Meta Layoffs: मेटा पुन्हा करणार 16 हजार कर्मचाऱ्यांची कपात? ‘हे’ आहे मुख्य कारण.. मार्क झुकरबर्गने आधीच म्हटले होते..

Meta Layoffs : फेसबुक, इंस्टाग्राम आणि व्हॉट्सॲप यांसारख्या दिग्गज सोशल मीडिया प्लॅटफॉर्मची मूळ कंपनी 'मेटा' (Meta) पुन्हा एकदा मोठ्या कर्मचारी कपातीच्या तयारीत असल्याची चर्चा सुरू आहे. एका आंतरराष्ट्रीय वृत्तसंस्थेने दिलेल्या वृत्तानुसार, अमेरिकन टेक जायंट मेटा आपल्या एकूण कर्मचाऱ्यांपैकी 20 टक्के म्हणजेच सुमारे 16,000 कर्मचाऱ्यांना कामावरून कमी करण्याची शक्यता आहे. कंपनीच्या या संभाव्य निर्णयामुळे जागतिक आयटी क्षेत्रात पुन्हा एकदा चिंतेचे वातावरण निर्माण झाले असून हजारो कर्मचाऱ्यांच्या नोकरीवर टांगती तलवार आहे.

79,000 कर्मचाऱ्यांपैकी 20 टक्के नोकऱ्या जाण्याची भीती
डिसेंबर अखेरपर्यंतच्या आकडेवारीनुसार मेटाकडे सुमारे 79,000 कर्मचारी कार्यरत होते. अंतर्गत चर्चेनुसार, यापैकी 20 टक्के कर्मचाऱ्यांना घरचा रस्ता दाखवला जाऊ शकतो. कंपनीच्या या निर्णयामागे वाढती परिचालन कार्यक्षमता आणि खर्च कपात हे मुख्य उद्देश असल्याचे सांगितले जात आहे. विशेषतः आर्टिफिशियल इंटेलिजन्स (AI) इन्फ्रास्ट्रक्चरवर गुंतवणूक वाढवण्यासाठी कंपनी इतर विभागातील खर्च कमी करण्यावर भर देत आहे. वरिष्ठ अधिकाऱ्यांनी आधीच विभाग प्रमुखांना कार्यक्षमतेचे मूल्यांकन करण्याचे संकेत दिल्याचे समजते.

हेही वाचा – Instagram Privacy Update: आता इंस्टाग्रामवर चॅट राहणार नाही पूर्णपणे प्रायव्हेट? लवकरच बंद होणार महत्त्वाचं प्रायव्हसी फीचर

कंपनीकडून वृत्ताचे खंडन आणि 'अटकळ' असल्याचा दावा
या खळबळजनक वृत्तानंतर मेटाचे प्रवक्ते अँडी स्टोन यांनी आपली अधिकृत प्रतिक्रिया दिली आहे. त्यांनी हे सर्व अहवाल फेटाळून लावले असून याला केवळ 'संभाव्य धोरणांवर आधारित अटकळ' असे म्हटले आहे. कंपनीने अद्याप कर्मचारी कपातीचे प्रमाण किंवा वेळेबाबत कोणताही अंतिम निर्णय घेतलेला नाही, असे स्पष्टीकरण प्रशासनाकडून देण्यात आले आहे. तरीही, टेक क्षेत्रातील सध्याची परिस्थिती पाहता कर्मचाऱ्यांमध्ये भीतीचे वातावरण कायम आहे.

कार्यक्षमता वाढवणे आणि एआयवर लक्ष केंद्रित
मेटाचे संस्थापक मार्क झुकेरबर्ग यांनी यापूर्वीच 'इयर ऑफ एफिशिअन्सी' (Year of Efficiency) जाहीर केले होते. त्यानुसार कंपनी आपली टीम अधिक कार्यक्षम कशी होईल, यावर भर देत आहे. वाढत्या स्पर्धेच्या काळात AI तंत्रज्ञानात आघाडी घेण्यासाठी कंपनीला मोठ्या प्रमाणात निधीची गरज असून, त्यासाठी मनुष्यबळात कपात करून तो निधी वळवण्याचा हा प्रयत्न असू शकतो. कपातीचा हा आकडा प्रत्यक्षात आला, तर ही मेटाच्या इतिहासातील सर्वात मोठ्या कपातींपैकी एक ठरेल.

हेही वाचा – What's App : आता 13 वर्षांखालील मुलांनादेखील वापरता येणार व्हॉट्सॲप; पण पालकांकडे राहणार 'रिमोट कंट्रोल', नवीन फीचर्सची घोषणा