India Tourism: युद्ध पश्चिम आशियात, फटका भारताला; विमान वाहतूक क्षेत्राचे 18000 कोटींचे नुकसान, परदेशी पर्यटकांनी फिरवली पाठ
नवी दिल्ली: पश्चिम आशियातील सुरू असलेल्या युद्धाचा भारताच्या पर्यटन, विमान वाहतूक आणि हॉटेल-रेस्टॉरंट व्यवसायावर मोठा परिणाम झाला आहे. पीएचडी चेंबर ऑफ कॉमर्स अँड इंडस्ट्रीच्या अहवालानुसार, परदेशातून येणाऱ्या पर्यटकांच्या संख्येत 15 ते 20 टक्क्यांची घट झाली आहे. यामुळे विमान वाहतूक क्षेत्राला सुमारे 18,000 कोटी रुपयांचे नुकसान झाल्याचा अंदाज व्यक्त करण्यात आला आहे.
सर्वाधिक फटका विमान कंपन्यांना बसला आहे. अनेक उड्डाणे रद्द करावी लागली, काही हवाई मार्ग बंद झाले आणि आंतरराष्ट्रीय फ्लाइट्सना पर्यायी मार्ग वापरावे लागले. त्यामुळे अनेक उड्डाणांचा वेळ दोन ते चार तासांनी वाढला आहे. विमान कंपन्यांच्या खर्चात इंधनाचा वाटा 35 ते 40 टक्के असल्याने त्यांचा खर्चही मोठ्या प्रमाणात वाढला आहे. परिणामी, विमान तिकिटांचे दरही वाढले आहेत.
पर्यटन क्षेत्रालाही याचा मोठा फटका बसला आहे. जागतिक तणावामुळे विदेशी पर्यटक अधिक सावध झाले आहेत. विशेषतः सुट्टीसाठी भारतात येणाऱ्या पर्यटकांची संख्या कमी झाली आहे. भारतीय पर्यटकही आता दूरच्या देशांऐवजी इतर जवळच्या देशांना अधिक पसंती देत आहेत.
हॉटेल उद्योग अजूनही देशांतर्गत पर्यटनाच्या जोरावर टिकून आहे. हॉटेलमधील खोलींची मागणी काही प्रमाणात कायम असली, तरी वाढलेले वीज, पाणी आणि इतर खर्च यामुळे नफा कमी झाला आहे. परदेशी ग्राहकांवर अवलंबून असलेल्या प्रीमियम आणि व्यावसायिक हॉटेल्सना याचा जास्त फटका बसत आहे.
रेस्टॉरंट व्यवसायावर दुहेरी संकट आले आहे. आयात केलेल्या वस्तू, इंधन, वाहतूक आणि एलपीजीच्या किमती वाढल्याने खर्च 10 ते 15 टक्क्यांनी वाढला आहे. अहवालानुसार, सुमारे 10 टक्के रेस्टॉरंट्स बंद झाली असून दरमहा सुमारे 79,000 कोटी रुपयांचे नुकसान होत आहे. अनेक लहान आणि मध्यम रेस्टॉरंट्सना व्यवसाय टिकवणे कठीण जात आहे.
अहवालात सरकारला काही महत्त्वाच्या सूचना देण्यात आल्या आहेत. त्यामध्ये पर्यायी हवाई मार्ग विकसित करणे, विमान इंधनावरील कर कमी करणे, हॉटेल आणि खाद्यपदार्थ क्षेत्रासाठी सवलती देणे, लघुउद्योगांना स्वस्त कर्ज उपलब्ध करून देणे आणि देशांतर्गत पर्यटनाला अधिक चालना देणे यांचा समावेश आहे. पीएचडीसीसीआयच्या मते, ही परिस्थिती आव्हानात्मक असली तरी भारताला अधिक मजबूत, विविध आणि आत्मनिर्भर पर्यटन व्यवस्था उभारण्याची संधीही आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.