US Israel Iran War: इराणची ‘कोंडी’ करण्यासाठी ट्रम्प यांचा मोठा डाव; होर्मुज सामुद्रधुनीच्या सुरक्षेसाठी चीन-जपानलाही घातली साद
वॉशिंग्टन: मध्यपूर्वेत वाढत्या तणावाच्या पार्श्वभूमीवर होर्मुज सामुद्रधुनीच्या सुरक्षेचा मुद्दा पुन्हा चर्चेत आला आहे. अमेरिकेचे राष्ट्राध्यक्ष डोनाल्ड ट्रम्प यांनी या महत्त्वाच्या समुद्री मार्गाच्या सुरक्षेसाठी इतर देशांनीही आपल्या नौदलाची जहाजे पाठवावीत, असे आवाहन केले आहे. यापूर्वी त्यांनी अमेरिकन नौदल लवकरच होर्मुज सामुद्रधुनीतून जाणाऱ्या तेलवाहू टँकर्सना सुरक्षा देण्यासाठी एस्कॉर्ट करणार असल्याचेही म्हटले होते.
ट्रम्प यांनी दावा केला की इराणची लष्करी क्षमता मोठ्या प्रमाणावर निष्प्रभ झाली आहे. मात्र त्यांनी हेही मान्य केले की अशा परिस्थितीतही तेहरानकडून या जलमार्गात ड्रोन पाठवणे, बारूदी सापळे टाकणे किंवा क्षेपणास्त्र हल्ला करणे सहज शक्य आहे. त्यामुळे चीन, फ्रान्स, जपान, दक्षिण कोरिया, ब्रिटन आणि इतर प्रभावित देशांनीही या प्रदेशात नौदल पाठवून या समुद्री मार्गाची सुरक्षा सुनिश्चित करावी, असे ट्रम्प यांनी म्हटले.
दरम्यान, ट्रम्प यांच्या या वक्तव्यावर इराणकडून तीव्र प्रतिक्रिया व्यक्त करण्यात आली आहे. इराणचे परराष्ट्रमंत्री सैयद अब्बास अराघची यांनी मध्यपूर्वेतील देशांना परकीय लष्करी दलांना बाहेर काढण्याचे आवाहन केले. त्यांनी सोशल मीडियावर प्रतिक्रिया देताना म्हटले की अमेरिकेने ज्या सुरक्षा व्यवस्थेचा प्रचार केला होता, ती प्रत्यक्षात निष्फळ ठरली आहे आणि त्यामुळे परिस्थिती अधिकच गुंतागुंतीची बनली आहे.
अराघची यांनी पुढे असेही म्हटले की आता अमेरिका होर्मुज सामुद्रधुनी सुरक्षित करण्यासाठी इतर देशांकडे, अगदी चीनकडेही मदत मागत आहे. अशा परिस्थितीत इराण आपल्या शेजारी देशांना परकीय आक्रमक शक्तींना बाहेर काढण्याचे आवाहन करतो, असे त्यांनी स्पष्ट केले. त्यांच्या मते, या प्रदेशातील परकीय सैन्य उपस्थितीमुळे तणाव वाढत आहे.
याच दरम्यान ट्रम्प यांनी शुक्रवारी जाहीर केले की इराणमधील खर्ग आयलंडवरील लष्करी ठिकाणांवर अमेरिकेने हल्ला करून ती पूर्णपणे नष्ट केली आहेत. खर्ग आयलंड येथे इराणच्या तेल निर्यातीसाठी महत्त्वाचे टर्मिनल असल्याचे मानले जाते. त्यांनी इशारा देत सांगितले की जर तेहरानने होर्मुज सामुद्रधुनीतून जहाजांच्या मुक्त वाहतुकीत अडथळा आणणे सुरूच ठेवले, तर इराणच्या तेलाशी संबंधित पायाभूत सुविधांनाही लक्ष्य केले जाऊ शकते.
माध्यमांतील वृत्तांनुसार, इराणने 1 मार्च रोजी होर्मुज सामुद्रधुनी बंद केल्याचा दावा केला आहे. हा समुद्री मार्ग जगातील सर्वात महत्त्वाच्या ऊर्जा मार्गांपैकी एक मानला जातो. साधारणपणे दररोज सुमारे दोन कोटी बॅरल कच्चे तेल या मार्गातून वाहतूक केले जाते, तर जागतिक नैसर्गिक वायू व्यापारातील जवळपास 20 टक्के हिस्सा या मार्गातून जातो. त्यामुळे या मार्गातील कोणतीही अडचण जागतिक ऊर्जा बाजारावर मोठा परिणाम करू शकते.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.