Shocking News : ऑनलाईन गेमिंगच्या जाळ्यात 3 जीवलग मित्र अन् दुर्दैवी खेळ! दोघांचा मृत्यू, तिसरा देतोय मृत्यूशी झुंज
Punjab 3 Friends Poison Case: पंजाबमधील नवांशहर येथून एका अत्यंत मन सुन्न करणाऱ्या घटनेने परिसर हादरला आहे. कायम एकमेकांसोबत राहणाऱ्या आणि एकत्र वेळ घालवणाऱ्या 3 जीवलग मित्रांनी 10 ऑगस्ट रोजी अचानक विषारी पदार्थ प्राशन केले. या घटनेची माहिती मिळताच उपस्थितांनी त्यांना तातडीने रुग्णालयात दाखल केले. मात्र, उपचारादरम्यान दोघांचा दुर्दैवी मृत्यू झाला असून 15 वर्षांचा तिसरा मुलगा सध्या रुग्णालयात वैद्यकीय उपचारांखाली आहे. सुदैवाने त्याची प्रकृती सध्या स्थिर असल्याचे डॉक्टरांकडून सांगण्यात आले आहे.
ऑनलाईन गेममधील प्रचंड आर्थिक तोटा आणि कुटुंबाची भीती
प्राथमिक तपासात आणि ग्रामस्थांनी दिलेल्या माहितीनुसार, या भीषण निर्णयामागे ऑनलाईन गेमिंगमधील मोठे आर्थिक नुकसान असल्याचे समोर येत आहे. 21 वर्षांचा तरुण दिलप्रीत सिंग हा मोबाईलवर ऑनलाईन गेम खेळायचा आणि या खेळात त्याने मोठी रक्कम गमावली होती. पैसे हारल्यामुळे तो प्रचंड मानसिक तणावाखाली आला होता आणि त्याला कुटुंबाला सामोरे जाण्याची भीती वाटत होती. याच विवंचनेतून तिन्ही मित्रांनी 10 ऑगस्ट रोजी हे टोकाचे पाऊल उचलल्याची चर्चा गावात सुरू आहे.
हेही वाचा – Jalgaon Crime: जामनेरमध्ये हॉटेलमध्ये मध्यरात्री धिंगाणा! कर्मचाऱ्यांना बेदम मारहाण, तिघांना अटक
उपचारादरम्यान दोघांचा मृत्यू
10 ऑगस्ट रोजी प्रकृती खालावल्यानंतर तिघांनाही रुग्णालयात दाखल करण्यात आले होते. तेथे उपचार सुरू असतानाच 13 वर्षांच्या मुलाचा मृत्यू झाला, तर 21 वर्षीय दिलप्रीत सिंगची प्रकृती अत्यंत चिंताजनक होती. डॉक्टरांच्या शर्थीच्या प्रयत्नांनंतरही दुसऱ्या दिवशी म्हणजेच 11 ऑगस्ट रोजी दिलप्रीतने रुग्णालयात अखेरचा श्वास घेतला. या दोन मृत्यूंमुळे संपूर्ण नवांशहर परिसरात आणि मृतांच्या कुटुंबांवर दुःखाचा डोंगर कोसळला आहे.
पोलिसांकडून सखोल तपास सुरू; अनेक प्रश्न अद्याप अनुत्तरित
या दुर्दैवी प्रकरणात स्थानिक पोलिसांकडून विविध कोनांतून सखोल तपास सुरू आहे. गावाचे सरपंच हरदीप सिंग यांच्यासह गावकऱ्यांनी ऑनलाईन गेमिंगचा दावा केला असला, तरी पोलिसांनी तपासाचे चक्रे वेगाने फिरवली आहेत. मुलांवर काही कौटुंबिक दबाव होता का, त्यांनी विषारी पदार्थ एकत्र का खाल्ला आणि त्या दिवशी नेमके काय घडले, या अनुत्तरित प्रश्नांचा शोध पोलीस घेत आहेत. तिसऱ्या 15 वर्षीय मुलाची प्रकृती पूर्णपणे सुधारल्यानंतर त्याचा जबाब नोंदवला जाईल.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.