RAC Waiting: रेल्वे प्रवाशांसाठी खूशखबर; आरएसी आणि वेटिंग लिस्टवरील प्रवाशांना आता आपोआप मिळणार रिकामी बर्थ

RAC Waiting List: रेल्वे प्रवासादरम्यान अचानक सीट रिकामी झाल्यास ती मिळवण्यासाठी आता प्रवाशांना टीटीईच्या मागे पळावे लागणार नाही. भारतीय रेल्वे लवकरच एक आधुनिक डिजिटल यंत्रणा सुरू करणार आहे. या नव्या तंत्रज्ञानामुळे ट्रेनमधील अनुपस्थित प्रवाशांमुळे रिकाम्या झालेल्या बर्थची माहिती थेट रेल्वेच्या मुख्य सिस्टीमपर्यंत पोहोचणार आहे. त्यानंतर नियमांनुसार ही रिकामी सीट आरएसी किंवा वेटिंग लिस्टमध्ये असलेल्या प्रवाशांना आपोआप वाटप केली जाईल. या पारदर्शक प्रक्रियेमुळे सीट मिळवताना होणारा त्रास पूर्णपणे टप्प्याटप्प्याने कमी होणार आहे.

मोबाईलवरच मिळणार रिकाम्या बर्थची माहिती
या नव्या प्रणालीमुळे प्रवाशांना गाडीतील रिकाम्या बर्थची अचूक माहिती रियल टाईममध्ये मिळणार आहे. प्रवासी आता IRCTC ॲप किंवा रेल मदत प्रणालीच्या माध्यमातून कोणत्या डब्यात आणि कोणत्या स्थानकावरून किती जागा रिकाम्या आहेत हे पाहू शकतील. क्रमानुसार पात्र असणाऱ्या प्रवाशाला सीट मिळताच त्याच्या मोबाईलवर तात्काळ संदेश पाठवला जाईल. जर टीटीईने प्रणालीमध्ये रिकाम्या बर्थची नोंद केली नाही, तर प्रवाशांना 139 या क्रमांकावर किंवा रेल मदत ॲपद्वारे तक्रार नोंदवण्याची सोय उपलब्ध करून दिली जाणार आहे.

डिसेंबर 2026 पासून मुंबई विभागातून होणार ट्रायल
या योजनेची पहिली चाचणी मुंबई सेंट्रल विभागातील काही निवडक गाड्यांमध्ये घेण्याचे रेल्वेने नियोजित केले आहे. या मोहिमेअंतर्गत डिसेंबर 2026 पर्यंत काही टीटीई कर्मचाऱ्यांना स्मार्ट जॅकेट, जीपीएस आणि कॅमेऱ्यांसह सुसज्ज केले जाईल. या चाचणीचे निष्कर्ष सकारात्मक आल्यास एप्रिल 2027 पासून देशातील सर्व 17 रेल्वे झोनमध्ये ही यंत्रणा लागू करण्यात येईल. प्रवाशांचा वेळ वाचण्यासोबतच रेल्वेच्या प्रवासात अधिक पारदर्शकता आणि सुलभता निर्माण होणार आहे. तसेच, यामुळे रिकाम्या बर्थच्या गैरवापराबाबत प्रवाशांकडून येणाऱ्या तक्रारींचे प्रमाण यामुळे लक्षणीयरीत्या कमी होण्यास मदत होईल.

हेही वाचा – Loan Default Recovery: वाहन कर्जाचे हप्ते थकल्यास वसुलीसाठी बळजबरी आणि चोरीचा मार्ग बेकायदेशीर! बँक, फायनान्स कंपन्यांना सर्वोच्च न्यायालयाचे कडक आदेश

स्मार्ट जॅकेट आणि HHT उपकरणांची प्रमुख वैशिष्ट्ये
रेल्वे प्रशासनाच्या अंदाजानुसार ही संपूर्ण डिजिटल व्यवस्था लागू झाल्यानंतर तिकीट तपासणीची प्रक्रिया अधिक कार्यक्षम होईल. टीटीई कर्मचाऱ्यांच्या सुरक्षेसाठी आणि तपासणी प्रक्रिया मजबूत करण्यासाठी आधुनिक साधने उपलब्ध करून दिली जाणार आहेत:
– या उपकरणांमध्ये 4G कनेक्टिव्हिटी आणि जीपीएस तंत्रज्ञान असेल, ज्यामुळे सर्वरला रियल टाईम डेटा पाठवता येईल.
– बायोमेट्रिक फिंगरप्रिंट स्कॅनरद्वारे टीटीई कर्मचाऱ्यांची डिजिटल उपस्थिती नोंदवली जाईल.
– उपकरणांना 12 तासांचा बॅटरी बॅकअप दिला जाईल, जेणेकरून लांब पल्ल्याच्या प्रवासात कोणतीही अडचण येणार नाही.
– टीटीईच्या जॅकेटमध्ये बसवलेल्या एचडी कॅमेऱ्याद्वारे ड्युटीदरम्यानच्या घडामोडींचे रेकॉर्डिंग होईल.
– आपत्कालीन परिस्थितीत मदतीसाठी जॅकेटमध्ये एसओएस (SOS) बटण असेल, जे दाबताच जवळच्या कंट्रोल रूमला अलर्ट संदेश जाईल.

या डिजिटल पारदर्शकतेमुळे तक्रारींमध्ये होणार घट होण्याची आशा रेल्वे प्रशासनाला आहे.

हेही वाचा – PMVBRY Scheme: पहिल्यांदा नोकरीला लागला आहात? सरकार देणार 15,000 रुपयांचे प्रोत्साहन; 'प्रधानमंत्री विकसित भारत रोजगार योजना' जाहीर