Bank Holiday Update : ग्राहकांनो लक्ष द्या!; सलग चार दिवस बँकांना कुलूप, आजच करा तुमचे व्यवहार पूर्ण

मुंबई: जर तुमचे बँकेचे काही महत्त्वाचे काम प्रलंबित असेल, तर आता उशीर करू नका. जानेवारीच्या शेवटच्या आठवड्यात बँक ग्राहकांना मोठ्या अडचणींचा सामना करावा लागण्याची शक्यता आहे. सलग चार दिवस बँकांचे कामकाज बंद राहण्याचे संकेत मिळत असल्याने, ऐनवेळी धावपळ होण्यापेक्षा 'सावधानता' बाळगणे केव्हाही चांगले. 

बँकांच्या या संभाव्य सुट्ट्यांचे गणित 25 जानेवारीपासून सुरू होत नाही, तर त्याआधीच म्हणजे 24 जानेवारी रोजी महिन्याचा चौथा शनिवार असल्याने बँका बंद असतील. त्यानंतर 25 जानेवारी रोजी रविवारची साप्ताहिक सुट्टी आणि 26 जानेवारी रोजी प्रजासत्ताक दिनाची सार्वजनिक सुट्टी आहे. या तीन दिवसांच्या सुट्ट्यांनंतर 27 जानेवारी रोजी बँक कर्मचारी संपावर जाण्याची शक्यता वर्तवण्यात येत आहे. जर हा संप झाला, तर सलग चार दिवस बँकांचे दरवाजे ग्राहकांसाठी बंद राहतील.

बँक कर्मचारी संघटना अनेक दिवसांपासून 'आठवड्यातून पाच दिवस काम' (5-Day Banking) या मागणीवर ठाम आहेत. युनायटेड फोरम ऑफ बँक युनियन्स या नऊ प्रमुख संघटनांच्या महासंघाने हा मुद्दा लावून धरला आहे. RBI, LIC आणि शेअर बाजार जर पाच दिवस काम करू शकतात, तर बँकांना हा नियम का नाही? असा रोखठोक सवाल कर्मचारी विचारत आहेत. कामाचा वाढता ताण आणि कौटुंबिक जबाबदाऱ्या यांचा ताळमेळ बसवण्यासाठी ही मागणी करण्यात येत आहे.

हेही वाचा: Goa Nightclub Fire Case: लुथरा बंधूंच्या नऊ ठिकाणांवर ED चे छापे; मनी लाँडरिंगचा तपास सुरू

विशेष म्हणजे, पाच दिवसांचा आठवडा केल्यास ग्राहकांची गैरसोय होऊ नये म्हणून कर्मचारी सोमवार ते शुक्रवार दररोज 40 मिनिटे अतिरिक्त काम करण्यास तयार आहेत. मात्र, ही प्रणाली लागू करण्यासाठी रिझर्व्ह बँक ऑफ इंडिया (RBI) यांची अधिकृत परवानगी आवश्यक आहे. जोपर्यंत ठोस निर्णय होत नाही, तोपर्यंत संप पुकारण्याची शक्यता नाकारता येत नाही.

या चार दिवसांच्या कालावधीत चेक क्लिअरन्स, रोख रक्कम भरणे किंवा काढणे आणि प्रत्यक्ष शाखेतील कामांवर मोठा परिणाम होईल. मात्र, तांत्रिक युगात वावरताना ग्राहकांना एक मोठा दिलासा आहे; तो म्हणजे UPI, नेट बँकिंग, मोबाईल बँकिंग आणि ATM सेवा नेहमीप्रमाणे सुरू राहतील. त्यामुळे डिजिटल व्यवहार करणाऱ्यांना फारसा फटका बसणार नाही, परंतु ज्यांची कामे केवळ बँक शाखेशी संबंधित आहेत, त्यांना मात्र मनस्ताप सहन करावा लागू शकतो.

एकूणच, जानेवारीअखेरची ही संभाव्य 'बँक बंदी' सर्वसामान्यांची कोंडी करू शकते. संप आणि सुट्ट्यांची ही मालिका पाहता, ऐनवेळची ओढाताण टाळण्यासाठी आजच आपल्या नजीकच्या बँक शाखेला भेट देऊन आवश्यक कामे पूर्ण करणे फायद्याचे ठरेल.

हेही वाचा: Dr. Sarita Mhaske: 'मी ठाकरेसाहेबांसोबतच, अपहरणाच्या बातम्या…'; ठाकरे गटाच्या नगरसेविका डॉ. सरिता म्हस्के यांनी अखेर खरं काय ते सांगितलं