Sanman Dahi Handi 2026: शिक्षकांना समर्पित भव्य ‘सन्मान दहीहंडी 2026’; 11 लाख 11 हजारांचे पारितोषिक अन् सेलिब्रिटींची मांदियाळी

Sanman Dahi Handi 2026 Prize 11 Lakh Rupees: मुंबईच्या उपनगरात यंदाचा दहीहंडी उत्सव एका अनोख्या संकल्पनेसह साजरा केला जाणार आहे. शिवसेना पुरस्कृत आणि स्थानिक नगरसेवक किरण भाऊ लांडगे यांच्या नेतृत्वाखालील 'किरण भाऊ लांडगे मित्र परिवार' तर्फे 'सन्मान दहीहंडी 2026' चे भव्य आयोजन करण्यात आले आहे. समाजात ज्ञानाची गुढी उभारणाऱ्या शिक्षकांप्रती कृतज्ञता व्यक्त करणे आणि त्यांना सलाम करणे हा या उत्सवाचा मुख्य उद्देश आहे. शिक्षकांना समर्पित असणारी ही मुंबई उपनगरातील पहिलीच मानाची दहीहंडी ठरणार असून, यात सहभागी होणाऱ्या गोविंदा पथकांसाठी तब्बल 11 लाख 11 हजार 316 रुपयांचे आकर्षक बक्षीस ठेवण्यात आले आहे.

उपमुख्यमंत्र्यांची प्रमुख उपस्थिती आणि कार्यक्रमाची वेळ
घाटकोपर पश्चिमेतील असल्फा येथील अंधेरी-घाटकोपर लिंक रोडवरील नगरसेवक किरण भाऊ लांडगे यांच्या जनसंपर्क कार्यालयाजवळ हा भव्य सोहळा पार पडणार आहे. हा रंगतदार कार्यक्रम 5 सप्टेंबर 2026 रोजी दुपारी 1 वाजल्यापासून ते रात्री 10 वाजेपर्यंत चालणार आहे. महाराष्ट्राचे उपमुख्यमंत्री एकनाथ शिंदे यांची या कार्यक्रमाला विशेष आणि प्रमुख उपस्थिती लाभणार आहे. उत्सवाचे भव्य स्वरूप पाहता मोठ्या संख्येने नागरिक आणि गोविंदा पथकांनी उपस्थित राहावे, असे आवाहन आयोजक किरण भाऊ लांडगे यांनी केले आहे.

हेही वाचा – Dahihandi 2026: गोविंदांना राज्य सरकारचे 10 लाखांचे 'सुरक्षा कवच'; विम्याचा लाभ कसा घ्यायचा? जाणून घ्या प्रक्रिया

बॉलिवूडसह मराठी सेलिब्रिटींची हजेरी आणि मनोरंजनाचा धमाका
मानवी मनोऱ्यांच्या थरांसोबतच या दहीहंडीत सांस्कृतिक आणि मनोरंजनाची मोठी रेलचेल पाहायला मिळणार आहे. हिंदी आणि मराठी मनोरंजन विश्वातील अनेक प्रसिद्ध कलाकार या सोहळ्याला खास हजेरी लावणार आहेत. यात सुप्रसिद्ध मराठी अभिनेत्री अमृता खानविलकर, बॉलिवूड अभिनेता आफताब शिवदासानी, अभिनेत्री सोनल चौहान, श्वेता त्रिपाठी, आयेशा खान आणि कुबेरा सेट यांच्यासह युवा वर्गात लोकप्रिय असलेला रॅपर संबाता (Sambata) यांच्या स्टार परफॉर्मन्सचा समावेश आहे.

गोविंदा पथकांची गर्दी आणि भव्य आयोजनाची तयारी
ज्ञान, संस्कृती आणि उत्साहाचा संगम असणाऱ्या या 'सन्मान दहीहंडी'मध्ये थर रचण्यासाठी मुंबई आणि ठाण्यातील नामवंत गोविंदा पथके मैदानात उतरणार आहेत. आकर्षक रोख बक्षीस आणि शिक्षकांचा सन्मान करण्याची अनोखी थीम यामुळे ही दहीहंडी यंदा विशेष चर्चेत आली आहे. सुरक्षेच्या सर्व नियमांचे पालन करत असल्फा परिसरात उत्सवासाठी जय्यत तयारी करण्यात आली असून, हजारो प्रेक्षकांच्या उपस्थितीत हा सोहळा पार पडण्याची शक्यता आहे.

हेही वाचा – Ganpati Special Trains: कोकणात जाणाऱ्या चाकरमान्यांसाठी खूशखबर; मध्य रेल्वेच्या 262 विशेष गाड्या; 'असं' असेल वेळापत्रक