Marathi-Bhojpuri Conflict: ‘भोजपुरी बोला, तरच जेवण मिळेल’; रेल्वे कॅन्टीनच्या परप्रांतीयाची मुजोरी; VIDEO व्हायरल
Mumbai Marathi-Bhojpuri Language Row: महाराष्ट्रात रिक्षा व टॅक्सी चालकांना मराठी भाषेचा वापर सक्तीचा करण्यात आला असून, भाषेला विरोध करणाऱ्यांवर कारवाई सुरू असतानाच एक संतापजनक प्रकार समोर आला आहे. इंटरनेटवर वेगाने फिरत असलेल्या एका व्हिडिओमध्ये रेल्वे कॅन्टीनमध्ये जेवण मिळवण्यासाठी ग्राहकांनी भोजपुरी भाषेतच बोलले पाहिजे, असा अजब आणि आक्रमक दावा एका तरुणाने केला आहे. या वक्तव्यामुळे स्थानिक मराठी भाषिकांमधून तीव्र आक्षेप आणि संताप व्यक्त केला जात आहे.
'मराठी माणसाला जेवण देऊ नका'; थेट आक्षेपार्ह वक्तव्याने वातावरण तापले
व्हायरल झालेल्या या चित्रफितीत संबंधित तरुण अत्यंत चिथावणीखोरपणे बोलताना दिसतो. जर एखाद्याला मराठी भाषा येत असेल किंवा तो भोजपुरी बोलणार नसेल, तर त्या मराठी माणसाला कॅन्टीनमध्ये खाद्यपदार्थ देऊ नका, असे आवाहन त्याने केले आहे. रेल्वे कॅन्टीनमधील खाद्यपदार्थ आणि महाराष्ट्रातील भाषिक अस्मितेवरून त्याने केलेल्या या विधानांमुळे सोशल मीडियावर वादाची मोठी ठिणगी पडली आहे.
बाळासाहेब ठाकरेंचा उल्लेख करत थेट राजकीय नेत्यांवर प्रश्नचिन्ह
या तरुणाने आपल्या वक्तव्यात केवळ भाषिक टिप्पणीच केली नाही, तर राजकीय नेत्यांनाही लक्ष्य केले आहे. शिवसेनाप्रमुख स्व. बाळासाहेब ठाकरे हे 'हिंदू हृदयसम्राट' होते की 'मराठी सम्राट' असा सवाल त्याने उपस्थित केला आहे. याशिवाय, मनसेप्रमुख राज ठाकरे आणि शिवसेना पक्षप्रमुख उद्धव ठाकरे यांच्या राजकीय भूमिकेवर तसेच निवडणुकांमधील मराठी मुद्द्यांवर भाष्य करत त्याने थेट सवाल केले आहेत.
व्हिडिओच्या सत्यतेची पडताळणी करण्याची मागणी
हा व्हिडिओ नक्की कुठल्या रेल्वे स्थानकावरील कॅन्टीनमधील आहे, तो कधी चित्रित करण्यात आला आणि त्यात दिसणारी व्यक्ती नेमकी कोण आहे, याबाबत अधिकृत माहिती अद्याप निष्पन्न झालेली नाही. तरीही व्हिडिओतील दाव्यांमुळे सार्वजनिक ठिकाणी ग्राहकांशी होणारे गैरवर्तन आणि महाराष्ट्रातील भाषिक हक्क यावर पुन्हा एकदा वाद पेटला असून, या प्रकरणी योग्य पडताळणी करून कारवाई करण्याची मागणी केली जात आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.