Manoj Jarange Convoy Accident : मनोज जरांगेंच्या ताफ्याला विट्याजवळ अपघात; 1 कार्यकर्ता जखमी, भव्य स्वागतादरम्यान दुर्घटना

Manoj Jarange Convoy Accident :  मराठा आरक्षणाच्या जनजागृतीसाठी पश्चिम महाराष्ट्र दौऱ्यावर असलेले मनोज जरांगे पाटील यांच्या सांगली जिल्ह्यातील दौऱ्यादरम्यान एक दुर्दैवी घटना घडली. विटा शहराच्या दिशेने ताफा जात असताना आंबेगावाजवळ समर्थकांनी प्रचंड गर्दी केली होती. या गर्दीच्या आणि धावपळीच्या वातावरणात ताफ्यातील 2 ते 3 वाहने आणि एका बसमध्ये एकमेकांना अचानक धडक झाली. सुदैवाने या अपघातात मोठी जिवितहानी टळली असून केवळ एक कार्यकर्ता किरकोळ जखमी झाला आहे. अचानक घडलेल्या या प्रसंगाने परिसरात काही काळ गोंधळाचे वातावरण निर्माण झाले होते, मात्र मोठा अनर्थ टळल्याने उपस्थितांनी सुटकेचा निःश्वास सोडला.

मनोज जरांगे यांचा संवेदनशीलपणा; जखमी कार्यकर्त्याला तातडीने रुग्णालयात हलवले

अपघात घडताच मनोज जरांगे यांनी दाखवलेल्या समयसूचकतेचे आणि संवेदनशीलतेचे कौतुक होत आहे. घटनेचे गांभीर्य ओळखून त्यांनी स्वतः तात्काळ पुढाकार घेतला आणि जखमी कार्यकर्त्याला वैद्यकीय मदतीसाठी उपचारा दाखल केले. प्राथमिक उपचारानंतर संबंधित सहकाऱ्याला पुढील योग्य उपचारासाठी जवळच्या खाजगी रुग्णालयात हलवण्यात आले आहे. जरांगे यांनी वैद्यकीय टीमला आवश्यक त्या सर्व सूचना दिल्या असून कार्यकर्त्याच्या आरोग्याची विचारपूस केली आहे. या तत्परतेमुळे कार्यकर्त्यांमध्ये सुरक्षेची भावना निर्माण झाली असून वैद्यकीय टीमच्या माहितीनुसार जखमीची प्रकृती स्थिर आहे.

हेही वाचा – Pune: पुणेकरांनो, आज घराबाहेर पडताना सावधान! तिरंगा रॅलीमुळे फर्ग्युसन रोडसह ‘या’ मार्गांवर वाहतूक बंद, जाणून घ्या पर्यायी मार्ग

30 जेसीबीतून पुष्पवृष्टी आणि ढोल-ताशांचा गजर

पश्चिम महाराष्ट्रातील दौऱ्याचा शेवटचा टप्पा म्हणून सांगलीतील विटा येथे मनोज जरांगे यांचे अत्यंत भव्य आणि दणकेबाज स्वागत करण्यात आले. या स्वागतासाठी स्थानिक समर्थकांनी मोठी तयारी केली होती. तब्बल 30 जेसीबी गाड्यांच्या माध्यमातून जरांगे यांच्यावर गुलाबाच्या पाकळ्यांची अभूतपूर्व पुष्पवृष्टी करण्यात आली. यासोबतच ढोल-ताशा आणि झांज पथकांच्या गजराने संपूर्ण विटा शहर दुमदुमून गेले होते. हजारो समर्थकांच्या उपस्थितीमुळे रस्त्यांवर अथांग जनसागर उसळला होता. अपघाताचे छोटे संकट वगळता, मनोज जरांगे यांच्या या सांगली दौऱ्याचा समारोप अत्यंत उत्साही आणि ऐतिहासिक वातावरणात पार पडला.