Nashik Crime: नाशिकमध्ये सरकारी डॉक्टरचा धक्कादायक कारनामा; भरधाव कारने 3 पादचाऱ्यांना उडवलं, संतप्त नागरिकांचा उद्रेक

नाशिक : नाशिकमध्ये जिल्हा रुग्णालयातील एका सरकारी डॉक्टरच्या कारने भररस्त्यात पादचाऱ्यांना धडक दिल्याची धक्कादायक घटना समोर आली आहे. या अपघातात तीन पादचारी जखमी झाल्याची प्राथमिक माहिती आहे. ही घटना जिल्हाधिकारी कार्यालयासमोर घडल्याचे सांगण्यात येत आहे. घटनेनंतर परिसरात मोठी गर्दी झाली आणि नागरिकांमध्ये संतापाचे वातावरण निर्माण झाले.

मिळालेल्या माहितीनुसार, संबंधित डॉक्टर कार घेऊन रस्त्यावरून जात असताना कारचा वेग मोठा होता. अचानक कार अनियंत्रित झाल्याने रस्त्यावरून जाणाऱ्या तीन पादचाऱ्यांना धडक बसली. या धडकेत तिघेही जखमी झाले. अपघातानंतर डॉक्टर घटनास्थळावरून पुढे गेल्याचे सांगण्यात येत असून, नागरिकांनी कारचा पाठलाग केला.

घटनेची माहिती मिळताच काही नागरिकांनी डॉक्टरला पकडले. यावेळी संतप्त नागरिकांनी डॉक्टरला मारहाण केल्याची माहिती आहे. दरम्यान, घटनेची माहिती पोलिसांना मिळताच पोलिसांचे पथक घटनास्थळी दाखल झाले. पोलिसांनी परिस्थिती नियंत्रणात आणत संबंधित डॉक्टरला ताब्यात घेतले.

या घटनेनंतर डॉक्टरच्या कारबाबतही नागरिकांमध्ये मोठा संताप पाहायला मिळाला. संतप्त जमावाने डॉक्टरच्या कारची तोडफोड केल्याची माहिती आहे. त्यामुळे काही काळ परिसरात तणावाचे वातावरण निर्माण झाले होते.

दरम्यान, संबंधित डॉक्टर दारूच्या नशेत कार चालवत असल्याचा आरोप घटनास्थळी उपस्थित नागरिकांकडून करण्यात आला आहे. मात्र, डॉक्टर मद्यधुंद अवस्थेत होते की नाही, हे अधिकृत तपासणीनंतरच स्पष्ट होणार आहे. पोलिसांकडून या प्रकरणाचा तपास सुरू करण्यात आला असून डॉक्टरची वैद्यकीय तपासणी करण्यात येणार असल्याची माहिती आहे.

विशेष म्हणजे, संबंधित कारवर ‘इमर्जन्सी ड्युटी’, ‘सिव्हिल हॉस्पिटल’ अशा स्वरूपाची पाटी असल्याचे सांगण्यात येत आहे. त्यामुळे सरकारी रुग्णालयातील डॉक्टरच अशा प्रकारे वाहन चालवत असल्याच्या आरोपामुळे नागरिकांमध्ये आणखी संताप व्यक्त केला जात आहे.

अपघातात जखमी झालेल्या तिन्ही पादचाऱ्यांवर उपचार सुरू असून त्यांच्या प्रकृतीबाबत अधिकृत माहिती समोर आलेली नाही. दरम्यान, या प्रकरणात संबंधित डॉक्टरवर कठोर कारवाई करण्यात यावी, अशी मागणी नागरिकांकडून करण्यात येत आहे.

या घटनेमुळे सरकारी रुग्णालयातील डॉक्टरांच्या जबाबदारीबाबतही प्रश्न उपस्थित झाले आहेत. पोलिसांच्या तपासानंतर अपघात नेमका कसा झाला, कारचा वेग किती होता आणि डॉक्टर मद्यधुंद अवस्थेत होते का, याबाबत अधिक स्पष्टता मिळणार आहे.