Video Viral: विमान रद्द होताच आजारी बाळाच्या आईचा आक्रमक अवतार; असहाय्य माता थेट चढली विमानतळावरील लगेज बेल्टवर

IndiGo Flight cancelled Bhubaneswar airport, Mother Climbs Luggage Belt: भुवनेश्वर येथील बीजू पटनायक आंतरराष्ट्रीय विमानतळावर इंडिगो (IndiGo) एयरलाइन्सच्या एका विमानाचा मोठा गोंधळ समोर आला आहे. दुपारी 2:35 वाजता उड्डाण करणारे हे विमान काही तास उशिराने धावत असताना, शेवटी सायंकाळी 5:30 वाजता अचानक रद्द करण्यात आले. तब्बल 3 तास कोणतीही योग्य पूर्वकल्पना न देता उड्डाण रद्द केल्याची घोषणा होताच ताटकळत बसलेल्या प्रवाशांचा संयम सुटला.

आजारी बाळाची अस्वस्थता अन् आईचा मोठा आक्रोश
याच विमानातून आपल्या आजारी मुलाला घेऊन प्रवासासाठी निघालेल्या एका दुःखी आईचा राग विमानतळावर अनावर झाला. तासनतास थांबल्यामुळे मुलाची तब्येत बिघडत होती, ज्यामुळे तीव्र त्रासात असलेल्या या मातेने ग्राउंड स्टाफच्या टेबलवर चढून कागदपत्रे आणि साहित्य अस्ताव्यस्त फेकून दिले. ‘माझे मूल आजारी आहे, तुम्हाला वेळेची काहीच किंमत नाही का?’ असा संताप व्यक्त करत ही महिला थेट लगेज बेल्टवर चढून आरडाओरडा करू लागली. तिथे जमलेल्या इतर प्रवाशांनी तिला पाणी देऊन शांत करण्याचा प्रयत्न केला, परंतु चिंतेत बुडालेल्या आईचा राग शांत होत नव्हता.

Passengers at Bhubaneswar Airport were left stranded after an IndiGo flight scheduled to depart at 2:35 PM was reportedly cancelled at around 5:30 PM, several hours after the scheduled departure time, yesterday. They were not given timely information about the cancellation and,… pic.twitter.com/pGXPT8FOP3 — Srikanth Bhalaji (@SBhalaji94) August 14, 2026

हेही वाचा – Delhi Bomb Threats: स्वातंत्र्यदिनाच्या पूर्वसंध्येला राजधानीत बॉम्बच्या धमक्यांचे सत्र; दिल्ली-NCR मध्ये सर्वत्र हाय अलर्ट

सुरक्षारक्षक सीआयएसएफ (CISF) कडून मध्यस्थी
महिलेचा आक्रमक अवतार आणि विमानतळाच्या साहित्याची होणारी तोडफोड पाहून सुरक्षा यंत्रणा त्वरित धावून आली. विमानतळावरील केंद्रीय औद्योगिक सुरक्षा दलाच्या (CISF) जवानांनी मध्यस्थी करत ‘तुम्ही सार्वजनिक मालमत्तेचे नुकसान करत आहात, त्वरित खाली उतरा’ असे बजावत तिला लगेज बेल्टवरून बाजूला केले. विमानाच्या तांत्रिक बिघाडामुळे ही स्थिती निर्माण झाल्याचे नंतर एयरलाइन्सकडून स्पष्ट करण्यात आले, मात्र अचानक उद्भवलेल्या या प्रकारामुळे तब्बल 65 प्रवाशांची मोठी गैरसोय झाली.

सोशल मीडियावर व्हिडिओ व्हायरल; नेटकऱ्यांच्या दोन गटांत चर्चा
घटनेचा हा व्हिडिओ इंटरनेटवर प्रचंड व्हायरल झाला असून नेटकऱ्यांमध्ये यावर मतप्रवाह दिसून येत आहेत. काही युजर्सच्या मते, आजारी मुलाची काळजी घेणाऱ्या कोणत्याही आईची अशी मानसिक स्थिती होणे स्वाभाविक असून इंडिगोच्या भोंगळ कारभारावर टीका झाली पाहिजे. तर दुसऱ्या वर्गाच्या मते, तांत्रिक बिघाडासाठी ग्राउंड कर्मचाऱ्यांना जबाबदार धरणे आणि विमानतळाची मालमत्ता उद्ध्वस्त करणे पूर्णपणे चुकीचे आहे.

हेही वाचा – Census 2027: तुमच्या बँक खात्यांपासून ते लसीकरणापर्यंत… जनगणनेत विचारले जाणार ‘हे’ 40 महत्त्वाचे प्रश्न