Abhishek Sharma T20I Century: अभिषेक शर्माचा ऐतिहासिक पराक्रम; अवघ्या 30 चेंडूंत शतक ठोकून मोडला रोहित शर्माचा विक्रम

Abhishek Sharma T20I Century: भारत आणि अफगाणिस्तान यांच्यातील तिसऱ्या टी-20 आंतरराष्ट्रीय सामन्यादरम्यान भारतीय युवा सलामीवीर अभिषेक शर्माने क्रिकेटच्या इतिहासात नव्या सुवर्णअक्षरांनी आपले नाव कोरले आहे. दिल्लीच्या अरुण जेटली स्टेडियमवर खेळल्या जात असलेल्या या सामन्यात अभिषेकने अवघ्या 30 चेंडूंत धुवाधार शतक झळकावत रोहित शर्माचा अनेक वर्षांचा विक्रम मोडीत काढला. यापूर्वी भारताकडून टी-20 आंतरराष्ट्रीय सामन्यात सर्वात जलद शतक करण्याचा विक्रम रोहित शर्माच्या नावावर होता, ज्याने 2017 मध्ये श्रीलंकेविरुद्ध इंदूर येथे 35 चेंडूंत शतक केले होते.

अवघ्या 16 चेंडूंत अर्धशतक; 34 चेंडूंत 108 धावांची वादळी खेळी

सामन्यात भारतीय डावाची अत्यंत आक्रमक सुरुवात करत अभिषेकने सुरुवातीला केवळ 16 चेंडूंत आपले अर्धशतक पूर्ण केले. त्यानंतर पुढील अवघ्या 14 चेंडूंत आणखी 50 धावा जोडत त्याने 30 व्या चेंडूवर आपले शतक साजरे केले. अखेरीस तो 34 चेंडूंत 108 धावा करून बाद झाला. त्याच्या या नेत्रदीपक खेळीत 9 चौकार आणि 11 उत्तुंग षटकारांचा समावेश होता. अभिषेकची ही धडाकेबाज कामगिरी एस्टोनियाच्या साहिल चौहान (27 चेंडू) आणि तुर्कीच्या मोहम्मद फहाद (29 चेंडू) यांच्यानंतर टी-20 आंतरराष्ट्रीय क्रिकेटच्या इतिहासातील तिसऱ्या क्रमांकाचे सर्वात जलद शतक ठरले आहे.

हेही वाचा – Asian Games 2026: 2026 आशियाई क्रीडा स्पर्धेत भोंगळ कारभार; भारतीय खेळाडूंना 14-14 तास ताटकळत ठेवलं; राहण्यासह जेवणाची गैरसोय

‘फुल मेंबर’ देशांमध्ये सर्वात जलद शतकाचा जागतिक विक्रम

जागतिक यादीत अभिषेक तिसऱ्या स्थानावर असला, तरी आयसीसीचे (ICC) ‘पूर्ण सदस्य’ दर्जा असलेल्या आंतरराष्ट्रीय संघांमध्ये टी-20 क्रिकेटमधील हे सर्वात जलद शतक ठरले आहे. एस्टोनिया आणि तुर्की हे असोसिएट देश असल्याने, पूर्ण सदस्य देशांच्या श्रेणीत अभिषेक आता जगातील प्रथम क्रमांकाचा फलंदाज बनला आहे. भारताकडून या यादीत अभिषेक शर्मा (30 चेंडू) प्रथम, रोहित शर्मा (35 चेंडू) दुसऱ्या, पुन्हा अभिषेक शर्मा (37 चेंडू – विरुद्ध इंग्लंड) तिसऱ्या आणि संजू सॅमसन (40 चेंडू – विरुद्ध बांगलादेश) चौथ्या स्थानावर आहे.

A MAGNIFICENT MILESTONE! ? Relive the moment Abhishek Sharma brought up a record-breaking hundred ??#TeamIndia | #AFGvINDpic.twitter.com/SMbmXrtziL — BCCI (@BCCI) September 17, 2026

पॉवरप्लेमध्ये भारताची ऐतिहासिक 100 धावांची मजल

अभिषेकच्या या झंझावाती फलंदाजीच्या जोरावर भारतीय संघाने पहिल्या 6 षटकांच्या पॉवरप्लेमध्ये एकही गडी न गमावता 100 धावा फलकावर लावल्या. टी-20 आंतरराष्ट्रीय क्रिकेटच्या इतिहासात पॉवरप्लेमधील भारताची ही आतापर्यंतची सर्वोच्च धावसंख्या ठरली आहे. पॉवरप्लेच्या या 100 धावांपैकी एकट्या अभिषेकने 22 चेंडूंत 76 धावा कुटल्या, तर संजू सॅमसनने 14 चेंडूंत 24 धावांचे योगदान दिले. मैदानावर उपस्थित प्रेक्षकांसाठी ही खेळी एखाद्या व्हिडिओ गेममधील दृश्यासारखी भासत होती.