Maharashtra Rain: राज्यात मान्सून पुन्हा सक्रिय होणार! 13 ऑगस्टपासून पावसाचा जोर वाढणार, कोणत्या भागात मुसळधार पावसाचा धोका?
मुंबई: महाराष्ट्रात गेल्या काही दिवसांपासून पावसाने काहीशी विश्रांती घेतली असली, तरी आता पुन्हा एकदा मान्सून सक्रिय होण्याची शक्यता निर्माण झाली आहे. बंगालच्या उपसागरात पुढील 24 तासांत कमी दाबाचे क्षेत्र तयार होण्याची शक्यता असून, त्याचा परिणाम महाराष्ट्रातील पावसावर होऊ शकतो. विशेषतः 13 ऑगस्टनंतर राज्यातील काही भागांत पावसाच्या सरींचा जोर वाढण्याची शक्यता आहे.कोकण, घाटमाथा आणि मध्य महाराष्ट्रातील काही भागांमध्ये तुलनेने अधिक पाऊस होण्याची शक्यता आहे. त्यामुळे नागरिकांनी पुढील काही दिवस हवामान विभागाकडून जारी होणाऱ्या सूचनांकडे लक्ष ठेवण्याचे आवाहन करण्यात येत आहे.
मुंबई, ठाणे आणि नवी मुंबईत पावसाचा जोर
दरम्यान, मुंबईच्या पूर्व आणि पश्चिम उपनगरांमध्ये आज सकाळपासून पावसाच्या जोरदार सरी पाहायला मिळाल्या. ठाणे आणि नवी मुंबई परिसरातही पहाटेपासून पावसाची संततधार सुरू होती.मुंब्रा, महापे आणि ऐरोली परिसरात पावसाचा जोर वाढल्याने काही सखल भागांमध्ये पाणी साचण्यास सुरुवात झाली. याचा परिणाम रस्ते वाहतुकीवरही झाला. पूर्व आणि पश्चिम द्रुतगती मार्गावर काही ठिकाणी वाहनांचा वेग मंदावला. ठाणे-बेलापूर मार्गावरही पाणी साचल्याने वाहतुकीवर परिणाम झाल्याचे चित्र आहे.
कोकण आणि घाटमाथ्यावर अधिक परिणामाची शक्यता
येत्या काही दिवसांत मुंबई, ठाणे, पालघर, रायगड, रत्नागिरी आणि सिंधुदुर्ग या भागांत पावसाच्या सरी कायम राहण्याची शक्यता आहे. मध्य महाराष्ट्रातील घाट परिसरातही पावसाचा जोर वाढण्याची शक्यता आहे.मराठवाड्यात काही ठिकाणी हलका ते मध्यम पाऊस, तर काही भागांत मेघगर्जनेसह पावसाची शक्यता आहे. विदर्भातील काही जिल्ह्यांमध्येही पावसाच्या सरी अपेक्षित आहेत.
मुसळधार पावसामुळे कोणते धोके?
जोरदार पावसाच्या काळात सखल भागात पाणी साचणे, स्थानिक पातळीवर पूरसदृश परिस्थिती निर्माण होणे आणि वाहतुकीवर परिणाम होण्याची शक्यता असते. जुन्या किंवा कमकुवत इमारतींना धोका निर्माण होऊ शकतो. तसेच झाडे उन्मळून पडण्याच्या घटना घडू शकतात. घाट परिसरात मुसळधार पाऊस झाल्यास दरड कोसळणे आणि भूस्खलनाचा धोका वाढू शकतो. त्यामुळे डोंगराळ भागातून प्रवास करणाऱ्यांनी विशेष खबरदारी घेणे गरजेचे आहे.
पावसाच्या ब्रेकमागे 'डॉल्फिन' चक्रीवादळाचा प्रभाव?
चीनच्या किनारपट्टीवर धडकलेल्या डॉल्फिन चक्रीवादळाचा भारतीय मान्सूनच्या हालचालींवर अप्रत्यक्ष परिणाम झाला असण्याची शक्यता हवामान तज्ज्ञांकडून व्यक्त करण्यात आली आहे. प्रशांत महासागरातील मोठ्या हवामान प्रणालींचा परिणाम बाष्पयुक्त वाऱ्यांच्या प्रवाहावर होऊ शकतो. त्यामुळे बंगालच्या उपसागरातील हवामान परिस्थितीतही तात्पुरते बदल होण्याची शक्यता असते.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.