Cyber Fraud Crime: सात कोटींचा सायबर डल्ला; ‘म्यूल अकाउंट्स’चे मोठे रॅकेट उद्ध्वस्त; घोटाळ्याचा असा झाला पर्दाफाश

ओडिशा: डिजिटल युगात तंत्रज्ञानाचा वेगाने विस्तार होत असताना सायबर गुन्हेगारीचे जाळेही दिवसेंदिवस अधिक व्यापक आणि धोकादायक बनत आहे. ऑनलाइन व्यवहार, डिजिटल बँकिंग आणि मोबाईल पेमेंट प्रणालींचा वाढता वापर लक्षात घेऊन सायबर ठग नव्या पद्धतीने नागरिकांची आर्थिक फसवणूक करत असल्याचे प्रकार सातत्याने समोर येत आहेत. अशाच स्वरूपातील कोट्यवधी रुपयांच्या सायबर फसवणुकीचा मोठा प्रकार ओडिशा राज्यातील बरगढ जिल्ह्यात उघडकीस आला आहे.

या प्रकरणात बनावट किंवा ‘म्यूल बँक अकाउंट’च्या माध्यमातून सात कोटींपेक्षा अधिक संशयास्पद आर्थिक व्यवहार झाल्याचे तपासात निष्पन्न झाले आहे. 17 फेब्रुवारी 2026 रोजी रात्री अकरा वाजता पदमपूर पोलीस ठाण्यात कार्यरत सब-इन्स्पेक्टर प्रमिला मरेई यांनी यासंदर्भातील अधिकृत अहवाल सादर केला. ही कारवाई ओडिशा क्राईम इन्व्हेस्टिगेशन डिपार्टमेंटच्या क्राईम ब्रांचच्या निर्देशानुसार करण्यात आली.

तपासादरम्यान पदमपूर येथील पंजाब नॅशनल बँक आणि यूको बँक शाखांमध्ये उघडण्यात आलेल्या दोन संशयित खात्यांची चौकशी करण्यात आली. ही खाती अनुक्रमे आदर्श गिधिली (23) आणि सब्या प्रधान (23) यांच्या नावावर असल्याचे आढळले. मात्र प्राथमिक तपासात ही खाती वैयक्तिक व्यवहारांसाठी नसून सायबर फसवणुकीतून मिळालेल्या पैशांच्या व्यवहारासाठी वापरली जात असल्याचा संशय व्यक्त करण्यात आला.

हेही वाचा: Ajit Pawar Accident Case: अजित पवार विमान अपघाताच्या चौकशीसाठी हायकोर्टात जनहित याचिका; कोणी घेतली कोर्टात धाव ?

पुढील चौकशीत अमन साहू (27), राहणार सहूपाडा, पदमपूर याचे नाव समोर आले. पोलिस चौकशीत त्याने आदर्श गिधिली, सब्या प्रधान, राहुल राणा, शुभम मेहर, चंद्रकांत साहू आणि रश्मिकांत सुनानी यांच्या नावाने विविध बँकांमध्ये एकूण सहा खाती उघडल्याची कबुली दिली. या सर्व खात्यांची पासबुक आणि एटीएम कार्ड त्याने चांदनी अग्रवाल उर्फ मित्तल (35), रा. बरगड हिच्याकडे सुपूर्द केल्याचे तपासात उघड झाले.

वर्ष 2024-25 दरम्यान या खात्यांमधून मोठ्या प्रमाणावर आर्थिक व्यवहार झाल्याचे समोर आले असून सुमारे सात कोटींपेक्षा अधिक रक्कम सायबर फसवणुकीशी संबंधित असल्याचा संशय पोलिसांनी व्यक्त केला आहे. या प्रकरणी भारतीय न्याय संहिता अंतर्गत कलम 318(4), 336(3), 340(1), 61(2)(b), 3(5) तसेच माहिती तंत्रज्ञान कायद्यातील कलम 66(C) आणि 66(D) अंतर्गत गुन्हा नोंदविण्यात आला आहे.

दरम्यान, पोलिसांनी या संपूर्ण सायबर नेटवर्कचा सखोल तपास सुरू केला असून देशातील इतर राज्यांमध्ये झालेल्या संशयास्पद व्यवहारांशी या रॅकेटचा संबंध आहे का, याचीही पडताळणी केली जात आहे. डिजिटल व्यवहार करताना अनोळखी लिंक, संशयास्पद कॉल किंवा बँक खात्यांची गोपनीय माहिती शेअर करताना नागरिकांनी विशेष सतर्कता बाळगावी, असे आवाहन पोलिस प्रशासनाने केले आहे.

वाढत्या सायबर गुन्ह्यांच्या पार्श्वभूमीवर आर्थिक सुरक्षितता आणि डिजिटल जागरूकता हीच नागरिकांसाठी सर्वात महत्त्वाची जबाबदारी ठरत असल्याचे या प्रकरणातून पुन्हा अधोरेखित झाले आहे.

हेही वाचा: PM Modi Letter For Vijay and Rashmika : पंतप्रधान नरेंद्र मोदी यांनी विजय देवरकोंडा आणि रश्मिका मंदानाला दिल्या खास शुभेच्छा, पत्र लिहित म्हणाले, 'लग्न समारंभाचे आमंत्रण मिळाल्याने…'