Tukaram Mundhe FDA : ‘विमल’ची जाहिरात करणं पडलं महागात? शाहरुख खानसह, अजय देवगण आणि टायगर श्रॉफ अडचणीत; कायदेशीर कारवाईची टांगती तलवार
FDA कडून बॉलिवूडच्या बड्या कलाकारांकडे 'विमल' करारांची मागणी करण्यात आली आहे. 'विमल इलायची' मोहिमेतून सेलिब्रिटींनी त्वरित माघार घ्यावी, असे महाराष्ट्र FDA चे आदेश आहेत. दिशाभूल करणाऱ्या पान मसाला जाहिरातींबाबत स्पष्टीकरण देण्यासाठी शाहरुख खान, अजय देवगण आणि टायगर श्रॉफ यांना 15 दिवसांची मुदत; अन्यथा कडक कायदेशीर कारवाईचा इशारा दिला आहे. अजय देवगण, शाहरुख खान आणि टायगर श्रॉफ यांसारख्या बड्या अभिनेत्यांना 'कारणे दाखवा नोटीस' बजावण्यात आली आहे.
या नोटीसमध्ये अभिनेत्यांवर आरोप करण्यात आला आहे की, त्यांनी 'विमल इलायची'च्या जाहिरातींद्वारे महाराष्ट्रात प्रतिबंधित असलेल्या 'विमल पान मसाला' या उत्पादनाचा अप्रत्यक्षपणे प्रचार केला आहे. या कलाकारांना संबंधित मोहिमेतील सहभाग त्वरित थांबवण्याचे आणि जाहिरातीशी संबंधित सर्व प्रचार-साहित्य त्यांच्या अधिकृत सोशल मीडिया हँडल्स व वेबसाइट्सवरून काढून टाकण्याचे निर्देश देण्यात आले आहेत.
FDA ने त्यांच्याकडून एंडोर्समेंट (प्रचार) करार, मोहिमेचा तपशील , मानधनाचे तपशील आणि योग्य ती खबरदारी घेतल्याचा पुरावा यांच्या पूर्ण प्रतींची मागणी केली आहे. आपल्याविरुद्ध कायदेशीर कारवाई का केली जाऊ नये, याचे लेखी स्पष्टीकरण 15 दिवसांच्या आत सादर करण्याचा अंतिम इशारा या कलाकारांना देण्यात आला आहे. संबंधित ग्राहक संरक्षण कायद्यांनुसार, दिशाभूल करणाऱ्या जाहिरातींसाठी 10 लाख ते 50 लाख रुपयांपर्यंतचा दंड होऊ शकतो आणि संबंधित कलाकारांवर तीन वर्षांपर्यंत कोणत्याही उत्पादनाच्या जाहिराती करण्यास बंदी घातली जाऊ शकते.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.