Election Inspiring Story: वडापावचा गाडा ओढणाऱ्या हातांत आता प्रभागाची धुरा; वाचा नाशिकच्या नगरसेविकेची ‘संघर्षगाथा’
नाशिक: “जिद्द आणि चिकाटी असेल तर परिस्थितीवर मात करून यशाचे शिखर गाठता येते,” याचा जिवंत प्रत्यय नाशिक महानगरपालिकेच्या नुकत्याच झालेल्या निवडणुकांमधून पाहायला मिळाला आहे. नाशिकच्या प्रभाग क्रमांक 8 मधून भारतीय जनता पार्टीच्या तिकिटावर निवडणूक लढवणाऱ्या कविता लोखंडे यांनी एक ऐतिहासिक विजय नोंदवला आहे. केवळ एका जागेचा हा विजय नसून, तो एका सामान्य महिलेने गरिबी आणि संघर्षाविरुद्ध पुकारलेल्या लढ्याचा सन्मान ठरला आहे. या विजयामुळे संपूर्ण नाशिकमध्ये सध्या त्यांच्या संघर्षाचे कौतुक होत आहे.
गेल्या काही वर्षांपासून प्रशासकाच्या ताब्यात असलेल्या नाशिक महानगरपालिकेची रणधुमाळी नुकतीच पार पडली. 15 जानेवारी रोजी मतदान आणि 16 जानेवारी रोजी झालेल्या मतमोजणीत जनतेने आपला स्पष्ट कौल दिला. अनेक बड्या नेत्यांना धूळ चारत, प्रभाग क्रमांक 8 मधील मतदारांनी आपल्यातीलच वाटणाऱ्या एका सामान्य घरातील कर्तबगार महिलेच्या पारड्यात भरघोस मते टाकली. राजकारणात घराणेशाही आणि पैशांचे बळ महत्त्वाचे मानले जात असताना, कविता लोखंडे यांचा विजय लोकशाहीसाठी आशादायी ठरला आहे.
कविता लोखंडे यांचा नगरसेविका होण्यापर्यंतचा प्रवास काट्याकुट्यांनी भरलेला होता. कुटुंबाची आर्थिक ओढाताण थांबवण्यासाठी त्यांनी कधीही कष्ट करायला मागेपुढे पाहिले नाही. कधी वडापावचा गाडा चालवला, तर कधी रस्त्यावर भाजीपाल्याचा स्टॉल लावला. दिवसभर राबूनही संसाराचा गाडा चालवण्यासाठी त्यांनी शिवणकाम केले आणि घरी खानावळही चालवली. हाताला फोड येईपर्यंत कष्ट उपसणाऱ्या या माऊलीच्या जिद्दीला आज नाशिककरांनी मानाचा मुजरा केला आहे.
या यशामागे त्यांच्या पतीच्या सामाजिक कार्याचाही मोठा वाटा आहे. कुटुंबाची उपजीविका करत असतानाच त्यांचे पती सामाजिक कार्यात सदैव अग्रेसर असायचे. पतीच्या याच जनसंपर्काचा आणि कविता यांच्या कष्टाळू स्वभावाचा फायदा त्यांना या निवडणुकीत झाला. भाजपने एका निष्ठावान आणि सामान्य कार्यकर्त्यावर विश्वास दाखवत त्यांना उमेदवारी दिली आणि कविता लोखंडे यांनी त्या विश्वासाचे सोने करून दाखवले. त्यांच्या या विजयाने “सामान्यातला सामान्य माणूसही सत्तेच्या सोपानापर्यंत पोहोचू शकतो” हे सिद्ध झाले आहे.
नाशिक महापालिकेत आता कविता लोखंडे यांच्या रूपाने एक असा आवाज पोहोचला आहे, ज्याला गरिबीची आणि सामान्य नागरिकांच्या प्रश्नांची जाण आहे. प्रभाग 8 मधील रस्ते, पाणी आणि स्वच्छता यांसारख्या मूलभूत प्रश्नांसोबतच महिलांच्या सक्षमीकरणासाठी आपण कटिबद्ध असल्याचे त्यांनी विजयानंतर बोलताना सांगितले. त्यांच्या या विजयाची दखल संपूर्ण जिल्ह्याने घेतली असून, सोशल मीडियावरही त्यांच्यावर अभिनंदनाचा वर्षाव होत आहे.
निश्चितच, कविता लोखंडे यांचा हा प्रवास आगामी काळात अनेक महिलांसाठी आणि सामान्य कार्यकर्त्यांसाठी प्रेरणादायी ठरणार आहे. “कष्टाचे फळ गोड असते” ही म्हण त्यांनी आपल्या कृतीतून सार्थ ठरवली आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.