अहमदाबाद विमान अपघातानंतर एअर इंडियाच्या विमान बुकिंगमध्ये मोठी घट; 15 टक्क्यांनी स्वस्त झाली तिकिटे

नवी दिल्ली: एअर इंडियाच्या बुकिंग आणि तिकिटांच्या दरांबाबत एक मोठी बातमी समोर आली आहे. अलिकडेच झालेल्या बोईंग 787-8 ड्रीमलाइनर अपघातानंतर एअर इंडियाच्या देशांतर्गत आणि आंतरराष्ट्रीय उड्डाणांच्या बुकिंगमध्ये सुमारे 20% घट झाली आहे. त्यामुळे तिकिटांच्या किमतीही 8 ते 15 टक्क्यांनी स्वस्त करण्यात आली आहे. इंडियन असोसिएशन ऑफ टूर ऑपरेटर्स (IATO) चे अध्यक्ष रवी गोसाईं यांनी याबाबत माहिती दिली आहे.

अहमदाबाद अपघातानंतर प्रवाशांमध्ये भीती

लंडनला जाणारे एअर इंडियाचे विमान AI-171 12 जून रोजी अहमदाबादमध्ये कोसळले. या अपघातात विमानातील 242 प्रवाशांपैकी केवळ एक प्रवासी वगळता सर्वांचा मृत्यू झाला. तसेच जमिनीवर सुमारे 29 लोक जखमी झाले. अपघातानंतर प्रवाशांमध्ये भीती आणि अनिश्चितता दिसून आली आहे, ज्यामुळे विशेषतः कॉर्पोरेट क्लायंटनी बुकिंग रद्द करण्यास सुरुवात केली आहे.
 
फ्लाइट बुकिंगमध्ये मोठी घट

IATO चे अध्यक्ष रवी गोसाईं यांनी सांगितले की, या घटनेनंतर लगेचच आंतरराष्ट्रीय उड्डाणांच्या बुकिंगमध्ये सुमारे 18-22% आणि देशांतर्गत उड्डाणांमध्ये 10-12% घट झाली. हा परिणाम जास्त काळ टिकणार नाही. कारण, प्रवासी पुन्हा विमान प्रवासावर आत्मविश्वास दाखवू लागतील.

हेही वाचा – 11अ नव्हे तर विमानाचा हा भाग आहे सर्वात सुरक्षित! विमान अपघातानंतरही वाचू शकतो जीव

तिकिटांच्या किमती झाल्या कमी – 

इंडिगो आणि अकासा सारख्या कमी किमतीच्या विमान कंपन्यांच्या तुलनेत एअर इंडियाच्या तिकिटांच्या किमती देशांतर्गत उड्डाणांमध्ये 8-12% ने कमी झाल्या आहेत. त्याच वेळी, युरोप आणि आग्नेय आशिया सारख्या आंतरराष्ट्रीय मार्गांवरील तिकिटांच्या किमती 10-15% ने कमी झाल्या आहेत. कमी मागणी आणि प्रमोशनल ऑफर्समुळे या किमती कमी झाल्या आहेत. 

हेही वाचा – अहमदाबाद विमान अपघातानंतर सरकारने उचलले मोठे पाऊल! हवाई अपघात रोखण्यासाठी आता करणार 'हे' काम

दरम्यान, गेल्या आठवड्यात कॉर्पोरेट आणि उच्च श्रेणीतील प्रवाशांमध्ये बुकिंग रद्द करण्याचे प्रमाण 15-18% आणि देशांतर्गत प्रवाशांमध्ये 8-10% ने दिसून आले आहे. तथापि, अधिकाऱ्यांनी आणि डीजीसीएने एअर इंडियाच्या सुरक्षा मानकांची पुष्टी केल्यानंतर, परिस्थिती लवकरच सामान्य होईल अशी अपेक्षा आहे.