Bhajan Singer Viral Video : गायकावर नोटांचा पाऊस! लोकांनी पोती भरभरून उधळले पैसे; व्हिडिओ पाहून बसेल धक्का
Gujarat Bhajan Singer Kaviraj Jignesh Viral Video : नुकताच एक थक्क करणारा प्रकार समोर आला आहे. हा व्हिडिओ एका कार्यक्रमाचा आहे. या कार्यक्रमात प्रसिद्ध भजन गायक कविराज जिग्नेश यांच्यावर उपस्थित श्रोत्यांनी चक्क नोटांचा पाऊस पाडला. सुरुवातीला लोक हाताने नोटा फेकत होते, पण गाण्याचा रंग जसा चढत गेला, तसे लोकांनी चक्क पिशव्या आणि पोती भरभरून आणलेल्या नोटा मंचावर रिकाम्या करायला सुरुवात केली. मंचावर पैशांचा इतका मोठा ढीग साचला की भजन गायक अक्षरशः नोटांच्या ढिगाऱ्याखाली दबून गेले होते. याचा व्हिडिओ सध्या सोशल मीडियावर तुफान व्हायरल होत आहे. गुजरातमधील जुनागढ जिल्ह्यातील खंभालीया येथे ‘डायरो’ या कार्यक्रमाचे आयोजन करण्यात आले होते.
काय आहे हा ‘डायरो’ प्रकार आणि कोण आहेत कविराज जिग्नेश?
गुजरातमध्ये ‘डायरो’ हा एक पारंपरिक लोकसंगीत आणि भजनांचा कार्यक्रम असतो. यामध्ये लोकगीतांच्या आणि भजनांच्या माध्यमातून धार्मिक तसेच सामाजिक संदेश दिले जातात. कविराज जिग्नेश हे या क्षेत्रातील अत्यंत लोकप्रिय आणि प्रसिद्ध भजन गायक आहेत. त्यांच्या भजनांच्या सुरांनी संपूर्ण वातावरणात एक वेगळाच उत्साह निर्माण होतो, ज्याचा प्रत्यय या कार्यक्रमातही आला.
मंचावर साचले नोटांचे डोंगर; आयोजकांनी दिली पैशांची माहिती
कविराज जिग्नेश यांच्या भजनांवर मंत्रमुग्ध होऊन लोक मंचावर आले आणि त्यांनी पोत्यांनी आणलेले पैसे थेट मंचावर ओतण्यास सुरुवात केली. स्वयंसेवक आणि आयोजन समितीचे सदस्य या नोटांचे ढीग बाजूला सारून व्यवस्था लावण्याचा प्रयत्न करत होते, तरीही गायक जिग्नेश आपले सादरीकरण न थांबवता गाण्यात मग्न होते. भजन कार्यक्रमात एवढ्या मोठ्या प्रमाणावर पैसे उधळण्याची ही कदाचित पहिलीच वेळ असावी.
हा व्हिडिओ व्हायरल झाल्यानंतर आयोजकांनी या पैशांबाबत स्पष्टीकरण दिले आहे. हा पैसा कोणत्याही वैयक्तिक फायद्यासाठी किंवा गायकासाठी नसून तो सामाजिक आणि धार्मिक कार्यासाठी वापरला जाणार आहे. प्रामुख्याने ‘अहिर चॅरिटेबल ट्रस्ट’ अंतर्गत गुजरातमध्ये बांधण्यात येत असलेल्या ‘अहिर कन्या छात्रालय’ आणि शैक्षणिक संकुलाच्या उभारणीसाठी या रकमेचा वापर केला जाईल. तसेच भविष्यातील समाजकल्याण आणि धार्मिक कार्यक्रमांसाठीही हा निधी वापरण्यात येईल.
Watch | A singer was nearly buried under a shower of currency notes during a Dayro event in Gujarat. The video is from last night’s performance at a Shrimad Bhagwat Saptah in Khambhaliya, Dwarka district. Organisers announced that after covering the event’s operational expenses,… pic.twitter.com/C3MQY3ht28 — DeshGujarat (@DeshGujarat) May 15, 2026
सोशल मीडियावर संमिश्र प्रतिक्रिया
हा व्हिडिओ इंटरनेटवर आल्यानंतर नेटकऱ्यांमध्ये दोन गट पडले आहेत आणि विविध प्रतिक्रिया उमटत आहेत. काही लोकांच्या मते, ही देवाप्रती असलेली भक्ती आणि श्रद्धा दाखवण्याची लोकांची स्वतःची पद्धत आहे. याउलट, अनेकांनी यावर तीव्र आक्षेप घेत हा पैशांचा निव्वळ अपव्यय आणि दिखावा असल्याचे म्हटले आहे. देशात अजूनही अनेक लोकांना पोटभर अन्न मिळत नसताना, अशा प्रकारे जाहीरपणे लाखो रुपयांची उधळपट्टी करणे कितपत योग्य आहे, असा सवालही काही नेटकऱ्यांनी उपस्थित केला आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.