SSC Result 2026: महाराष्ट्राच्या लेकींनी पुन्हा मारली बाजी! राज्याचा दहावीचा निकाल 92.9 टक्के; सलग दुसऱ्यांदा कोकणचा डंका, पाहा तुमच्या जिल्ह्याचा निकाल
मुंबई: गेले कित्येक दिवस विद्यार्थ्यांच्या मनात असलेली धाकधूक आणि पालकांचे टेंशन आज गेले आहे. ‘पेराल तसे उगवेल’ या उक्तीप्रमाणे वर्षभराच्या अथक परिश्रमाचे फळ आज विद्यार्थ्यांच्या पदरात पडले असून, महाराष्ट्र राज्य माध्यमिक आणि उच्च माध्यमिक शिक्षण मंडळाने दहावीचा निकाल जाहीर केला आहे. यंदाही निकालाच्या शर्यतीत मुलींनीच ‘गुलालाची उधळण’ करत त्यांचे निर्विवाद वर्चस्व प्रस्थापित केले आहे. दुपारी 1 वाजता हा बहुप्रतिक्षित निकाल ऑनलाईन उपलब्ध होणार असून, राज्याचा एकूण निकाल 92.9 टक्के इतका घवघवीत लागला आहे.
मुलींचीच बाजी; मुलांपेक्षा 5 टक्क्यांनी आघाडीवर
यंदाच्या निकालाचे सर्वात मोठे वैशिष्ट्य म्हणजे विद्यार्थिनींनी पुन्हा एकदा त्यांच्या गुणवत्तेची मोहोर उमटवली आहे. परीक्षेत प्रविष्ट झालेल्या एकूण विद्यार्थिनींपैकी तब्बल 94.96 टक्के मुलींनी यशाला गवसणी घातली आहे. तर, मुलांच्या उत्तीर्णांची टक्केवारी 89.56 टक्के इतकी आहे. म्हणजेच मुलांच्या तुलनेत मुलींच्या उत्तीर्ण होण्याचे प्रमाण 5 टक्क्यांनी अधिक आहे. बोर्डाचे अध्यक्ष त्रिभुवन कुलकर्णी यांनी पत्रकार परिषदेत ही आनंदाची आकडेवारी जाहीर केली. यंदा दहावीची परीक्षा 10 दिवस आधीच आयोजित केल्याने निकालही वेळेआधी लावणे शक्य झाल्याचे त्यांनी नमूद केले. तसेच, विद्यार्थ्यांसाठी नऊ विभागीय मंडळांमध्ये समुपदेशकांची आणि हेल्पलाईनची प्रभावी सुविधाही पुरवण्यात आली होती.
कोकणची परंपरा कायम; 64 पैकी 20 विषयांचा निकाल 100 टक्के!
विभागीय निकालांवर नजर टाकल्यास, कोकण विभागाने आपली ‘सुवर्ण परंपरा’ यंदाही अबाधित ठेवली आहे. सर्वाधिक 97.62 टक्के निकालासह कोकणने राज्यात पहिला क्रमांक पटकावला आहे. तर दुसरीकडे, छत्रपती संभाजीनगर विभागाचा निकाल राज्याच्या तुलनेत सर्वात कमी, म्हणजे 88.41 टक्के इतका लागला आहे. यावर्षी बोर्डाने एकूण 64 विषयांची परीक्षा घेतली होती, त्यापैकी तब्बल 20 विषयांचा निकाल 100 टक्के लागला आहे, ही राज्याच्या शिक्षण व्यवस्थेसाठी अत्यंत भूषणावह आणि कौतुकास्पद बाब आहे.
विभागीय निकालाची आकडेवारी (टक्केवारीत)
राज्यातील इतर विभागीय मंडळांच्या निकालाची आकडेवारी पाहिल्यास विद्यार्थ्यांच्या उत्तम कामगिरीचा आलेख स्पष्ट होतो. कोल्हापूर विभागाने 95.47 टक्के मिळवत उल्लेखनीय यश संपादन केले आहे. मुंबई आणि पुणे विभागाने अनुक्रमे 94.97 टक्के आणि 94.24 टक्के यश मिळवत आपली आघाडी कायम ठेवली आहे. याशिवाय नाशिक (90.53 टक्के), अमरावती (90.50 टक्के), नागपूर (89.07 टक्के) आणि लातूर (88.42टक्के) असा इतर विभागांचा निकाल लागला आहे.
निकाल कसा आणि कुठे पाहायचा?
आज दुपारी 1 वाजल्यापासून विद्यार्थी आणि पालकांना घरबसल्या निकाल पाहता येणार आहे. यासाठी राज्य मंडळाने अनेक अधिकृत वेबसाईट उपलब्ध करून दिल्या आहेत. www.sscresult.mahahsscboard.in, www.mahresult.nic.in, www.results.digilocker.gov.in, www.results.targetpublications.org आणि www.mahahsscboard.in यांसारख्या संकेतस्थळांवर निकाल उपलब्ध असेल. निकाल पाहण्यासाठी वेबसाईटवरील ‘SSC Examination March 2026 Result’ लिंकवर क्लिक करा. तिथे तुमचा दहावीचा ‘सीट नंबर’ आणि आईचे नाव इंग्रजीत टाकून ‘View Result’ या बटणावर क्लिक केल्यास तुमची गुणपत्रिका स्क्रीनवर झळकेल.
एसएमएसद्वारेही (SMS) निकाल पाहण्याची सोय
एकाच वेळी अनेक विद्यार्थी वेबसाईटवर आल्याने सर्व्हर डाऊनची समस्या उद्भवू शकते. इंटरनेटच्या गैरसोयीमुळे निकाल पाहण्यास अडथळा येत असल्यास, चिंतेचे कारण नाही. बोर्डाने एसएमएसद्वारे निकाल पाहण्याची सोपी सोय उपलब्ध करून दिली आहे. तुमच्या मोबाईलच्या मेसेज बॉक्समध्ये जाऊन MHSSC (Space) तुमचा दहावीचा सीट नंबर (Seat Number) टाईप करा आणि हा मेसेज 57766 या क्रमांकावर पाठवा. काही क्षणांतच विषयनिहाय गुणांसह तुमचा निकाल तुमच्या मोबाईलवर प्राप्त होईल. सर्व यशस्वी विद्यार्थ्यांचे या घवघवीत यशाबद्दल हार्दिक अभिनंदन!
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.