Hinjawadi Metro Line 3: पुणेकरांना झटका! हिंजवडी-शिवाजीनगर मेट्रो थेट 2027 पर्यंत रखडणार? मोठी अपडेट समोर

Hinjawadi Metro Line 3: आयटी नगरी हिंजवडी ते शिवाजीनगर दरम्यानच्या 'मेट्रो लाईन 3' च्या प्रवासाची वाट पाहणाऱ्या पुणे आणि पिंपरी-चिंचवडमधील नागरिकांसाठी, विशेषतः आयटी कंपन्यांमधील लाखो कर्मचाऱ्यांसाठी एक निराशाजनक बातमी आहे. या महत्त्वाकांक्षी मेट्रो प्रकल्पाचा वेग मंदावल्यामुळे, नियोजित वेळेत मेट्रो धावणे आता अशक्य मानले जात आहे. प्रवाशांना मेट्रो प्रवासाचा आनंद घेण्यासाठी आता आणखी काही काळ वाट पाहावी लागणार असल्याचे प्रशासकीय घडामोडीवरून स्पष्ट होत आहे. काही दिवसांपूर्वी प्रशासनाने 15 जून रोजी या मार्गावर मेट्रो सेवा सुरू करण्याचे संकेत दिले होते. मात्र, सद्यस्थिती पाहता अनेक स्थानकांवर अद्याप पायाभूत सोयी-सुविधांची कामे अपूर्ण आहेत. तसेच सुरक्षेच्या दृष्टीने आवश्यक असणाऱ्या तांत्रिक चाचण्या (Technical Trials) देखील अद्याप बाकी आहेत. त्यामुळे ठरलेल्या तारखेला ही सेवा सुरू होण्याबाबत आता मोठे प्रश्नचिन्ह निर्माण झाले आहे.

'या' प्रमुख स्थानकांवर कामे अजूनही बाकी
मेट्रो मार्गावरील काही अत्यंत महत्त्वाच्या आणि गर्दीच्या स्थानकांवर अद्याप प्रवाशांसाठी आवश्यक असणाऱ्या पूर्ण सुविधा तयार झालेल्या नाहीत. यामध्ये प्रामुख्याने:

मेगापोलीस सोसायटी
इन्फोसिस (Infosys)
विप्रो (Wipro)
बालेवाडी स्टेडियम

23 किलोमीटरचा प्रवास; आता नवी टाईमलाईन 2027?
हिंजवडी ते शिवाजीनगर दरम्यानचा हा संपूर्ण मेट्रो मार्ग साधारण 23.203 किलोमीटर लांबीचा आहे. पुण्याची डोकेदुखी ठरलेली वाहतूक कोंडी फोडण्यासाठी आणि आयटी पार्क गाठणाऱ्या हजारो कर्मचाऱ्यांचा प्रवास सुकर करण्यासाठी हा प्रकल्प गेमचेंजर मानला जात आहे.

हेही वाचा – Monsoon Update: मुंबईत उकाड्याने हैराण नागरिकांना पावसाचा दिलासा कधी मिळणार? हवामान विभागाचा मोठा अंदाज

प्रतीक्षा वाढली
प्रशासकीय पातळीवरून कामे वेगाने पूर्ण करण्याचे दावे केले जात असले, तरी प्रत्यक्ष जमिनीवरील कामांचा संथ वेग पाहता हा प्रकल्प आता थेट 2027 पर्यंत लांबणीवर पडण्याची शक्यता वर्तवली जात आहे. यामुळे पुणेकरांना वाहतूक कोंडीचा आणि त्रासाचा सामना आणखी काही वर्षे करावा लागणार असल्याचे चित्र आहे.