BMC: फोटो काढा, लोकेशन पाठवा आणि तक्रार नोंदवा! BMC ने तक्रारींसाठी सुरू केला खास WhatsApp चॅटबॉट, जाणून घ्या संपूर्ण माहिती

मुंबई: मुंबईत पावसाळ्याच्या काळात उघडे, तुटलेले किंवा गायब झालेले मॅनहोल नागरिकांसाठी मोठा धोका ठरतात. अनेकदा पावसाच्या पाण्यामुळे मॅनहोल दिसत नसल्याने अपघात होण्याची शक्यता वाढते. या पार्श्वभूमीवर बृहन्मुंबई महानगरपालिकेने (BMC) तक्रार नोंदवण्याची प्रक्रिया अधिक सोपी आणि जलद करण्यासाठी नवी डिजिटल सुविधा उपलब्ध करून दिली आहे.

महानगरपालिकेने मॅनहोलशी संबंधित तक्रारींसाठी स्वतंत्र WhatsApp चॅटबॉट सेवा सुरू केली आहे. नागरिकांना उघडे, तुटलेले किंवा गायब झालेले मॅनहोल कव्हर आढळल्यास 9324500600 या क्रमांकावर WhatsApp संदेश पाठवून तक्रार नोंदवता येणार आहे.

तक्रार कशी नोंदवायची?

नागरिकांनी संबंधित WhatsApp क्रमांकावर संदेश पाठवून संवाद सुरू करायचा आहे. त्यानंतर “तक्रार सबमिट करा” हा पर्याय निवडून घटनास्थळाचे लोकेशन शेअर करावे. तसेच समस्येचे फोटो अपलोड करावेत. तक्रार नोंदवल्यानंतर पुढील पाठपुराव्यासाठी एक तक्रार क्रमांक दिला जाणार आहे.

'माय बीएमसी मार्ग' अ‍ॅपचीही सुविधा

महानगरपालिकेच्या ‘माय बीएमसी मार्ग’ या मोबाईल अ‍ॅपद्वारेही नागरिक तक्रारी नोंदवू शकतात. मोबाईल क्रमांक आणि ओटीपीद्वारे लॉगिन करून ‘नवीन नोंदणी’ पर्याय निवडावा. त्यानंतर तक्रारीचा प्रकार, थोडक्यात माहिती आणि संबंधित ठिकाणाचे फोटो अपलोड करून तक्रार सादर करता येते. अ‍ॅपमधूनही तक्रार क्रमांक मिळतो.

इतर उपलब्ध माध्यमे

मॅनहोलच्या तक्रारींसोबतच खड्डे आणि इतर नागरी समस्यांसाठीही महानगरपालिकेने विविध डिजिटल पर्याय उपलब्ध केले आहेत.

• मुख्य WhatsApp चॅटबॉट: 8999228999

• महानगरपालिकेचे अधिकृत संकेतस्थळ: portal.mcgm.gov.in

• हेल्पलाइन क्रमांक: 1916

या मुख्य WhatsApp चॅटबॉटवर खड्ड्यांसाठी “खड्डा” किंवा “ख” असा संदेश, तर मॅनहोलसाठी “मॅनहोल” किंवा “म” असा संदेश पाठवून तक्रार नोंदवता येते.

BMC चे नागरिकांना आवाहन

महानगरपालिकेने स्पष्ट केले आहे की, उघडे मॅनहोल, तुटलेली गटार झाकणे किंवा इतर धोकादायक नागरी समस्या दिसताच नागरिकांनी तात्काळ माहिती द्यावी. वेळेवर तक्रार नोंदवल्यास संबंधित विभागाला त्वरित कारवाई करणे शक्य होते आणि संभाव्य अपघात टाळता येतात.

पावसाळ्यात मुंबईत रस्त्यांवर पाणी साचण्याच्या घटना वाढतात. अशा वेळी नागरिकांनी सतर्क राहून धोकादायक ठिकाणांची माहिती प्रशासनापर्यंत पोहोचवणे अत्यंत महत्त्वाचे असल्याचे BMC ने म्हटले आहे.