Car Drowned after Heavy Rain: मुसळधार पावसाचा कहर; बगलामुखी मंदिराजवळ पुराच्या पाण्यात वाहून गेली कार; 3 बालकांसह 8 भाविकांचा दुर्दैवी मृत्यू

Heavy Rain Drowned Car: मध्य प्रदेशातील आगर-मालवा जिल्ह्यातील प्रसिद्ध नलखेडा येथील माता बगलामुखी मंदिराच्या परिसरात मूसळधार पावसामुळे एक अत्यंत वेदनादायी आणि दुर्दैवी अपघात घडला आहे. काल रात्रभरात झालेल्या मुसळधार पावसामुळे आलेल्या पाण्याच्या प्रचंड वेगवान प्रवाहात भाविकांची कार नाल्याच्या पुलावरून वाहून गेली. या भीषण अपघातात कारमधील 3 बालके, 3 पुरुष आणि 2 महिला अशा एकूण 8 जणांचा जागीच बुडून मृत्यू झाला आहे. लखुंदर नदीच्या तीरावर वसलेल्या या जगप्रसिद्ध धार्मिक स्थळावर घडलेल्या या दुर्घटनेमुळे संपूर्ण परिसरात शोककळा पसरली आहे.

पुलावरून वाहणाऱ्या पाण्याच्या प्रचंड प्रवाहामुळे कार गेली वाहून
नलखेडा आणि परिसरात गेल्या 24 तासांत तब्बल 3.7 इंच इतका मुसळधार पाऊस नोंदवला गेला, ज्याचा सर्वाधिक जोर रात्रीच्या वेळी होता. मुख्य रस्त्यावरून माता बगलामुखी मंदिराकडे जाण्यासाठी भाविकांना एका लहान पुलावरून जावे लागते, ज्याच्या खालून एक मोठा पावसाळी नाला वाहतो. पावसामुळे या नाल्यातील पाण्याची पातळी अचानक वाढून ते पुलावरून वाहू लागले होते. अंधारात पाण्याचा अंदाज न आल्याने आणि पाण्याच्या तीव्र प्रवाहाच्या विळख्यात आल्यामुळे ही कार थेट नाल्यात लोटली गेली आणि वाहून गेली.

हेही वाचा – Bihar Flood Relief Donation: बिहारमधील पूरग्रस्तांच्या मदतीसाठी सरसावले नितीन नवीन; 3 महिन्यांचं वेतन केलं सुपूर्द

रेस्क्यू ऑपरेशन अन् संतप्त ग्रामस्थांची प्रशासनाविरोधात निदर्शने
दुर्घटनेची माहिती मिळताच स्थानिक पोलीस आणि प्रशासकीय पथकाने तातडीने घटनास्थळी धाव घेऊन रेस्क्यू ऑपरेशन सुरू केले. युद्धपातळीवर राबवलेल्या या मदतकार्यात नाल्यातून कार आणि सर्व 8 जणांचे मृतदेह बाहेर काढण्यात आले. दरम्यान, घटनास्थळी पोहोचलेले आगर-मालवा जिल्ह्याचे कलेक्टर आणि पोलीस अधीक्षक (SP) यांना स्थानिक नागरिकांच्या तीव्र रोषाला सामोरे जावे लागले. सुरक्षेच्या पुरेशा उपाययोजना नसल्याचा आरोप करत ग्रामस्थांनी प्रशासनाविरोधात घोषणाबाजी केली.

दर्शनासाठी आलेल्या भाविकांवर काळाचा घाला; पोलिसांकडून चौकशी सुरू
मां बगलामुखी देवीच्या दर्शनासाठी देशभरातून दररोज हजारो भाविक नलखेडा येथे येत असतात. हे मृत भाविकही देवीच्या दर्शनासाठी आले होते. मात्र, मंदिराच्या काही अंतरावरच त्यांच्यावर काळाने घाला घातला. या अपघातानंतर पोलीस प्रशासनाने संपूर्ण घटनेच्या परिस्थितीची आणि अपघाताच्या नेमक्या कारणांची कसून तपासणी सुरू केली आहे. तसेच पावसाळ्यात मंदिराकडे जाणाऱ्या या धोकादायक पुलावर सुरक्षेच्या उपाययोजना वाढवण्याची मागणी जोर धरत आहे.

हेही वाचा – 'Project Cheetah' च्या चार वर्षपूर्तीनंतर मोठी 'गुड न्यूज'; कूनो नॅशनल पार्कमध्ये भारतात जन्मलेल्या मादीने दिला 4 गोंडस शावकांना जन्म