Monsoon Update: मुंबईत उकाड्याने हैराण नागरिकांना पावसाचा दिलासा कधी मिळणार? हवामान विभागाचा मोठा अंदाज
मुंबई: देशभरात मान्सूनच्या आगमनाची उत्सुकता वाढत असतानाच भारतीय हवामान विभागाने महत्त्वाची माहिती दिली आहे. केरळमध्ये येत्या काही दिवसांत नैऋत्य मोसमी वाऱ्यांचे आगमन होण्याची शक्यता वर्तवण्यात आली असून 26 मेच्या सुमारास मान्सून केरळमध्ये दाखल होऊ शकतो, असा अंदाज व्यक्त करण्यात आला आहे. त्यामुळे आता महाराष्ट्रात आणि विशेषतः मुंबईत मान्सून कधी पोहोचणार, याकडे सर्वांचे लक्ष लागले आहे.
सध्या केरळमधील अनेक भागांमध्ये पावसाने जोर धरला आहे. हवामान विभागाने कन्नूर आणि कासारगोड जिल्ह्यांसाठी ऑरेंज अलर्ट जारी केला असून अनेक जिल्ह्यांना यलो अलर्ट देण्यात आला आहे. विजांच्या कडकडाटासह मुसळधार पाऊस आणि जोरदार वाऱ्यांचा इशाराही देण्यात आला आहे. दक्षिण किनारी आंध्र प्रदेशाजवळ निर्माण झालेल्या चक्रीय प्रणालीमुळे केरळ, कर्नाटक आणि आसपासच्या समुद्री भागांमध्ये हवामानात मोठे बदल होत असल्याचे सांगितले जात आहे.
मुंबईत मात्र अद्याप मान्सूनपूर्व सरींची प्रतीक्षा कायम आहे. वातावरणात आर्द्रतेचे प्रमाण वाढल्याने उकाडा वाढला असून नागरिक हैराण झाले आहेत. हवामान खात्याच्या अंदाजानुसार, शुक्रवारपर्यंत मुंबईत कोरडे वातावरण राहण्याची शक्यता आहे. 20 ते 24 मेदरम्यान मुंबईतील कमाल तापमान 33 अंश सेल्सिअसच्या आसपास राहण्याचा अंदाज आहे.
सोमवारी सांताक्रूझ येथे 34.1 अंश सेल्सिअस, तर कुलाबा येथे 35.1 अंश सेल्सिअस तापमानाची नोंद झाली. कुलाबा भागात तापमान जास्त नोंदले गेले असले तरी सांताक्रूझमध्ये वाऱ्यांचा वेग अधिक असल्याने तेथील उकाडा तुलनेने कमी जाणवत असल्याचे हवामान विभागाने स्पष्ट केले आहे.
राज्यातील इतर भागांत मात्र उन्हाचा तडाखा कायम आहे. विदर्भ, मराठवाडा आणि उत्तर महाराष्ट्रातील अनेक शहरांमध्ये तापमान 40 अंशांच्या पुढे गेले आहे. नाशिकमध्ये जवळपास 40 अंश तापमानाची नोंद झाली असून कोल्हापूरमध्येही उष्णतेचा पारा वाढलेला दिसत आहे. विशेष म्हणजे थंड हवेचे ठिकाण म्हणून ओळखल्या जाणाऱ्या महाबळेश्वरमध्येही तापमानात वाढ झाली आहे.
हवामान विभागाच्या माहितीनुसार, मान्सूनने आग्नेय अरबी समुद्र, अंदमान समुद्र आणि बंगालच्या उपसागरातील काही भागांमध्ये पुढे सरकण्यास सुरुवात केली आहे. पुढील काही दिवसांत मान्सून आणखी सक्रिय होण्याची शक्यता असून त्याचा परिणाम देशातील अनेक राज्यांवर दिसून येणार आहे.
मान्सूनचे आगमन लवकर झाल्यास उकाड्याने त्रस्त झालेल्या नागरिकांना मोठा दिलासा मिळू शकतो. शेतकरी वर्गही पावसाच्या प्रतीक्षेत असून आगामी काही दिवस हवामानाच्या दृष्टीने महत्त्वाचे ठरणार आहेत.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.