Silver Price Today: गुंतवणूकदारांचं लक्ष चांदीकडे! सोन्याला मागे टाकत किंमत 3 लाखांवर, दरवाढीमागे काय कारण?

Silver Price Today: गेल्या काही दिवसांत सराफा बाजारात मोठी हालचाल पाहायला मिळत आहे. सोने आणि चांदी या दोन्ही मौल्यवान धातूंनी उच्चांक गाठत गुंतवणूकदारांमध्ये उत्सुकता निर्माण केली आहे. विशेष म्हणजे यावेळी सोन्यापेक्षा चांदीने अधिक वेगाने उसळी घेतल्याचं चित्र दिसत आहे. काही दिवसांपूर्वी जिथे चांदीचा दर तुलनेने स्थिर होता, तिथून आता तो थेट तीन लाखांच्या पुढे गेला आहे.

चार दिवसांच्या कालावधीत चांदीच्या दरात लक्षणीय वाढ झाली असून प्रतिकिलो दर सुमारे 3 लाख 10 हजार रुपयांपर्यंत पोहोचला आहे. काही आठवड्यांपूर्वीच चांदीचा भाव अडीच ते दोन लाख साठ हजारांच्या आसपास होता. अल्प काळात झालेली ही झेप बाजारासाठी महत्त्वाची मानली जात आहे. दुसरीकडे सोन्याचाही दर वाढीच्या मार्गावर असून प्रति 10 ग्रॅम सोन्याचा भाव 1 लाख 41 हजार 600 रुपयांवर पोहोचला आहे.

तज्ज्ञांच्या मते, जागतिक घडामोडींचा थेट परिणाम सराफा बाजारावर होत आहे. आंतरराष्ट्रीय स्तरावर सुरू असलेली युद्धजन्य परिस्थिती, आर्थिक अस्थिरता आणि चलन बाजारातील चढउतार यामुळे गुंतवणूकदार सुरक्षित पर्यायांकडे वळत आहेत. अशा काळात सोने आणि चांदीला ‘सेफ हेवन’ म्हणून पाहिलं जातं. त्यामुळेच मागणी वाढून दरांमध्ये सातत्याने वाढ होत असल्याचं निरीक्षण नोंदवलं जात आहे.

विशेष बाब म्हणजे गेल्या दोन वर्षांचा विचार केला, तर चांदीच्या दरात तब्बल दीड लाख रुपयांहून अधिक वाढ झाली आहे. पूर्वी चांदीकडे दुय्यम गुंतवणूक म्हणून पाहिलं जात होतं, मात्र आता परिस्थिती बदलत आहे. औद्योगिक वापर, सौरऊर्जा क्षेत्रातील वाढती मागणी आणि गुंतवणूकदारांचा वाढता कल यामुळे चांदीचे दर सोन्याइतकेच महत्त्वाचे ठरत आहेत.

स्थानिक बाजारातही या दरवाढीचा परिणाम दिसून येत आहे. दागिन्यांच्या खरेदीत थोडी मंदी असली, तरी गुंतवणुकीसाठी नाणी, बार आणि डिजिटल माध्यमातून सोनं-चांदी घेण्याकडे ग्राहकांचा ओढा वाढतो आहे. सध्या जाहीर होणारे दर हे जीएसटी व इतर करांशिवायचे असल्याने प्रत्यक्ष खरेदी करताना किंमत आणखी वाढू शकते.

आगामी काळात दर आणखी वाढतील की स्थिरावतील, याबाबत तज्ज्ञांमध्ये वेगवेगळी मतं आहेत. मात्र जागतिक बाजारातील अनिश्चितता कायम राहिल्यास सोनं आणि चांदीचे दर मजबूत राहण्याची शक्यता व्यक्त केली जात आहे. त्यामुळे खरेदी किंवा गुंतवणुकीचा निर्णय घेताना बाजाराची दिशा, स्वतःची आर्थिक गरज आणि दीर्घकालीन उद्दिष्ट लक्षात घेणं आवश्यक असल्याचं जाणकार सांगतात.