Amit Shah: ‘…कोणत्याही चर्चेसाठी सरकार तयार’; संसदेतील गदारोळ आणि अनुपस्थितीच्या आरोपांवर अमित शाह म्हणाले..

Amit Shah on NEET Protest Parliament Debate: संसदेचे कामकाज सुरू झाल्यापासून विरोधकांकडून होत असलेल्या गदारोळावर आणि अनुपस्थितीच्या आरोपांवर केंद्रीय गृहमंत्री अमित शाह यांनी प्रथमच आपली सविस्तर भूमिका मांडली आहे. ‘मी नियमितपणे संसदेत उपस्थित राहून माझ्या दालनात बसत आहे, तरीही विरोधकांकडून ‘बेपत्ता’ किंवा ‘पळून गेले’ अशी वक्तव्ये केली जात आहेत,’ असा संताप अमित शाह यांनी व्यक्त केला. नीट (NEET) आंदोलनादरम्यान झालेल्या विद्यार्थी आंदोलनाच्या सर्व पैलूंवर सरकार संसदेत चर्चा करण्यास पूर्णपणे तयार असल्याचे संसदीय कामकाज मंत्री किरेन रिजिजू यांनी आधीच स्पष्ट केले आहे. विरोधकांनी चर्चेसाठी वेळ निश्चित करावी, मी स्वतः सभागृहात बसून प्रत्येक प्रश्नाचे उत्तर देण्यास तयार आहे, असेही शाह यांनी ठामपणे सांगितले.  

दुपारी 3 ते दुसऱ्या दिवशी दुपारी 3 वाजेपर्यंत सलग चर्चेचे आव्हान
गृहमंत्री अमित शाह यांनी विरोधी पक्षांना थेट आव्हान देत सांगितले की, ‘आज दुपारी 3 वाजेपर्यंत अध्यक्षांकडे पत्र द्यावे, आम्ही आज दुपारी 3 ते उद्या दुपारी 3 वाजेपर्यंत सलग 24 तास कोणत्याही स्वरूपाच्या चर्चेसाठी तयार आहोत.’ सरकारकडे लपवण्यासारखे काहीही नसून आवश्यकता भासल्यास प्रश्नोत्तराचा तास (Question Hour) स्थगित करण्यासही सरकार तयार असल्याचे त्यांनी नमूद केले. नियमांनुसार सविस्तर चर्चा व्हावी हीच सरकारची इच्छा असून विरोधकांना खरोखरच सविस्तर चर्चा करायची आहे की फक्त गोंधळ घालायचा आहे, याचा निर्णय देशातील जनतेनेच करावा, असे अमित शाह म्हणाले.  

राहुल गांधींचा जोरदार पलटवार; उपदेश ऐकण्यात रस नसल्याचे वक्तव्य  
अमित शाह यांच्या या वक्तव्यानंतर विरोधी पक्षनेते राहुल गांधी यांनी अत्यंत आक्रमक शब्दांत पलटवार केला आहे. ‘अमित शाह यांनी संसदेत येऊन आम्हाला उपदेश किंवा काल्पनिक भाषण द्यावे, यात विरोधी पक्षाला किंवा देशातील तरुण पिढीला अजिबात रस नाही,’ असे राहुल गांधी यांनी स्पष्ट केले. गेल्या 20 दिवसांपासून गृहमंत्री सभागृहातून गायब असल्याचा आरोप करत राहुल गांधी यांनी, गृहमंत्र्यांकडे संसदेत येऊन विरोधकांचा सामना करण्याची हिंमत उरलेली नाही, अशी खोचक टीका केली.  

हेही वाचा – JPSC Exam Cancellation : झारखंड सरकारचा मोठा निर्णय; विद्यार्थी आंदोलनानंतर JPSC सह ‘या’ प्रमुख परीक्षा रद्द

‘विद्यार्थ्यांवर लाठीचार्ज अन् गोळीबाराचे आदेश कोणी दिले?’ राहुल गांधींचा थेट प्रश्न 
अंदोलन करणाऱ्या विद्यार्थ्यांवर झालेल्या कथित पोलीस कारवाईचा मुद्दा उपस्थित करत राहुल गांधी यांनी अमित शाह यांच्यावर थेट निशाणा साधला. ‘विद्यार्थ्यांवर गोळ्या कोणी चालवल्या आणि खिळे लावलेल्या लाठ्यांनी मारहाण करण्याचे आदेश कोणी दिले? अमित शाह यांनीच आमच्या मुलांवर गोळ्या झाडण्याचे आदेश दिले होते का?’ असा गंभीर सवाल त्यांनी उपस्थित केला. जर हे आदेश गृहमंत्र्यांनी दिले असतील तर त्यांनी नैतिक जबाबदारी स्वीकारून तात्काळ राजीनामा दिला पाहिजे, अशी जोरदार मागणी करत राहुल गांधी यांनी सरकारला धारेवर धरले. 

संसदेतील कोंडी कायम; आरोप-प्रत्यारोपांनी राजकीय वातावरण तापले  
एकीकडे अमित शाह यांनी उद्या दुपारी 3 वाजेपर्यंत सभागृहात बसून विरोधकांच्या सर्व शंकांचे निरसन करण्याची तयारी दर्शवली आहे, तर दुसरीकडे विरोधक गृहमंत्र्यांच्या राजीनाम्यावर आणि थेट स्पष्ट उत्तरावर ठाम आहेत. ‘कोण पळून जात आहे आणि कोणाला चर्चेची भीती वाटत आहे, हे आता जनतेलाच ठरवू द्या,’ असे म्हणत गृहमंत्र्यांनी चेंडू विरोधकांच्या कोर्टात टाकला आहे. दोन्ही बाजूंनी घेतलेल्या या आक्रमक पवित्र्यामुळे संसदेच्या दोन्ही सभागृहांचे कामकाज पुन्हा एकदा ठप्प झाले असून राजकीय वातावरण चांगलेच तापले आहे.

हेही वाचा – PM E-DRIVE योजनेला 2028 पर्यंत मुदतवाढ; पण, इलेक्ट्रिक दुचाकींच्या अनुदानात ‘इतक्या’ रुपयांची कपात