Gold Rate Today: सोन्याच्या दरात अचानक वाढ! 10 ग्रॅमसाठी मोजावे लागणार आता इतके पैसे, जाणून घ्या तुमच्या शहरातील दर
नवी दिल्ली: जागतिक राजकारणाच्या सारीपाटावर जेव्हा युद्धाचे ढग दाटून येतात, तेव्हा त्याचे पडसाद सर्वात आधी सोन्याच्या झळाळीवर उमटतात. पश्चिम आशियात (Middle East) पेटलेला युद्धाचा वणवा आता मौल्यवान धातूंच्या किमतींनाही पोळून काढत आहे. एकीकडे आंतरराष्ट्रीय स्तरावर अनिश्चिततेमुळे सोन्याला मागणी वाढत असताना, दुसरीकडे स्थानिक बाजारात नफावसुलीमुळे दरात काहीशी घसरण पाहायला मिळत आहे. सुरक्षित गुंतवणुकीचा पर्याय म्हणून ओळखले जाणारे सोने सध्या चढ-उताराच्या अशा एका चक्रात अडकले आहे, जिथे गुंतवणूकदारांच्या नजरा युद्धाच्या बातम्यांकडे आणि सराफ बाजाराच्या आलेखाकडे लागल्या आहेत.
राजधानी दिल्लीतील सराफ बाजारात शुक्रवारी सलग तिसऱ्या सत्रात सोन्याच्या किमतीत घसरण पाहायला मिळाली. अखिल भारतीय सराफ संघाने दिलेल्या माहितीनुसार, 24 कॅरेट सोन्याच्या दरात प्रति 10 ग्रॅम 200 रुपयांची कपात झाली असून, तो आता 1,55,900 रुपयांवर पोहोचला आहे. गुरुवारी हाच दर 1,56,100 रुपये इतका होता. मात्र, आंतरराष्ट्रीय बाजारातील स्थिती काहीशी वेगळी आहे. जागतिक बाजारपेठेत सोन्याने प्रति औंस 4,708.17 डॉलरचा टप्पा गाठला असून, तेथील किरकोळ वाढ भारतीय बाजारावर दीर्घकाळ परिणाम करू शकते, असे तज्ज्ञांचे मत आहे.
फ्युचर्स मार्केट म्हणजेच मल्टी कमोडिटी एक्सचेंजवर (MCX) मात्र सोन्याच्या भावात 0.07 टक्क्यांची वाढ नोंदवण्यात आली. येथे सोने 100 रुपयांनी वधारून प्रति तोळा 1,52,799 रुपयांवर व्यापार करत आहे. इंडियन बुलियन अँड ज्वेलर्स असोसिएशनच्या आकडेवारीनुसार, शुक्रवारी बाजार बंद होताना सोन्याचा दर 1,51,479 रुपयांवर स्थिरावला होता. महत्त्वाचे म्हणजे, शनिवार आणि रविवारी सराफ बाजार बंद असल्याने, ग्राहकांना पुढील दोन दिवस जुन्याच भावाने सोन्याची खरेदी करावी लागणार आहे.
महाराष्ट्रातील प्रमुख शहरांचा विचार केला असता, मुंबई आणि पुण्यात 24 कॅरेट सोन्याचा दर प्रति तोळा 1,54,050 रुपयांवर आहे. उपराजधानी नागपूर आणि नाशिकमध्ये हा भाव 1,54,080 रुपयांच्या आसपास रेंगाळत आहे. दक्षिण भारतातील चेन्नईमध्ये मात्र दर काहीसे कमी म्हणजेच 1,53,810 रुपये इतके नोंदवले गेले आहेत. या दरांमधील तफावत स्थानिक टॅक्स आणि वाहतूक खर्चामुळे असली, तरी सर्वत्र सोन्याचा भाव दीड लाखांच्या वर राहिल्याने सर्वसामान्यांच्या खिशाला चांगलीच कात्री बसत आहे.
दुसरीकडे, चांदीनेही एकाच दिवसात जीएसटीसह चांदीचा दर 2 लाख 52 हजार ते 2 लाख 55 हजारांच्या दरम्यान प्रति किलोवर स्थिरावला आहे.
एकीकडे महागाईचा भडका आणि दुसरीकडे युद्धाची दाहकता यामुळे सोने-चांदीची बाजारपेठ सध्या 'वेट अँड वॉच'च्या भूमिकेत आहे. जर पश्चिम आशियातील तणाव अधिक वाढला, तर येत्या काळात सोन्याच्या किमती आणखी गगनला भिडण्याची शक्यता नाकारता येत नाही. 'थेंबे थेंबे तळे साचे' या उक्तीप्रमाणे छोट्या गुंतवणुकीवर भर देणाऱ्या ग्राहकांसाठी सध्याची घसरण ही खरेदीची संधी ठरू शकते, मात्र मोठ्या गुंतवणुकीसाठी बाजारातील स्थिरता तपासणे हिताचे ठरेल.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.