Delhi Bomb Blast : दिल्ली ब्लास्ट प्रकरणातील महत्त्वाचा खुलासा! स्फोट झालेली गाडी कोणाची आणि ती किल्ल्यापर्यंत कशी पोहोचली?

Delhi Bomb Blast: दिल्लीतील लाल किल्ल्याजवळ सोमवारी संध्याकाळी झालेल्या भयंकर कार स्फोटानंतर राजधानीत प्रचंड खळबळ उडाली आहे. या घटनेत 09 जणांचा मृत्यू झाला असून 30 जण जखमी झाले आहेत. तपास यंत्रणा या स्फोटाच्या मुळाशी पोहोचण्यासाठी आता अनेक धागेदोरे जोडत आहेत. स्फोटात वापरलेली सफेद हुंडई i20 कार सध्या तपासाचा केंद्रबिंदू ठरली आहे.

कार कुठून आली, कोणाची होती?

प्राथमिक तपासात समोर आलं आहे की ही कार फरीदाबाद सेक्टर 32 येथील ‘रॉयल कार जोन’ नावाच्या दुकानातून विक्रीस काढण्यात आली होती. तपास अधिकार्‍यांनी दुकानाशी संबंधित लोकांशी चौकशी केली असता अनेक संशयास्पद बाबी उघड झाल्या. दुकानाच्या एका माजी भागीदाराने सांगितले की कार विकणारा व्यक्ती मध्य प्रदेशचा रहिवासी अमित पटेल आहे, जो गेल्या काही वर्षांपासून आपल्या कुटुंबासह फरीदाबादमध्ये राहत होता.

हेही वाचा: Rajnath Singh on Delhi Blast : दिल्ली स्फोटप्रकरणी राजनाथ सिंह यांचे सूचक वक्तव्य!; जलद आणि काटेकोर चौकशी सुरू असल्याची दिली माहिती

धमाक्यानंतर त्याच्याशी संपर्क साधण्याचा प्रयत्न करण्यात आला, परंतु त्याचा फोन स्विच ऑफ आढळला. तपास अधिकार्‍यांनी रॉयल कार जोनच्या कार्यालयात झडती घेतली असता, दारूच्या बाटल्या, ताशाचे पत्ते आणि अस्ताव्यस्त सामान सापडल्याने या ठिकाणी नेमकं काय सुरू होतं, याबाबत नवीन शंका निर्माण झाली आहे.

कारची ओनरशिप अनेकदा बदलली

सर्वात मोठा धक्का म्हणजे या कारची मालकी अनेक वेळा बदलली गेली होती. प्रत्येक व्यवहारात वेगवेगळ्या आयडी आणि नावांचा वापर करण्यात आला होता. काही ओळखपत्रे फर्जी असल्याचं आढळलं असून, ती पुलवामा येथील व्यक्तींशी जोडलेली असल्याची धक्कादायक माहिती समोर आली आहे. त्यामुळे या स्फोटामागे आतंकी कारस्थानाचा कोन अधिक मजबूत होत आहे.

कारचा संपूर्ण ट्रॅक: सकाळपासून संध्याकाळपर्यंत

दिल्ली पोलिसांनी कारच्या हालचालींचा तासागणिक मागोवा घेतला आहे.

• सकाळी 8:04: बादरपूर टोल प्लाझावर कार दिल्लीमध्ये प्रवेश करते.

• 8:20: ओखला औद्योगिक परिसरात इंधन भरलं जातं.

• 3:19: लाल किल्ल्याच्या पार्किंगमध्ये प्रवेश.

• 6:00: पार्किंगमधून कार बाहेर पडते आणि काही तासांनंतर स्फोट होतो.

यानंतर ही कार दरियागंज, कश्मीरी गेट आणि सुनेहरी मशिद परिसरात फिरताना दिसली होती  हेच भाग नंतर स्फोटाच्या ठिकाणाशी जोडले गेले.

हेही वाचा:Delhi Blast Update : NIA करणार दिल्ली बॉम्बस्फोटाचा तपास; गृह मंत्रालयाचा मोठा निर्णय

मालक ते विक्रेता: प्रत्येक दुवा तपासात

कारचा नोंदणीकृत मालक मोहम्मद सलमान हा गुरुग्राम येथून पोलिसांच्या ताब्यात आहे. सलमानने ही कार एका देवेंद्र नावाच्या व्यक्तीला विकल्याचं सांगितलं आहे. देवेंद्रने पुढे ती कार अंबाला येथे दुसऱ्या व्यक्तीस विकली होती. अशा प्रकारे कारचा मागोवा घेताना अनेक संशयास्पद दुवे सापडत आहेत.

राजधानीत हाय अलर्ट

घटनेनंतर NIA, NSG, FSL आणि दिल्ली पोलिस यांचे पथक घटनास्थळी दाखल झाले आहेत. संपूर्ण दिल्लीला हाय अलर्ट घोषित करण्यात आले असून, विमानतळ, रेल्वे स्थानकं आणि सीमांवर सुरक्षा वाढविण्यात आली आहे. तपास यंत्रणांनी या घटनेला ‘अत्यंत नियोजित कटकारस्थान’ मानले असून, लवकरच आरोपींच्या अटकेची शक्यता व्यक्त केली जात आहे.