Thailand Visa Rules: थायलंडला फिरायला जायचा विचार आहे? व्हिसाच्या नियमात मोठा बदल; भारतीयांना मोठ्या मुक्कामासाठी…

Thailand Visa Rules: थायलंडला भेट देणाऱ्या भारतीय पर्यटकांसाठी एक अत्यंत महत्त्वाची बातमी समोर आली आहे. थायलंड सरकारने भारतीयांसह 60 देश आणि प्रदेशांतील नागरिकांसाठी असलेल्या व्हिसामुक्त (Visa-Free) मुक्कामाच्या कालावधीत कपात केली आहे. नवीन नियमांनुसार, आता भारतीय पासपोर्टधारकांना व्हिसाशिवाय थायलंडमध्ये जास्तीत जास्त 30 दिवसच राहता येणार आहे. यापूर्वी भारतीय पर्यटकांना व्हिसाशिवाय 60 दिवस राहण्याची परवानगी देण्यात आली होती. थायलंडच्या गृह मंत्रालयाने 31 ऑगस्ट रोजी या संदर्भातील नवीन अधिसूचना आपल्या रॉयल गॅझेटमध्ये प्रसिद्ध केली आहे.

जुलै 2024 मध्ये सुरू झालेल्या 60 दिवसांच्या सुविधेला कात्री
थायलंड सरकारने पर्यटन क्षेत्राला चालना देण्यासाठी जुलै 2024 मध्ये व्हिसामुक्त प्रवेश योजनेचा विस्तार केला होता. त्या वेळी भारतासह 93 देश आणि प्रदेशांतील पर्यटकांना 60 दिवसांपर्यंत व्हिसाशिवाय राहण्याची सवलत देण्यात आली होती. या कालावधीत पर्यटनासोबतच काही व्यावसायिक आणि तातडीच्या कामांना परवानगी होती. मात्र, काही परदेशी नागरिकांकडून या दीर्घकालीन व्हिसामुक्त सुविधेचा गैरवापर केला जात असल्याच्या तक्रारी समोर आल्यानंतर, देशाची राष्ट्रीय सुरक्षा, आर्थिक हितसंबंध आणि परस्पर व्हिसा करारांचा विचार करून थायलंडच्या मंत्रिमंडळाने मुक्कामाची मर्यादा कमी करण्याचा निर्णय घेतला.

हेही वाचा – Iran America War : इराण अमेरिका युद्धाची सर्वसामान्यांना छळ; सिरिकमधील लग्नसमारंभावर बॉम्बहल्ला, पाच जण ठार तर 63 जण जखमी

30 दिवसांहून अधिक कालावधीच्या मुक्कामासाठी ई-व्हिसा अनिवार्य
भारतीय पर्यटकांना थायलंडला जाण्यासाठी प्रवासापूर्वी व्हिसा काढण्याची गरज नसली, तरी तिथे पोहोचल्यानंतर 30 दिवसांपेक्षा जास्त काळ राहायचे असल्यास नियमांचे पालन करावे लागणार आहे. जर एखाद्या पर्यटकाला 30 दिवसांपेक्षा जास्त काळ थायलंडमध्ये मुक्काम करायचा असेल, तर त्याला प्रवासापूर्वीच योग्य त्या वर्गवारीतील थायलंड ई-व्हिसा (E-Visa) साठी रीतसर अर्ज करावा लागेल, अशी माहिती नवी दिल्लीतील थायलंड दूतावासाकडून स्पष्ट करण्यात आली आहे.

भारतीय पर्यटकांवर नियमांचा परिणाम आणि प्रवासाचे नियोजन
थायलंड हे भारतीय पर्यटकांसाठी अत्यंत लोकप्रिय पर्यटन स्थळ आहे. नव्या नियमांमुळे ज्यांचा मुक्काम 30 दिवसांपेक्षा कमी आहे, अशा सामान्य पर्यटकांना कोणताही फरक पडणार नाही; कारण त्यांना पूर्व-व्हिसाशिवाय प्रवेश सुरूच राहील. मात्र, दीर्घ सुट्टी किंवा कामाच्या निमित्ताने राहणाऱ्या प्रवाशांना आता प्रवासाचे नियोजन अधिक काटेकोरपणे करावे लागणार आहे. नियम कडक झाल्यामुळे सीमा सुरक्षा यंत्रणा आणि स्थलांतर विभागाची देखरेख अधिक तीव्र होणार आहे.

हेही वाचा – Nepal Flood: नेपाळमध्ये पुराचा हाहाकार! एकाच घरात सापडले तब्बल 23 मृतदेह; आईच्या कुशीत लेकीने सोडले प्राण