Pune Crime: पुणे हादरले! नववीतील विद्यार्थिनीवर रोबोटिक्स शिक्षकाकडून लैंगिक अत्याचार; नराधम आरिफ सय्यदला अटक
पुणे: पुणे शहरातून विद्येचे माहेरघर असलेल्या संस्कृतीला आणि गुरु-शिष्याच्या पवित्र नात्याला काळीमा फासणारी एक अत्यंत संतापजनक घटना समोर आली आहे. आंबेगाव पोलीस ठाण्याच्या हद्दीत एका रोबोटिक्स (Robotics) शिकवणाऱ्या शिक्षकाने आपल्याच नववीत शिकणाऱ्या अल्पवयीन विद्यार्थिनीवर लैंगिक अत्याचार केल्याचा धक्कादायक प्रकार उघडकीस आला आहे. या घटनेमुळे पुणे शहर आणि शैक्षणिक वर्तुळात प्रचंड खळबळ उडाली आहे. पीडित मुलीच्या तक्रारीनंतर पोलिसांनी या नराधम शिक्षकाला बेड्या ठोकल्या आहेत.
ऑनलाइन आणि ऑफलाइन वर्गाच्या नावाखाली अत्याचार
मिळालेल्या माहितीनुसार, आरिफ सय्यद असे अटक करण्यात आलेल्या आरोपी शिक्षकाचे नाव आहे. आरोपी आरिफ हा विद्यार्थ्यांना ऑनलाइन आणि ऑफलाइन अशा दोन्ही माध्यमांतून रोबोटिक्सचे प्रशिक्षण देत होता. याच प्रशिक्षणादरम्यान त्याने एका नववीतील विद्यार्थिनीला आपल्या जाळ्यात ओढले आणि तिच्यावर लैंगिक अत्याचार केला. हा गंभीर प्रकार घडल्यानंतर पीडित मुलगी प्रचंड मानसिक धक्क्यात होती. अखेर तिने धैर्याने हा संपूर्ण प्रकार आपल्या कुटुंबीयांना सांगितला.
गुन्हा दाखल होताच आरोपी गजाआड
मुलीसोबत घडलेला हा भयानक प्रकार ऐकून कुटुंबीयांच्या पायाखालची जमीनच सरकली. त्यांनी वेळ न घालवता थेट आंबेगाव पोलीस ठाण्यात धाव घेत आरोपीविरुद्ध रीतसर तक्रार दाखल केली. पोलिसांनी घटनेचे गांभीर्य ओळखून तात्काळ बाल लैंगिक अत्याचार प्रतिबंधक कायदा (पोक्सो – POCSO) आणि भारतीय न्याय संहितेच्या संबंधित कलमांनुसार गुन्हा दाखल केला. गुन्हा दाखल होताच पोलिसांनी वेगाने चक्रे फिरवून आरोपी आरिफ सय्यदला अटक केली असून त्याला न्यायालयासमोर हजर करण्यात आले आहे.
संतप्त कार्यकर्त्यांकडून आरोपीला चोप
या धक्कादायक प्रकरणाची माहिती वाऱ्यासारखी परिसरात पसरताच नागरिकांमध्ये तीव्र संतापाची लाट उसळली. मिळालेल्या माहितीनुसार, या घटनेची माहिती मिळताच काही स्थानिक राजकीय कार्यकर्ते प्रचंड आक्रमक झाले आणि त्यांनी पोलीस ठाण्याच्या परिसरातच आरोपी आरिफ सय्यदला चांगलाच चोप दिला.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.