Yavatmal Accident: यवतमाळमध्ये कावड यात्रेला क्रुझरची जोरदार धडक; एका भाविकाचा जागीच मृत्यू, 5 जण गंभीर

यवतमाळ: यवतमाळ जिल्ह्यातील उमरखेड-नांदेड बायपासवर महाकाल कावड यात्रेदरम्यान भीषण अपघात घडला. ढाणकी बायपासजवळील पुलावर क्रुझर वाहनाने कावडधारकांना जोरदार धडक दिल्याने एका भाविकाचा जागीच मृत्यू झाला, तर पाच जण गंभीर जखमी झाले आहेत. या घटनेमुळे परिसरात हळहळ व्यक्त केली जात असून पुलावरील अंधारामुळेच हा अपघात घडल्याचा आरोप स्थानिक नागरिकांनी केला आहे.

मिळालेल्या माहितीनुसार, उनकेश्वर येथून उमरखेडच्या दिशेने महाकाल कावड यात्रा निघाली होती. यात्रेत मोठ्या संख्येने भाविक सहभागी झाले होते. ढाणकी बायपासवरील पुलावरून यात्रा पुढे जात असताना भरधाव वेगाने आलेल्या क्रुझर वाहनाने कावडधारकांना जोरदार धडक दिली. धडक इतकी भीषण होती की, विशाल दीपक पवार या कावडधारकाचा घटनास्थळीच मृत्यू झाला.

या अपघातात आणखी पाच भाविक गंभीर जखमी झाले आहेत. स्थानिक नागरिकांनी आणि इतर भाविकांनी तातडीने मदतकार्य सुरू करून जखमींना रुग्णालयात दाखल केले. सध्या त्यांच्यावर उपचार सुरू असून डॉक्टरांकडून प्रकृतीवर लक्ष ठेवण्यात येत आहे.

अपघातानंतर परिसरात मोठी गर्दी झाली होती. घटनेची माहिती मिळताच पोलिसांनी तातडीने घटनास्थळी धाव घेत परिस्थिती नियंत्रणात आणली. पोलिसांनी पंचनामा करून अपघाताचे नेमके कारण शोधण्यासाठी तपास सुरू केला आहे.

दरम्यान, स्थानिक नागरिक आणि प्रत्यक्षदर्शींनी या दुर्घटनेसाठी ढाणकी बायपासवरील पुलावरील अपुऱ्या प्रकाशव्यवस्थेला जबाबदार धरले आहे. या पुलावर पथदिव्यांची सुविधा नसल्याने रात्रीच्या वेळी मोठ्या प्रमाणात अंधार असतो. त्यामुळे वाहनचालकांना रस्ता स्पष्ट दिसत नाही आणि अशा दुर्घटना घडण्याची शक्यता वाढते, असे नागरिकांचे म्हणणे आहे.

या घटनेनंतर पुलावर तातडीने पथदिवे बसवून योग्य प्रकाशव्यवस्था करावी, तसेच यात्रांच्या वेळी वाहतूक नियंत्रण आणि सुरक्षेचे अतिरिक्त उपाय करावेत, अशी मागणी जोर धरू लागली आहे. श्रावण महिन्यात मोठ्या संख्येने निघणाऱ्या कावड यात्रांच्या पार्श्वभूमीवर ही दुर्घटना प्रशासनासाठीही गंभीर इशारा मानली जात आहे.