Nepal Flood: चीन पहिल्यांदाच खरं बोलला! सांगितली गिरोंग इमिग्रेशन सेंटरमधील दुर्घटनेची भयावह वस्तुस्थिती; 31 मृतदेह आणि…

Gyirong Immigration Center Flood Tragedy: नेपाळ आणि चीनच्या सीमेवर असलेल्या गिरोंग परिसरात 26 ऑगस्ट रोजी भीषण दरड कोसळल्याने लेंडे नदीला भयंकर महापूर आला. या लोंढ्याने सीमाभागातील कस्टम आणि इमिग्रेशन इमारतीला जोरदार तडाखा दिला. या प्रकरणी चिनी प्रशासनाने प्रथमच अधिकृत माहिती समोर आणली आहे. इमारतीच्या ढिगाऱ्यातून आतापर्यंत 31 मृतदेह बाहेर काढण्यात यश आले असून, पाण्याच्या भीषण प्रवाहामुळे अजूनही 531 लोक बेपत्ता आहेत. चीनची सरकारी वृत्तसंस्था शिन्हुआनुसार, या दुर्दैवी घटनेच्या वेळी चायनीज आणि नेपाळी नागरिकांसह अनेक आंतरराष्ट्रीय पर्यटक या इमारतीमध्ये उपस्थित होते.  

बेपत्ता नागरिकांचा शोध आणि बचावकार्यातील मोठे अडथळे
आपत्ती व्यवस्थापन आणि बचाव पथके घटनास्थळी अहोरात्र शोधमोहीम राबवत आहेत. शोधकार्यादरम्यान पथकाला 987 वैयक्तिक वस्तू सापडल्या असून त्याद्वारे बेपत्ता लोकांची ओळख पटवण्याचा प्रयत्न सुरू आहे. मात्र, गीरोंग बंदराला जोडणारा 'G-216' महामार्ग अनेक ठिकाणी वाहून गेल्याने मदतकार्यात मोठा अडथळा निर्माण झाला आहे. चिनी अधिकाऱ्यांनी केलेल्या पाहणीत या मार्गावर भविष्यातही दरड कोसळण्याची शक्यता असलेली 58 अतिधोकादायक ठिकाणे आढळली आहेत. वीजपुरवठा पूर्णपणे ठप्प झाल्यामुळे आणि संरचनांचे प्रचंड नुकसान झाल्याने बचाव मोहिमेचा वेग मंदावला आहे. प्रशासनाने धोक्याचा अंदाज घेऊन विस्थापित नागरिकांसाठी 2 तातडीची आपत्कालीन निवारा केंद्रे उभारली आहेत.  

नेपाळमधील महापुराचे रौद्ररूप आणि मृतांचा वाढता आकडा
दुसरीकडे, नेपाळमध्ये या महापुराने अत्यंत भीषण परिस्थिती निर्माण केली आहे. आतापर्यंत 1295 हून अधिक नागरिकांचा या नैसर्गिक आपत्तीत दुर्दैवी मृत्यू झाला असून 5000 पेक्षा जास्त लोक अजूनही बेपत्ता आहेत. अनेक भाग पाण्याखाली गेल्याने मृतांचा आकडा आणखी वाढण्याची तीव्र भीती व्यक्त केली जात आहे. ढिगाऱ्याखाली अडकलेल्या आणि पुरात वाहून गेलेल्या नागरिकांचा शोध घेण्यासाठी बचाव पथके कसोशीने प्रयत्न करत आहेत.

हेही वाचा – US Birthright Citizenship: अमेरिकेत जन्म-आधारित नागरिकत्वाच्या नियमात बदल; परदेशी कर्मचाऱ्यांच्या पाल्यांसाठी नवीन धोरण जाहीर

भारतीय नागरिकांची सुटका आणि भारत सरकारचे मदतकार्य
नेपाळमध्ये अडकलेल्या भारतीय नागरिकांच्या सुरक्षेसाठी भारतीय परराष्ट्र मंत्रालयाने (MEA) वेगाने पावले उचलली आहेत. परराष्ट्र मंत्रालयाचे प्रवक्ते रणधीर जायसवाल यांनी दिलेल्या माहितीनुसार, आतापर्यंत 169 भारतीयांना सुरक्षित बाहेर काढण्यात आले असून, त्यापैकी 3 जणांना रसुवा जिल्ह्यातून गुरुवारी वाचवण्यात आले. सध्या 275 भारतीय नागरिक अजूनही बेपत्ता आहेत, तर 1907 नागरिक तिबेट आणि चीनच्या भागातून सुरक्षितपणे नेपाळमध्ये पोहोचले आहेत. चिनी सूत्रांनुसार तिबेटच्या स्वायत्त क्षेत्रात आता एकही भारतीय नागरिक अडकलेला नाही.

भारताकडून नेपाळला 95 टन मदत साहित्य आणि तज्ज्ञ पथके रवाना
संकटाच्या या काळात भारताने नेपाळला मदतीचा मोठा हात दिला आहे. भारताने आतापर्यंत 7 विमानांद्वारे जवळपास 95 टन अत्यावश्यक मदत साहित्य नेपाळला पाठवले आहे, ज्यामध्ये औषधे, अन्नाची पाकिटे व इतर वस्तूंचा समावेश आहे. याशिवाय, बचाव आणि तांत्रिक मदतीसाठी 54 तज्ज्ञांचे पथक तैनात केले आहे, ज्यामध्ये 30 टनेल रेस्क्यू तज्ज्ञ, 19 फॉरेन्सिक तज्ज्ञ आणि 5 वैद्यकीय अधिकाऱ्यांचा समावेश आहे. नेपाळ सरकारच्या मागणीनुसार भारत लवकरच बेली ब्रिज, फॉरेन्सिक किट्स आणि अतिरिक्त रसद रवाना करणार असून मदतकार्य सातत्याने सुरू ठेवण्याची ग्वाही भारताने दिली आहे.

हेही वाचा – Nepal Flash Flood: नेपाळ महापुरात मोठा चमत्कार! 9 दिवस बोगद्यात अडकले, अखेर दोन जणांची सुखरूप सुटका