Oracle India Layoffs: IT क्षेत्रात मोठी नोकरकपात; ओरॅकल भारतातून 3,000 कर्मचाऱ्यांना दाखवणार बाहेरचा रस्ता

Oracle India Layoffs: भारताच्या तंत्रज्ञान क्षेत्रातील कर्मचाऱ्यांसाठी पुन्हा एकदा अत्यंत चिंताजनक बातमी समोर आली आहे. जागतिक स्तरावरील आघाडीची IT कंपनी ओरॅकल भारतात सुमारे 3,000 पदे कमी करण्याच्या तयारीत आहे. दुसरीकडे, तंत्रज्ञान क्षेत्रातील दिग्गज मायक्रोसॉफ्ट कंपनीने देखील भारतातील आपल्या 400 ते 500 कर्मचाऱ्यांना 'परफॉर्मन्स इम्प्रूव्हमेंट प्लॅन' (PIP) अंतर्गत ठेवले आहे. कंपन्यांचा वाढता कल आता कृत्रिम बुद्धिमत्ता (AI) आणि क्लाउड कम्प्युटिंगसारख्या नवीन कौशल्यांकडे (skill sets) झुकत असल्याने हा मोठा बदल केला जात आहे. या निर्णयामुळे भारतातील IT कर्मचाऱ्यांमध्ये भीतीचे आणि संभ्रमाचे वातावरण निर्माण झाले आहे.

ओरॅकलच्या एकूण कर्मचारी संख्येत 13 टक्क्यांची घट 

अहवालांनुसार, 31 मे रोजी संपलेल्या आर्थिक वर्षात ओरॅकलच्या जागतिक स्तरावरील एकूण कर्मचारी संख्येत तब्बल 21,000 कर्मचाऱ्यांची घट झाली आहे. म्हणजेच कंपनीच्या मनुष्यबळात सुमारे 13 टक्क्यांची कपात झाली असून, आता एकूण कर्मचारी संख्या 1,41,000 वर आली आहे. आपल्या '2026 पुनर्रचना योजना' अंतर्गत कंपनीने सुमारे 1.8 अब्ज डॉलर्सचा खर्च नोंदवला असून, भविष्यात हा पुनर्रचना खर्च 2.1 अब्ज डॉलर्सपर्यंत वाढण्याचा अंदाज व्यक्त करण्यात आला आहे. IT क्षेत्रातील बदलत्या गरजांशी जुळवून घेण्यासाठी कंपनी आपल्या पारंपरिक मनुष्यबळात कपात करत आहे.

हेही वाचा – Sugar Price: सणासुदीत साखर स्वस्त होणार? साठेबाजीला आळा घालण्यासाठी केंद्राचा मोठा निर्णय

AI डेटा सेंटर्सवरील अफाट खर्च हे नोकरकपातीचे मुख्य कारण 

ओरॅकल समोरील सर्वात मोठे आव्हान म्हणजे AI डेटा सेंटर्स उभारण्यासाठी लागणारी प्रचंड गुंतवणूक हे आहे. 2026 या आर्थिक वर्षात कंपनीचा भांडवली खर्च (capital expenditure) थेट 55.7 अब्ज डॉलर्सवर पोहोचला आहे, जो मागील वर्षी केवळ 21.2 अब्ज डॉलर्स इतका होता. AI क्षमता वाढवण्यासाठी निधी गोळा करण्याच्या उद्देशाने कंपनीने कर्ज बाजारातून 43 अब्ज डॉलर्स उभे केले, तर शेअर्स विक्रीतून 5 अब्ज डॉलर्स मिळवले आहेत. ओरॅकल आणि मायक्रोसॉफ्टची ही पावले हे स्पष्ट करतात की, IT क्षेत्रात केवळ टिकून राहण्यासाठी कर्मचाऱ्यांना AI, क्लाउड कम्प्युटिंग, डेटा सायन्स, सायबर सुरक्षा आणि ऑटोमेशन यांसारख्या आधुनिक तंत्रज्ञानाचे कौशल्य आत्मसात करणे (Upskilling) अत्यंत अनिवार्य झाले आहे.