DC vs RCB: दिल्ली कॅपिटल्सची नामुष्की! घरच्या मैदानावर अवघ्या 75 धावांत संपूर्ण संघ ऑलआऊट

DC vs RCB: आयपीएल 2026 मधील दिल्ली कॅपिटल्स आणि रॉयल चॅलेंजर्स बंगळुरू यांच्यातील सामन्यात मोठा धक्का बसला आहे. घरच्या मैदानावर खेळणाऱ्या दिल्ली कॅपिटल्सचा डाव अवघ्या 75 धावांत संपुष्टात आला. बंगळुरूच्या वेगवान गोलंदाजांनी सुरुवातीपासूनच आक्रमक मारा करत दिल्लीच्या फलंदाजांना एकामागोमाग एक तंबूत पाठवले. त्यामुळे दिल्लीचा संघ संपूर्ण 20 षटकेही खेळू शकला नाही आणि 16.4 षटकांत सर्वबाद झाला.दिल्लीच्या डावाची सुरुवात अत्यंत खराब झाली. पॉवरप्लेमध्येच संघाने 6 गडी गमावत केवळ 13 धावा केल्या. आयपीएल इतिहासातील पॉवरप्लेमधील हा सर्वात कमी धावसंख्येचा नवा लाजिरवाणा विक्रम ठरला. दिल्लीच्या फलंदाजांना बंगळुरूच्या गोलंदाजांसमोर टिकून राहणेही कठीण झाले होते. विकेटवर थोडी हालचाल आणि वेगवान गोलंदाजीचा अचूक वापर करत आरसीबीने सामना पूर्णपणे आपल्या ताब्यात घेतला.

रॉयल चॅलेंजर्स बंगळुरूकडून जोश हेझलवूडने शानदार गोलंदाजी करत 4 विकेट्स घेतल्या. त्याला भुवनेश्वर कुमारनेही उत्तम साथ देत 3 गडी बाद केले. या दोघांच्या भेदक माऱ्यामुळे दिल्लीच्या फलंदाजीचा कणा पूर्णपणे मोडला. मधल्या फळीतही कोणी मोठी भागीदारी करू शकले नाही. काही फलंदाजांनी प्रतिकार करण्याचा प्रयत्न केला, मात्र तो अपुरा ठरला.दिल्लीचा संघ आयपीएलमधील सर्वात कमी धावसंख्येचा विक्रम टाळण्यात यशस्वी झाला, मात्र 75 धावांवर सर्वबाद होणे हा स्वतःत मोठा धक्का मानला जात आहे. घरच्या मैदानावर अशी कामगिरी झाल्याने चाहत्यांमध्ये निराशा पसरली आहे.

दुसरीकडे, या सामन्यात सर्वांचे लक्ष विराट कोहलीकडे लागले होते. आयपीएल इतिहासात 9000 धावांचा टप्पा गाठणारा पहिला फलंदाज होण्याची संधी विराटसमोर होती. सामन्यापूर्वी त्याला हा विक्रम करण्यासाठी फक्त काही धावांची गरज होती. त्यामुळे दिल्लीने दिलेले छोटे लक्ष्य पाहता विराट कोहली हा विक्रम सहज आपल्या नावे करेल, अशी चाहत्यांची अपेक्षा होती.आरसीबीसाठी हा सामना नेट रनरेट सुधारण्याच्या दृष्टीनेही महत्त्वाचा मानला जात आहे. प्रतिस्पर्धी संघाला 75 धावांत रोखल्यानंतर बंगळुरूला मोठ्या फरकाने विजय मिळवण्याची सुवर्णसंधी आहे. एकीकडे विराटचा विक्रम आणि दुसरीकडे संघाचा मोठा विजय, या दुहेरी आनंदाची वाट आरसीबी चाहते पाहत आहेत.