झाल्याने तिच्या हालचालींवर मर्यादा येत होत्या. अखेर, स्वतःच्या शरीराचा सन्मान राखत योग्य वेळी थांबण्याचा निर्णय तिनं घेतला.

2012 च्या लंडन ऑलिम्पिकमध्ये कांस्य पदक जिंकत सायनाने इतिहास रचला होता. ऑलिम्पिक पदक जिंकणारी ती भारताची पहिली महिला बॅडमिंटनपटू ठरली. तिच्या या यशामुळे भारतात बॅडमिंटनकडे पाहण्याचा दृष्टिकोनच बदलला. अनेक तरुण खेळाडूंना सायनामुळे प्रेरणा मिळाली.

सायनाने 2023 च्या सिंगापूर ओपनमध्ये आपला शेवटचा आंतरराष्ट्रीय सामना खेळला होता. त्यानंतर ती स्पर्धात्मक बॅडमिंटनपासून दूर राहिली. आज तिच्या निवृत्तीमुळे एक युग संपल्याची भावना क्रीडाप्रेमींमध्ये आहे. मात्र कोर्टावरून निवृत्त होत असली तरी, भारतीय बॅडमिंटनच्या इतिहासात सायना नेहवालचं स्थान कायम अढळ राहील.