Tejaswini Pandit: ‘डोक्यावरून हात फिरवायला कुणी येणार नाही…’ आईच्या वाढदिवशी तेजस्विनी पंडितची भावुक पोस्ट

मुंबई: मराठी अभिनेत्री तेजस्विनी पंडित हिने आईच्या 70व्या वाढदिवसानिमित्त सोशल मीडियावर शेअर केलेल्या एका भावनिक पोस्टने चाहत्यांच्या मनाला हात घातला आहे. अभिनय आणि स्पष्टवक्तेपणासाठी ओळखली जाणारी तेजस्विनी यावेळी मात्र आई-वडिलांच्या आठवणींनी भारावलेली दिसली. तिच्या शब्दांत पालकांच्या निधनानंतर आयुष्यात निर्माण झालेली पोकळी, एकटेपणाची जाणीव आणि त्यातून पुढे जाण्याचा निर्धार स्पष्टपणे उमटला.

तेजस्विनीने पोस्टच्या सुरुवातीलाच ही कोणतीही सहज लिहिलेली पोस्ट नसल्याचे सांगितले. आईच्या निधनानंतर सोशल मीडियावर भावना व्यक्त करणं तिला सहज जमलं नव्हतं, अशी कबुली तिने दिली. यंदा तिची आई ज्योती चांदेकर यांचा 70वा वाढदिवस असता. हा दिवस मोठ्या आनंदात साजरा करण्याची इच्छा होती, पण आता तो फक्त आठवणींत उरल्याचे तिने नमूद केले.

तिने आई-वडिलांनी दिलेल्या संस्कारांची आठवणही या पोस्टमध्ये करून दिली. “शेवटच्या श्वासापर्यंत शिकत राहा,” हा त्यांचा संदेश आजही तिच्यासाठी प्रेरणादायी असल्याचे तिने सांगितले. पालक गमावल्यानंतरचे आयुष्य कसे बदलते, हे सांगताना तिने अत्यंत हृदयस्पर्शी शब्द वापरले.

“आई-वडील गेल्यावर मुलांना एकट्याने मोठं व्हायला शिकावं लागतं,” असे म्हणत तिने जीवनातील वास्तव मांडले. “चार खोल्यांच्या घरात एकट्याने परतावं लागतं. झोप येत नसेल किंवा थकवा आला असेल, तर डोक्यावरून हात फिरवायला कुणी येणार नाही, ही जाणीव स्वीकारावी लागते,” असे ती म्हणाली. या काही ओळींनी अनेकांच्या डोळ्यांत अश्रू आणले.

तेजस्विनीने तिच्या वडिलांच्या निधनाला 11 वर्षे पूर्ण झाल्याचे, तर आईला जाऊन एक वर्ष झाल्याचेही सांगितले. दोघांच्याही अचानक झालेल्या निधनाने आयुष्य कायमचे बदलून गेल्याची भावना तिने व्यक्त केली. मात्र, या दुःखात अडकून न राहता ‘मूव्ह ऑन’ नव्हे तर ‘मूव्ह फॉरवर्ड’ करण्याचा निर्णय घेतल्याचेही तिने स्पष्ट केले.

आई-वडिलांच्या आठवणींचे बोट धरून आणि त्यांच्या संस्कारांची शिदोरी घेऊन आयुष्याच्या पुढील प्रवासात शिकत राहणार असल्याचे तिने सांगितले. “आई बाबा… आम्ही शिकत राहू. तुमच्यासारखंच. शेवटच्या श्वासापर्यंत,” असे म्हणत तिने त्यांना भावपूर्ण श्रद्धांजली वाहिली.

तेजस्विनीच्या या पोस्टवर चाहते आणि कलाविश्वातील अनेक कलाकारांनी प्रतिक्रिया दिल्या आहेत. अभिनेता कुशल बद्रिके यानेही “त्यांना तुझा कायम अभिमान असेल,” अशी भावना व्यक्त केली. तेजस्विनीची ही पोस्ट सोशल मीडियावर मोठ्या प्रमाणात व्हायरल होत असून अनेकांनी तिच्या भावना स्वतःच्या आयुष्याशी जोडून पाहिल्या आहेत.