Gold SIlver Rate Today: गुंतवणूकदारांची चांदी, पण सामान्यांची ओढाताण! सोन्याच्या किमतीत पुन्हा वाढ; लग्नसराईत दागिन्यांचे गणित कोलमडणार?

नवी दिल्ली: जागतिक स्तरावर सुरू असलेले युद्धजन्य तणाव आणि भू-राजकीय घडामोडी यांचा थेट परिणाम भारतातील सोन्याच्या किमतींवर होताना दिसत आहे. आंतरराष्ट्रीय बाजारातील अस्थिरता, चलनवाढ, डॉलरचा दर, तसेच ऊर्जा पुरवठ्यातील अडथळे यांसारख्या अनेक घटकांमुळे सोन्याचे दर सतत बदलत आहेत. सुरक्षित गुंतवणुकीचा पर्याय म्हणून ओळखल्या जाणाऱ्या सोन्याकडे गुंतवणूकदारांचा कल वाढत असून, त्यामुळे देशांतर्गत बाजारातही दरांमध्ये चढ-उतार कायम आहेत.

भारतामध्ये आज 28 मार्च 2026  रोजी सोन्याच्या किमतींमध्ये पुन्हा वाढ नोंदवली गेली असून, प्रति 10 ग्रॅम मागे सुमारे 160 रुपयांची वाढ झाली आहे. या वाढीमुळे सोन्याच्या दरांनी पुन्हा एकदा उच्चांक गाठण्याची चिन्हे दिसत आहेत. सध्या 24 कॅरेट सोन्याचा दर 14,472 रुपये प्रति ग्रॅम म्हणजेच 1,44,720 रुपये प्रति 10 ग्रॅम इतका झाला आहे. त्याचबरोबर 22 कॅरेट सोन्याचा दर 13,266 रुपये प्रति ग्रॅम (1,32,660 रुपये प्रति 10 ग्रॅम) असून, 18 कॅरेट सोन्याची किंमत 10,854 रुपये प्रति ग्रॅम (1,08,540 रुपये प्रति 10 ग्रॅम) इतकी आहे.

प्रत्यक्षात ग्राहक जेव्हा दागिने खरेदी करतात, तेव्हा त्यांना या मूळ किमतीपेक्षा अधिक रक्कम मोजावी लागते. कारण दागिन्यांवर तीन टक्के GST लागू होतो, तसेच ज्वेलर्सकडून पाच टक्क्यांपासून 35 टक्क्यांपर्यंत मेकिंग चार्जेस आकारले जातात. त्यामुळे अंतिम बिल हे सोन्याच्या मूळ दरापेक्षा बरेच जास्त असते.

हेही वाचा: March End Financial Tasks: मार्च एंडची डेडलाइन जवळ! 31 मार्चपूर्वी ही कामं पूर्ण करा, नाहीतर बसू शकतो मोठा आर्थिक फटका

शहरनिहाय दर पाहिल्यास, 24 कॅरेट सोन्याच्या दरात चेन्नई आघाडीवर आहे. चेन्नईमध्ये 24 कॅरेट सोन्याचा दर 14,652 रुपये प्रति ग्रॅम इतका असून, इतर प्रमुख शहरांमध्ये दर जवळपास समान पातळीवर आहेत. मुंबई, दिल्ली, कोलकाता, बेंगळुरू, हैदराबाद, केरळ, पुणे, वडोदरा आणि अहमदाबाद या शहरांमध्ये 24 कॅरेट सोन्याचा दर प्रति ग्रॅम साधारण 14,472 ते 14,487 रुपयांच्या दरम्यान आहे.

22 कॅरेट आणि 18 कॅरेट सोन्याच्या दरांमध्येही अशाच प्रकारचे फरक दिसून येतात. उदाहरणार्थ, चेन्नईमध्ये 22 कॅरेट सोनं 13,431 रुपये प्रति ग्रॅम आहे, तर मुंबई, पुणे आणि इतर शहरांमध्ये ते सुमारे 13,266 रुपयांच्या आसपास आहे. 18 कॅरेट सोन्याचा दरही शहरानुसार थोडाफार बदलत असला, तरी तो साधारण 10,854 ते 10,869 रुपयांच्या दरम्यान आहे.

दरम्यान, चांदीच्या किमती देशभरात मोठ्या प्रमाणावर स्थिर दिसत आहेत. बहुतेक शहरांमध्ये चांदीचा दर सुमारे 2,39,900 रुपये प्रति किलो आहे. मात्र चेन्नई, हैदराबाद आणि केरळमध्ये हा दर सुमारे 2,44,900 रुपये प्रति किलोपर्यंत आहे, म्हणजेच इतर शहरांच्या तुलनेत जवळपास 5,000 रुपयांचा फरक दिसतो. या वाढीमागे त्या भागातील सांस्कृतिक आणि औद्योगिक मागणी मोठ्या प्रमाणात असल्याचे मानले जाते.

एकूणच, जागतिक आर्थिक घडामोडी, चलनवाढ आणि भू-राजकीय तणाव यांच्या पार्श्वभूमीवर सोने-चांदीच्या दरांमध्ये चढ-उतार सुरूच आहेत. त्यामुळे गुंतवणूकदार आणि ग्राहकांनी बाजारातील परिस्थिती लक्षात घेऊनच खरेदी-विक्रीचे निर्णय घेणे आवश्यक ठरत आहे.

हेही वाचा: Vidhabhavan Fake Pass: विधानभवनात घुसण्यासाठी लढवली अजब शक्कल; बनावट पास विकून केली हजारोंची वसुली, सात जणांविरुद्ध गुन्हा दाखल