उष्णतेचा कहर: नागपुरात बाप्पासाठीही एसी, पुढील 3 दिवस उष्णतेच्या लाटेचा इशारा

नागपूर: शहरात उन्हाची तीव्रता दिवसेंदिवस वाढत असून, हवामान विभागाने पुढील 3 दिवस उष्णतेच्या लाटेचा (Heatwave) इशारा दिला आहे. विदर्भातील इतर भागांप्रमाणेच नागपूरमध्येही तापमान 45 अंश सेल्सिअसपर्यंत जाण्याची शक्यता आहे. त्यामुळे आरोग्याच्या दृष्टीने नागरिकांनी काळजी घेण्याचं आवाहन करण्यात आलं आहे. दुपारच्या वेळेस गरज नसताना घराबाहेर पडणे टाळण्याचा सल्लाही प्रशासनाकडून देण्यात येत आहे.

ही उष्णतेची तीव्रता इतकी वाढली आहे की, आता देवळांमध्येही थंडीची गरज भासू लागली आहे. नागपूरमधील तात्याटोपे नगर येथील प्रसिद्ध गणेश मंदिरात बाप्पासाठी खास एसी बसवण्यात आला आहे. मंदिराच्या गाभाऱ्यात तापमान वाढू नये म्हणून हा निर्णय घेण्यात आला आहे. विशेषतः दुपारच्या वेळी सूर्यप्रखरता वाढते, त्यामुळे मंदिरातील वातावरण गार आणि प्रसन्न ठेवण्यासाठी हे उपाय करण्यात आले आहेत.

हेही वाचा: Maharashtra Weather: हे शहर ठरले जगातील सर्वात उष्ण शहर, एप्रिलमध्येच पारा 45.6 अंश

बाप्पाच्या सेवेसाठी स्थानिक विश्वस्त आणि भक्तांनी मिळून हा उपक्रम हाती घेतला आहे. जसजशी उष्णता वाढते आहे, तसतसे गाभाऱ्यात गरमी जाणवू लागते. भक्तांच्या गर्दीतही उकाडा वाढतो. म्हणून गाभाऱ्यात एसी लावण्याचा निर्णय घेण्यात आला, असं मंदिराच्या प्रमुखांनी सांगितलं.

हवामान विभागाच्या अंदाजानुसार, नागपूरसह विदर्भातील चंद्रपूर, अकोला, अमरावती या भागांमध्येही पुढील काही दिवस तापमान 44 ते 46 अंश सेल्सिअस दरम्यान राहण्याची शक्यता आहे. ही स्थिती हीटवेव्ह मानली जाते. त्यामुळे लहान मुलं, ज्येष्ठ नागरिक आणि शेतकरी वर्गाने विशेष काळजी घेणे गरजेचे आहे.