Vidhan Bhavan: मुंबईत खळबळ! विधान भवन आणि मंत्रालयाला बॉम्बने उडवण्याची धमकी; सुरक्षा यंत्रणा अलर्ट मोडवर

मुंबईतील विधान भवनाला पुन्हा एकदा धमकीचा ई-मेल प्राप्त झाल्याने सुरक्षा यंत्रणांमध्ये खळबळ उडाली आहे. विधान भवनासह मंत्रालय, मेट्रो स्थानके आणि मुंबई स्टॉक एक्सचेंजला लक्ष्य करण्याची धमकी या ई-मेलमध्ये देण्यात आल्याची माहिती समोर आली आहे. या घटनेनंतर पोलिस आणि सुरक्षा यंत्रणा तातडीने सतर्क झाल्या असून संपूर्ण परिसराची कसून तपासणी करण्यात आली. मिळालेल्या माहितीनुसार, शुक्रवारी सकाळी संबंधित धमकीचा ई-मेल प्राप्त झाला. या मेलमध्ये दुपारी विशिष्ट वेळेत स्फोट घडवून आणण्याचा उल्लेख करण्यात आला होता. धमकीचा मजकूर समोर आल्यानंतर पोलिसांनी कोणताही धोका पत्करला नाही आणि तात्काळ उच्चस्तरीय सुरक्षा तपासणी सुरू करण्यात आली.

विशेष म्हणजे, सध्या विधिमंडळाचे अधिवेशन सुरू असताना ही धमकी मिळाल्यामुळे प्रशासनाने अधिक सतर्कता बाळगली. सुट्टीचा दिवस असला तरी सुरक्षा यंत्रणांनी जलदगतीने संपूर्ण विधान भवन परिसर, प्रवेशद्वार, पार्किंग तसेच आसपासच्या परिसराची तपासणी केली. बॉम्ब शोधक आणि नाशक पथक, श्वान पथक तसेच स्थानिक पोलिसांनी संयुक्तपणे ही मोहीम राबवली. सखोल तपासणीनंतर परिसरात कोणतीही संशयास्पद वस्तू आढळून आली नाही. त्यामुळे हा ई-मेल बनावट किंवा हॉक्स असल्याचे प्राथमिक तपासात स्पष्ट झाले आहे. याआधीही विधिमंडळाचे अधिवेशन सुरू असताना अशाच प्रकारचा धमकीचा ई-मेल आला होता. त्यामुळे अशा प्रकारच्या धमक्या देणाऱ्यांचा शोध घेण्यासाठी सायबर पोलिसांकडून तपास सुरू करण्यात आला आहे. ई-मेल कोणत्या आयपी अ‍ॅड्रेसवरून पाठवण्यात आला, याचा माग काढण्याचे काम सुरू आहे.