पाकड्यांची सीमेवर कुरघोडी सुरुच; नौशेरा, सुंदरबनी, अखनूर सेक्टरमध्ये गोळीबार

जम्मू-काश्मीर: 29 व 30 एप्रिल 2025 च्या रात्री, जम्मू आणि काश्मीरमधील नियंत्रण रेषेवर पुन्हा एकदा पाकिस्तानकडून अकारण गोळीबाराच्या घटना घडल्या आहेत. नौशेरा, सुंदरबनी आणि अखनूर या संवेदनशील सीमेवरील भागांमध्ये पाकिस्तानी लष्कराच्या चौक्यांमधून भारतीय हद्दीत लहान शस्त्रांद्वारे गोळीबार करण्यात आला. ही कुरघोडी कुठलाही उकसवणारा प्रकार किंवा परिस्थिती नसतानाही करण्यात आली असल्याने सुरक्षा यंत्रणेत खळबळ उडाली आहे.

भारतीय लष्कराच्या जवानांनी संयमाने आणि शिस्तबद्ध पद्धतीने त्याला प्रत्युत्तर दिले. शत्रूपक्षाच्या कुरघोड्यांना तोंड देत भारतीय सैन्याने सीमारेषेच्या सुरक्षिततेला कोणताही धोका होऊ दिला नाही. लष्कराच्या सूत्रांनी सांगितले की, हे प्रत्युत्तर तात्काळ आणि नियंत्रित स्वरूपाचे होते, जेणेकरून परिस्थिती अधिक ताणतणावपूर्ण होऊ नये.

याशिवाय, बारामुल्ला व कुपवाडा जिल्ह्यांतील काही भागांमध्येही नियंत्रण रेषेवर अशाच प्रकारचा गोळीबार झाल्याची माहिती समोर आली आहे. तसेच, आंतरराष्ट्रीय सीमेवरील परगवाल सेक्टरमध्येही पाकिस्तानी सैन्याने लहान शस्त्रांद्वारे अकारण गोळीबार केला. या सर्व घटनांमध्ये कोणतीही जीवितहानी झाली नसली तरी, सीमेवरील सततच्या अशा हालचालींमुळे भारतीय सुरक्षा दल सतर्क झाले असून, कोणत्याही संभाव्य धोक्याला तोंड देण्यासाठी सज्ज आहेत. भारतीय लष्कराकडून स्पष्ट करण्यात आले आहे की, देशाच्या सीमांचे संरक्षण हे सर्वोच्च प्राधान्य असून, अशा कुरघोड्यांना सडेतोड उत्तर देण्यात येईल.